مۇناي-گاز سالاسىنداعى «اتقىلاما-2017» ارنايى تاكتيكالىق اۋماقتىق جاتتىعۋىنا اتىراۋ, ماڭعىستاۋ, باتىس قازاقستان, قىزىلوردا, اقتوبە وبلىستارىنان كەلگەن قۇتقارۋشىلار قاتىستى. مامانداردىڭ ءتۇرلى اپاتتىق جاعدايداعى ارەكەت ەتۋ شەبەرلىكتەرى ساراپقا سالىنعان شارانى اتىراۋ وبلىسىنىڭ اكىمى نۇرلان نوعاەۆ تا ارنايى كەلىپ كوردى. «اپاتتىق جاعداي مۇناي-گاز, حيميا ونەركاسىبى سالالارىندا دا كەزدەسەدى. سول اپاتتى اۋىزدىقتاپ, ادامداردىڭ ومىرلەرىن ساقتاۋ, جاعدايدى قالپىنا كەلتىرۋ - قۇتقارۋشىلارعا جۇكتەلەتىن ۇلكەن مىندەت. شارتتى تۇردە ورىندالاتىن جاتتىعۋلار وسىمەن شەكتەلىپ, ناقتى ومىردە اپاتتى جاعداي بولماسىن», - دەدى ايماق باسشىسى.
ارنايى قىزمەت قۇرىلىمدارى قانداي جاعدايدا دا اتقىلامالارعا قارسى تۇرۋعا دايىن. بۇل رەتتە «كاسىبي اسكەريلەندىرىلگەن اپاتتىق-قۇتقارۋ قىزمەتى» مەكەمەسىنىڭ جۇمىسىن ايرىقشا اتاۋعا بولادى. كاسىپورنىنىڭ 13 بولىمشەسى قازاقستاننىڭ بارلىق ونەركاسىپتىك ايماقتارىندا ورنالاسقان. مەكەمەدە 2800 -دەن استام جوعارى بىلىكتى كاسىبي قۇتقارۋشى, 600 بىرلىك اپاتتىق-قۇتقارۋ تەحنيكا, 6700 بىرلىك ارنايى تاعايىندالعان جابدىق بار. قۇرىلىم باسشىسى گەنەرال-مايور ديحانبەك ساتىلعانوۆ مۇناي-گاز سالاسىنداعى قاراۋسىز قالعان نىساندارداعى اپاتتاردى جويۋعا دا قاتىساتىندارىن ايتادى. مىسالى, اقتوبە وبلىسى «قاراتوبە» كەن ورنىنداعى, اتىراۋ وبلىسى «كۇمىسبەك» كەن ورنىنداعى قاراۋسىز قالعان ۇنعىمالاردا بولعان اپاتتاردى جويۋ جۇمىستارىن جۇرگىزگەن. «وتكەن مامىر ايىندا اتىراۋ وبلىسىنىڭ جەر قويناۋىن پايدالانۋشىلار ەرىكتى اپاتتىق-قۇتقارۋ قىزمەتىنىڭ كۇشتەرى مەن قۇرالدارىنىڭ قىزمەت كورسەتۋ نىسانى بولماۋىنان اپاتقا ۇشىرادى, وبلىستاعى بولىمشەنىڭ كومەگىنە جۇگىنىپ, ءبىزدىڭ قۇتقارۋشىلارىمىز قىسقا مەرزىمدە اپاتتى جويدى», - دەيدى د.ساتىلعانوۆ.
مەكەمەدەگى وقۋ ورتالىقتارىندا جىل سايىن 1800-دەن استام ادام وقيدى. جىل باسىنان بەرى اپاتتىق-قۇتقارۋ جۇمىستارىن ورىنداۋ كەزىندە 185 ادام قۇتقارىلىپ, اپاتتى جويۋ ورىندارىندا 319 ادامعا مەديتسينالىق كومەك كورسەتىلگەن.
بەس وبلىستىڭ قۇتقارۋشىلارى باس قوسقان جاتتىعۋ شاراسىندا اپاتتان زارداپ شەككەن ادامدى قۇتقارۋ, ماگيسترالدى مۇناي قۇبىرىندا بولعان اقاۋدى جويۋ, ءۇيىندى استىندا قالىپ قويعان ادامدى الىپ شىعۋ, مۇناي قۇيىلاتىن ىدىسقا ءتۇسىپ كەتكەن جۇمىسشىنى امان الىپ قالۋ, مۇناي اتقىلاعان ۇڭعىمانى اۋىزدىقتاۋ سەكىلدى جاۋاپتى دا قيىن تاپسىرمالار ورىندالدى. قۇتقارۋشىلاردىڭ ءبارى دە ماماندىقتارىنىڭ ناعىز مايتالماندارى ەكەندەرىن كورسەتتى. ال وقۋ-جاتتىعۋ شاراسىنىڭ ەكىنشى كۇنى كىشى اياق دوپتان وتكەن جارىسپەن جالعاستى.
باقىتگۇل باباش,
«ەگەمەن قازاقستان»
اتىراۋ
