قايىرىمدىلىق شاراعا سەرگەي حيجنيچەنكو, ۆيكتور دميترەنكو, يگور ششاتسكي, ميحايل گابىشەۆ, ورالحان ومىرتاەۆ, گەۆورگ نادجاريان, رۋسلان الىمباەۆ, سونداي-اق باس باپكەر الەكساندر بوروديۋك پەن ۇلتتىق قۇرامانىڭ بۇرىنعى ويىنشىلارى مۇرات تىلەشوۆ پەن اندرەي فينونچەنكو قاتىستى.
قازاقستان ۇلتتىق قۇراماسى مەن «شاحتەر» كلۋبىنىڭ شابۋىلشىسى سەرگەي حيجنيچەنكو قۇراما فۋتبولشىلارىمەن قايىرىمدىلىق شاراسىنا ءۇشىنشى رەت قاتىسىپ وتىرعانىن ايتتى. ول بۇعان دەيىن استانا جانە تالعار قالالارىنداعى بالالار ۇيىنە بارعان. «بالالار ۇيىنە ءۇشىنشى رەت كەلگەنىمە قۋانىشتىمىن. مۇنداي شارالار وتە قاجەت. بالالارعا سىيلىق جاساۋ جانە كوتەرىڭكى كوڭىل-كۇيى سىيلاۋ ءبىز ءۇشىن ۇلكەن قۋانىش. بۇل جەردە جاقسى جاعداي جاسالعان جانە بالالار وتە بەلسەندى. مەن ولارعا ومىردەگى بارلىق ارماندارى ورىندالۋىن تىلەيمىن!» دەيدى حيجنيچەنكو.
ۇلتتىق قۇرامانىڭ باس باپكەرى الەكساندر بوروديۋك شارادان كەرەمەت اسەر العانىن, بالالار ۇيىندە قىزمەت ەتىپ جاتقان ءاربىر تاربيەشىگە باس ءيىپ, العىسىن جەتكىزدى. «مۇندا جۇمىس ىستەپ جۇرگەن ادامدارعا باسىمدى يەمىن. سىزدەر اتقارىپ جاتقان ىستەرىڭىز ءۇشىن كەز كەلگەن ماقتاۋعا جانە ماراپتقا لايىقسىزدار. بۇل - اسىل ءىس, ۇلكەن جۇمىس».
اتالعان بالالار ءۇيىن 2000 جىلى وسى قالادا تۋىپ وسكەن, بۇگىندە قازاقستان رەسپۋبليكاسى پارلامەنت سەناتىنىڭ دەپۋتاتى داريعا نازارباەۆانىڭ ءوزى اشقان. بالالار ءۇيىنىڭ ديرەكتورى دانەكەر سەيسەكەنوۆانىڭ ايتۋىنشا, فۋتبولشىلار اتالعان بالالار ۇيىنە ءبىرىنشى رەت كەلىپ تۇرماعانىن, جىل سايىن وسىنداعى تاربيەلەنۋشىلەردى ءوز سىيلىقتارىمەن قۋانتىپ تۇرادى ەكەن. «فۋتبولشىلار ءبىزدىڭ دوستارىمىز بولىپ كەتكەن. ولاردىڭ كەلۋىن ءبىزدىڭ بالالار دا تاعاتسىزدانا كۇتەدى. سونداي-اق فۋتبولشىلار ءاردايىم بىزبەن قۋانىشتارىمەن, جەڭىستەرىمەن ءبولىسىپ تۇرادى. ءبىزدى ۇمىتپايدى, ءار كەلگەن سايىن سىيلىقتارىمەن كەلەدى. جەرگىلىكتى «شاحتەر» كلۋبىنىڭ فۋتبولشىلارى ءبىزدى ۇنەمى ويىندارىنا شاقىرىپ, قايىرىمدىلىق شاراسىن وتكىزىپ تۇرادى» دەدى د.سەيسەكەنوۆا.
ءسوز اراسىندا دانەكەر سەيسەكەنوۆا بالار ءۇيى اشىلعان 17 جىلدىڭ ىشىندە وسىندا تاربيەلەگەن بالالاردىڭ ارىسى اقش-تا, بەرىسى رەسەيدى اسىراپ العان اتا-انالارىمەن تۇرىپ جاتىر. بالالار جات جەردە جۇرسە دە, تاريبەشىلەرىن ۇمىتپاي, ءاردايىم حابارلاسىپ تۇرادى ەكەن.
قايىرىمدىلىق شارا بارىسىندا فۋتبولشىلار وزدەرىمەن الىپ كەلگەن سىي-سىياپاتتارىن بالالار ۇيىندەگى بالعىن ءىنى-قارىنداستارىنا تابىستادى. ءوز كەزەگەندە بالالار ءۇيىنىڭ تاربيەلەنۋشىلەرى ونەرلەرىن ورتاعا سالىپ, كونتسەرتتىك باعدارلاما ۇيىمداستىردى. كەش سوڭىندا ولار فۋتبولشى اعالارىمەن اڭگىمەلەسىپ, ەستەلىككە سۋرەتكە ءتۇستى. سونىمەن قاتار, بالالار ءتۇرلى ويىن ويناپ, كۇندەرىن كوتەرىڭكى كوڭىل-كۇيمەن وتكىزدى.
ءالي بيتورە,
«ەگەمەن قازاقستان»
