تالايىنا تاعدىر جازعان جازۋشىلىقتىڭ ازابى مەن شەرىن قاتار ءورىپ, ءوزىن ورتادان وقشاۋلاۋ ارقىلى اقيقاتتىڭ اۋىر جۇگىن ارقالاعان قالامگەر نەسىپبەك ءداۋتاي ۇلى وقىرمانعا «قۇدىرەت پەن قاسىرەت» رومانى جانە «كوگىلدىر كويلەكتى كەلىنشەك», «اقكۇشىك», «باتىر», «قۇمعا قاشقان قۇيىن» اتتى پوۆەست-اڭگىمەلەرى ارقىلى تانىمال. نەنى جازسا دا اقيقاتتان اسپاي, شىندىقتان شىعانداماي جازاتىن قالامگەر وبراز دارالاۋدا, شىعارما تۇزۋدە بۇگىنگى قازاق پروزاسىن جاڭا دەڭگەيگە كوتەردى. ادامنىڭ بولمىسى, تاعدىردىڭ قيان-كەسكى شايقاسى ىسپەتتى دۇنيەلەر شىعارمالارىنان كورىنىس تاپتى.
جازۋشى, قازاقستاننىڭ ەڭبەك سىڭىرگەن قايراتكەرى, حالىقارالىق «الاش» ادەبي سىيلىعىنىڭ لاۋرەاتى نەسىپبەك ءداۋتاي ۇلىنىڭ جەتپىس جاسقا تولعان مەرەيتويى اۋليەاتا جەرىندە دۇركىرەپ ءوتتى. بۇل كۇنى وبلىستىق قازاق دراما تەاترىنا حالىق كوپتەپ جينالىپ, قالامگەرگە لايىقتى دەڭگەيدە قۇرمەت كورسەتتى. جازۋشى مەرەيتويىنا جامبىل جۇرتشىلىعىمەن قاتار, الماتى قالاسىنان جانە اتىراۋ وبلىسىنان دا ارنايى دەلەگاتسيا كەلىپ قاتىستى. سالتاناتتى كەشتى جازۋشى-دراماتۋرگ, ش.ايتماتوۆ اتىنداعى حالىقارالىق سىيلىقتىڭ لاۋ-رەاتى راحىمجان وتارباەۆ جۇرگىزىپ, نەسىپبەك ءداۋتاي ۇلىنىڭ شىعارماشىلىق جولىن كەڭىنەن زەردەلەدى.
اۋەلى ساحناعا جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ شىعىپ, جازۋشىنىڭ شىعارماشىلىعىنا توقتالدى. سونىمەن قاتار, مەرەيلى كەشتە قازاقستان رەسپۋبليكاسىنىڭ پرەمەر-ءمينيسترى باقىتجان ساعىنتاەۆ, قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا, قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلى, قازاقستان رەسپۋبليكاسى پارلامەنتى ءماجىلىسىنىڭ دەپۋتاتى سەرىك ۇمبەتوۆ سىندى ازاماتتاردىڭ قۇتتىقتاۋ حاتتارى وقىلدى. ال بەلگىلى جازۋشى مارال سقاقباەۆ نەسىپبەك ءداۋتاي ۇلى تۋرالى تەبىرەنە سويلەسە, مەرەيتوي يەسىنە قازاقستان جازۋشىلار وداعىنىڭ توراعاسى نۇرلان ءورازاليننىڭ قۇتتىقتاۋ حاتىن «قازاق ادەبيەتى» گازەتىنىڭ باس رەداكتورى جاناربەك ءاشىمجان تابىس ەتتى. سونداي-اق مارحابات بايعۇت, مەرەكە قۇلكەنوۆ, ەسەنعالي راۋشانوۆ سىندى اقىن-جازۋشىلار نەسىپبەك ءداۋتاي ۇلىنىڭ دارا قولتاڭباسىن اتاپ كورسەتسە, جازۋشى جۇسىپبەك قورعاسبەك قالامگەر شىعارماشىلىعى جونىندە بايانداما جاسادى.
جازۋشى مەرەيتويىنا ارنايى كەلگەن جالپىۇلتتىق «ەگەمەن قازاقستان» گازەتىنىڭ باسقارما توراعاسى دارحان قىدىرالى نەسىپبەك ءداۋتاي ۇلىنىڭ شىعارماشىلىعى مەن كىسىلىك كەلبەتى جونىندە ءسوز سويلەپ, ونىڭ باۋىرجان مومىش ۇلى, شەرحان مۇرتازا سياقتى الىپتاردان باستالعان قۇتتى كەرۋەننىڭ جالعاسى ىسپەتتى ەكەندىگىن اتاپ ءوتتى. «ول وقىرمان قاۋىمدى ورنەگى وزگەشە جاڭا ستيلدەگى كوركەمدىك-دۇنيەتانىمدىق ىزدەنىستەرىمەن, قاراتاۋ شەرتپەلەرىندەي بەينەلى ءداستۇرلى ەپيكالىق بايانداۋلارىمەن, ۇلتتىق بەدەرلى تانىمىمەن وزىنە باۋراپ, قايمانا حالقىمىزدىڭ الەۋمەتتىك-قوعامدىق كۇردەلى ءومىرىن ادامزاتقا ءتان اقيقاتپەن شەبەر جىمداستىرا جەتكىزەتىن جازۋشى. نەس- اعاڭنىڭ پروزاسىنداعى كەيىپكەرلەر الەمى ءومىردىڭ بۋىرقانىپ قايناعان ءوز ىشىنەن, وزەگىنەن ويىپ الىنعاندىقتان شىنشىل دا سىرشىل كەلەدى. ولاردى اۆتور ويدان شىعارمايدى, قيالدان تۋعىزبايدى, مۇنى ساۋاتتى وقىرمان دا بىردەن ايىرادى. سوندىقتان نەساعاڭ شىتىرمان ومىردەن شىندىقتى ىزدەگەن قالامگەر», دەدى دارحان قىدىرالى. سونداي-اق ەل گازەتىنىڭ اتىنان يىعىنا شاپان جاۋىپ, قۇرمەت كورسەتتى.
جالپى مەرەيلى كەشتە نەسىپبەك ءداۋتاي ۇلىنىڭ شىعارماشىلىق تاعدىرى اڭگىمە وزەگىنە اينالدى. الماتىدان ارنايى كەلگەن جۇماباي شاشتاي ۇلى, امانحان ءالىم, بەكەن ىبىرايىم ۇلى, تەمىرعالي كوپباەۆ تا قالامداستارى تۋرالى لەبىزدەرىن ءبىلدىردى. ال «تاراز» تريوسى كەنەن ازىرباەۆتىڭ اندەرىن شىرقاپ كەش كورىگىن قىزدىرسا, اننا ۆۋندەر, ءمادينا ساعىنبەكوۆا سياقتى ونەرپازدار كورەرمەن كوزايىمىنا اينالدى.
* * *
ءدال وسى كۇنى شۋ اۋدانىندا اتاقتى كۇيشى-كومپوزيتور ءابدىمومىن جەلدىباەۆتىڭ سەكسەن جاسقا تولعان مەرەيتويى جوعارى دەڭگەيدە اتالىپ ءوتتى. ءومىرى ونەرىمەن ءورىلىپ, التى الاشتىڭ قادىر تۇتار تۇلعاسىنا اينالعان دارىن يەسىنىڭ كەشىنە جامبىل وبلىسىنىڭ اكىمى كارىم كوكىرەكباەۆ ارنايى قاتىسىپ, اق تىلەگىن جەتكىزدى. كۇيشىنىڭ شىعارماشىلىق جولىنا توقتالىپ, ونەر يەسىنىڭ جاستار ءۇشىن ءاردايىم ۇلگى ەكەنىن ايتىپ ءوتتى. سونداي-اق ەلباسىنىڭ «تۋعان جەر» باعدارلاماسى اياسىندا وبلىس باسشىسى مەرەيتوي يەسىنە ءۇي سالىپ بەرۋگە ۋادە بەردى.
حاميت ەسامان,
«ەگەمەن قازاقستان»
جامبىل وبلىسى
