بالۋان شولاق اتىنداعى سپورت سارايىندا مۇسىلمان قىز-كەلىنشەكتەرگە ارنالعان, ۇلتتىق ايشىقتاعى زاماناۋي كيىم ۇلگىلەرىنىڭ رەسپۋبليكالىق «اسەم كيىم – ايەل كوركى – 2011» بايقاۋى قورىتىندىلاندى.
الماتىعا جۇمىس ساپارىمەن كەلگەن ەلباسى نۇرسۇلتان نازارباەۆ جوعارى بىلىكتى يمامداردى, يسلامتانۋشىلار مەن ءدىنتانۋشىلاردى, اراب ءتىلى مەن ادەبيەتىنىڭ اۋدارماشىلارىن دايارلايتىن نۇر-مۇباراك ەگيپەت يسلام ۋنيۆەرسيتەتىندە بولىپ, ءدىني ءتالىم الىپ جاتقان تۇلەكتەرمەن كەزدەسكەنىندە قازاق ۇلتىنىڭ مۇسىلمان حالىق ەكەندىگىن, بىزگە مۇسىلماندىعىمىزدى, قازاقتىعىمىزدى ساقتاپ قالۋ ءۇشىن ەشقاشان دا ۇلتتىق قۇندىلىقتارىمىزدان, ادەت-عۇرپىمىزدان كوز جازباۋىمىز كەرەكتىگىن, جاس مامانداردىڭ كۇنى ەرتەڭ ۇلكەن ءدىن قايراتكەرى بوپ قالىپتاسىپ, مەملەكەتتىڭ تاۋەلسىزدىگىن نىعايتۋعا ۇلەس قوساتىندىقتارىن باسا ايتقان ەدى. سول كەزدەسۋدە قازاقستان مۇسىلماندارى ءدىني باسقارماسىنىڭ ءتوراعاسى, باس ءمۇفتي ءابساتتار قاجى دەربىسالى وسىدان ەكى اي بۇرىن ءدىني باسقارمانىڭ باستاماسىمەن ەلىمىزدەگى قىز-كەلىنشەكتەرگە ارنالعان ۇلتتىق ناقىشتاعى مۇسىلمان كيىم ۇلگىسىنە بايقاۋ جاريالانعانىن, بايقاۋ ناتيجەسى جۋىردا قورىتىندىلاناتىندىعىن جەتكىزگەن. مىنە, سول مەجەگە جەتىپ, قالا تورىندەگى كەڭ سارايدا ءدۇبىرلى جيىن بولىپ ءوتتى.
ايتۋلى شارانى ەلىمىزدىڭ باس ءمۇفتيى, حازىرەت ءابساتتار قاجى دەربىسالى اشىپ, بايقاۋدىڭ ءمان-ماڭىزى جايلى قىسقاشا ايتىپ ءوتتى.
– ۇلتتىق ايشىقتاعى زاماناۋي كيىم ۇلگىلەرىن تىكتىرۋ ارقىلى تەك مۇسىلمانشىلىققا بەت بۇرعان قىزداردىڭ ماسەلەلەرى شەشىلىپ قانا قويمايدى, سونىمەن بىرگە قازاقىلىعىمىزدى ناسيحاتتاۋعا, نىعايتۋعا ۇلكەن مۇمكىندىك بولادى. بۇل ارقىلى ەڭ اۋەلى ءبىز قىزدارىمىزدى قازىر جاھاندى جايلاپ جاتقان جالاڭاشتانۋ ساياساتىنان ساقتاپ قالامىز. ۇلتتىعىمىزدى ساقتاپ قالۋدىڭ ءبىر جولى – ۇلتتىق كيىمدەرىمىزدى كەڭىنەن ناسيحاتتاۋ. تەك ناسيحاتتاۋ ەمەس, ونى كۇندەلىكتى ومىردە كيىپ ءجۇرۋ. ءدىني باسقارمانىڭ قولعا الىپ وتىرعان ءىسى كەشەگى جوعالتقان قۇندىلىقتاردى قايتا جانداندىرۋدىڭ, مۇسىلماندىق پارىزىمىزدى ورىنداۋدىڭ ارەكەتى. وسى شارا ارقىلى يمانىن ويلاعان اياۋلى قاراكوزدەردىڭ كيىم جايلى ماسەلەلەرىن شەشۋگە ۇلەس قوسقان بولساق, ماقساتىمىزدىڭ ورىندالعانى, – دەدى باس ءمۇفتي سويلەگەن سوزىندە.
اۋرەت جەرلەردى قىمتاپ ۇستاۋ, شاريعاتقا ساي كيىنۋ بەلگىلى ءبىر اعىمنىڭ بەلگىسى ەمەس. ادامعا ناماز وقۋ, ورازا ۇستاۋ قانداي بۇيرىق بولسا, قۇراننىڭ تالابىنا ساي كيىنۋ دە ءدال سونداي بۇيرىق ەتىلگەن. ەندەشە, ءدىني باسقارما باستاپ, ەلىمىزدىڭ بەتكە ۇستار ءىرى كومپانيالارى قولداپ, ايتۋلى ازاماتتارىمىز قازىلىق ەتكەن بۇل بايقاۋدىڭ قازاققا بەرەرى كوپ. ولاي بولسا, بۇل بايقاۋعا ەكى جۇزگە تارتا كيىم ۇلگىسى قاتىسىپ, سونىڭ الپىسى ىرىكتەلىپ الىنعانىن دا ايتا كەتسەك دەيمىز. ەڭ عاجابى, جاڭا ۇلگىدە جيناقى ەتىپ تىگىلگەن, ۇلتتىق ناقىشقا باي كيىم ۇلگىلەرىن كيگەن قىزدار لەگى ساحنا تورىنە كوتەرىلگەندە جيىلعان كوپشىلىك ءبىر جاعى قۋانىشتان, ءبىر جاعى ۇلتتىق ماقتانىشتان بولار, تولاسسىز قول سوعۋمەن بولدى.
قازىلاردىڭ تالابىنان ءسۇرىنبەي ءوتىپ, كورەرمەننىڭ ءىلتيپاتىنا بولەنگەن ۇزدىك كيىم ۇلگىسى رەتىندە باس بايگەنى «ەركە نۇر» ءسان تەاترى ۇسىنعان «قاراكوز» ءساندى كيىم ۇلگىلەرى توپتاماسى جەڭىپ السا, ءبىرىنشى ورىن گۇلجان رىسبەكوۆاعا, ەكىنشى ورىن عاليا قايداۋىلقىزى مەن ءزۇلفيا اقاتاەۆاعا بۇيىردى. ال ءۇشىنشى ورىنعا توعجان رىمباەۆا, مايرا احمەتوۆا, نازگۇل سەمعاليەۆالار يە بولدى. بەس ىنتالاندىرۋ ءجۇلدەسى مەن دەمەۋشىلەردىڭ ارناۋلى سىيلىقتارى جاس ديزاينەرلەر ايشا كەڭەسباي, دينارا پارمانوۆا, ينديرا بىرتۋباەۆا, گۇلقايشا, دوسجان, فاتيما بيزاقوۆالاردىڭ ەنشىسىنە بۇيىردى.
كيىم كيۋدىڭ دە ونەر ەكەندىگىن, ءار ۇلتتىڭ بەت-بەينەسى مەن ءمادەنيەتىنىڭ كەلبەتى ەكەنىن تانىتقان بۇل بايقاۋدان تۇيگەنىمىز, جاھاننىڭ تۇكپىر-تۇكپىرىندە ءار ءتۇرلى ۇلتتار مۇسىلمان ءدىنىن ۇستانىپ, شاريعي تالاپتارعا ساي كيىنگەنىمەن, ءار ۇلت ءوزىنىڭ ۇلتتىق رەڭىن جوعالتپاعان كەزدە عانا ەلىكتەپ-سولىقتاۋدان ازات, شىنايى مۇسىلمان ەكەندىگىن پاش ەتەتىندىگىنە جۇرتتىڭ كوزى جەتىپ, كوڭىلى سەندى دەۋگە بولادى. ءيا, قارا ءتۇستى ماتادان تىگىلىپ, تەك كوزدى عانا اشىق قالدىراتىن كيىم ۇلگىلەرى قاسيەتتى قۇراندا پارىز ەتىلمەگەنىنە بۇل شارا بارشانىڭ كوڭىلىن وياتىپ, كوزىن اشتى دەۋگە بولادى.
بايقاۋدىڭ قورىتىندى كەشىندە قازاق ەستراداسىنىڭ جۇلدىزدارى قانات, ايتكۇل قۇدايبەرگەنوۆتەر, «سەرىلەر», «جىگىتتەر» توبى جانە باسقا دا ونەرپازدار جىردان شاشۋ شاشتى. بالۋان شولاق سپورت سارايىنا جيىلعان كوپشىلىك بۇل شارا كەلەر جىلى دا ءوز جالعاسىن تابادى دەگەن سەنىممەن تارقاستى.
قانات ەسكەندىر.
الماتى.
سۋرەتتەردى تۇسىرگەن ازامات قۇسايىنوۆ.
