وسىمەن بەسىنشى رەت ۇيىمداستىرىلعان ۇشجاقتى دەڭگەيدەگى بىرلەسكەن وتىرىسقا قازاقستاننىڭ ىشكى ىستەر ءمينيسترى قالمۇحانبەت قاسىموۆ بەلارۋس رەسپۋبليكاسىنىڭ توتەنشە جاعدايلار جونىندەگى ءمينيسترى ۆلاديمير ۆاششەنكو جانە رەسەي فەدەراتسياسى ازاماتتىق قورعانىس, توتەنشە جاعدايلار جانە دۇلەي ءزىلزالالاردىڭ سالدارىن جويۋ ىستەرى ءمينيسترى ۆلاديمير پۋچكوۆ قاتىستى.
حالىقارالىق شەڭبەردە وتكەن بىرلەسكەن القانىڭ كۇن تارتىبىندە IV وتىرىس شەشىمدەرىنىڭ ورىندالۋى مەن الداعى VI وتىرىستى وتكىزۋ ماسەلەلەرى تالقىلاندى.
سونىمەن قاتار توتەنشە جاعدايلار مونيتورينگى مەن ولاردى بولجاۋ سالاسىنداعى مامانداردى دايىنداۋ, ترانسشەكارالىق سيپاتتاعى وقىس وقيعالارعا دەن قويۋ بويىنشا شەكارالىق ىنتىماقتاستىق, سۋ وبەكتىلەرىندەگى قاۋىپسىزدىكتى قامتاماسىز ەتۋ, سەلدەردىڭ الدىن الۋ جانە عارىش مونيتورينگى دەرەكتەرىن پايدالانۋ ماسەلەلەرى بويىنشا تاجىريبە الماسۋ, بولۋى ىقتيمال جەر سىلكىنىستەرىنە نازار اۋدارۋ, جاڭا سالىنىپ جاتقان بيىك عيماراتتارداعى ورتتەردى سوندىرۋگە كۇشتەر مەن قۇرالداردى دايىنداۋ سىندى پروبلەمالار جان-جاقتى ءسوز بولدى.
بىرلەسكەن قىزمەتتىڭ ستراتەگيالىق باعىتتارى مەن اۋقىمىن انىقتاۋ, ءۇش ەلدىڭ مۇددەلى ورگاندارى اراسىندا توتەنشە جاعدايلار بولىمشەلەرىنىڭ, ونىڭ ىشىندە بىرلەسكەن القاعا قاتىسۋشى ەلدەردىڭ شەكارالاس اۋماقتارىنداعى توتەنشە جاعدايلاردىڭ الدىن الۋعا جانە ولاردى جويۋعا باعىتتالعان ءوزارا ءىس-قيمىل ءتارتىبىن رەتتەۋ ماسەلەسى دە تاقىرىپتان تىس قالمادى. سول سياقتى مامانداردى كاسىبي تۇرعىدا وقىتۋ مەن ولاردىڭ بىلىكتىلىكتەرىن ارتتىرۋ سالاسىنداعى ءوزارا ءىس-قيمىلدى ۇتىمدى ۇيىمداستىرۋ تەتىكتەرى قارالدى.
ايتا كەتەيىك, مۇنداي جيىن حالىقتى قىسىلتاياڭ شاقتاردا سابىرلى بولىپ ءارى جۇيەلى ءىس-قيمىلدارعا جۇمىلدىرۋ باعىتى بويىنشا باعدارلامالار مەن وقۋ ادىستەرىن ازىرلەۋدە, ماتەريالدىق-تەحنيكالىق بازانى جەتىلدىرۋدە جانە ەڭ باستىسى, قالىڭ بۇقارانىڭ تىنىس-تىرشىلىگىندەگى قاۋىپسىزدىكتى قامتاماسىز ەتۋدە ماڭىزدى ءرول اتقاراتىنى ءسوزسىز. سول سەبەپتەن دە وسىنداي باعىتتار بويىنشا جۇمىس جۇرگىزۋ بىرلەسكەن القانىڭ نەگىزگى مىندەتتەرى بولىپ تابىلادى.
نۇرلىبەك دوسىباي,
«ەگەمەن قازاقستان»
