بۇل شارالار ۇكىمەتكە مەملەكەتتىك قىزمەتتەردى قىسقارتۋ ەسەبىنەن ىقشامدالا تۇسۋگە مۇمكىندىك بەرەدى. جوسپارلانىپ وتىرعان مەملەكەتتىك ورگانداردىڭ باقىلاۋ جانە قاداعالاۋ قىزمەتتەرىنىڭ سانىن قىسقارتۋ جونىندە مالىمدەگەن ۇلتتىق ەكونوميكا ۆيتسە-ءمينيسترى سەرىك جۇمانعارين قوسارلانۋىنا جانە تيىمدىلىگىنىڭ بولماۋىنا بايلانىستى 114 باقىلاۋ سالاسىنىڭ 24-ءىن جانە 18 قاداعالاۋ سالاسىنان 3-ەۋىن جويۋ جوسپارلانىپ وتىرعاندىعىن العا تارتادى. ونىڭ تۇسىندىرۋىنشە, قوسارلاناتىن جانە مەملەكەت پەن تۇتىنۋشىنىڭ قاۋىپسىزدىگىنە قاتەر توندىرمەيتىن مەملەكەتتىك ورگانداردىڭ 540 باقىلاۋ جانە قاداعالاۋ قىزمەتتەرى جاقىن كۇندەرى جويىلاتىن كورىنەدى.
«سايكەسىنشە اكىمشىلىك قۇقىق بۇزۋشىلىق تۋرالى كودەكستىڭ 30 بابى بويىنشا اكىمشىلىك ىستەردى قوزعاۋعا وكىلەتتى ورگانداردىڭ قۇزىرەتى مەن باپتارى جويىلادى. سونداي-اق, باسقا ورگاندارعا باس پروكۋرور, ونىڭ ورىنباسارلارى, وبلىس, رەسپۋبليكالىق ماڭىزداعى قالالار, استانا پروكۋرورلارىنىڭ دەڭگەيىنە دەيىن تەكسەرۋ جۇرگىزۋگە تاپسىرما بەرۋ قۇقىعىنا يە پروكۋراتۋرا ورگاندارى تۇلعالارىنىڭ تىزبەسى قىسقارتىلاتىندىعىن دا اتاپ ايتۋ قاجەت», دەيدى ول.
ال ەندى بۇگىنگى تاڭدا قىزۋ تالقىلانىپ جاتقان كاسىپكەرلىك جانە كاسىبي ورتادا ءوزىن ءوزى رەتتەۋ ينستيتۋتىن دامىتۋ جايى قالاي بولادى جانە بۇل ينستيتۋت كاسىپكەرلەرگە نە بەرەدى دەگەن ماسەلەگە كەلسەك, ونىڭ ءمانىسى مىناداي نەگىزدە جۇزەگە اسىرىلۋدا.
ايتالىق, وسى كۇنى مەملەكەت كوپتەگەن قىزمەتتەرگە يە جانە ولاردىڭ بىرقاتارىن كاسىپكەرلىك ورتاعا دەربەس رەتتەۋگە بەرۋدىڭ تەتىكتەرى قاراستىرىلۋدا. بۇل بيزنەستىڭ ولار رەتتەيتىن كاسىپكەرلىك قىزمەت سالاسىنداعى دەربەس شەشىمدەر قابىلداۋعا قاتىسۋى ماقساتىندا جاسالادى. سونىمەن بىرگە, مەملەكەت بەلگىلى ءبىر قىزمەتتەردى كاسىپكەرلەردىڭ بىرلەستىكتەرىنە بەرۋ كەزىندە بيزنەستى رەتتەمەيدى دە باقىلامايدى دا. بۇل قىزمەتتەردى بيزنەستىڭ ءوزى وسىنداي بىرلەستىكتەر تۇرىندە جۇزەگە اسىرادى. دەمەك, مەملەكەتكە كاسىپكەرلەردىڭ بۇل بىرلەستىكتەرىنىڭ قىزمەتىنىڭ زاڭدىلىعىن باقىلاۋ عانا قالادى دەگەن ءسوز.
ماماندار ەلدەگى كاسىپكەرلىك سالانى رەتتەۋدىڭ مۇنداي ءادىسى ء«وزىن ءوزى رەتتەۋ» زاڭىنا دا ساي كەلەتىندىگىن ايتادى. سەبەبى, اتالعان زاڭدا ءوزىن ءوزى رەتتەۋدىڭ ەكى ءتۇرى قاراستىرىلعان: ەرىكتى جانە مىندەتتى. وسى جەردە ايرىقشا اتاپ وتەرلىك جايت, ەرىكتى ءوزىن ءوزى رەتتەۋ تەتىگى مەملەكەتتىك رەتتەۋمەن قاتار ارەكەت ەتسە, ال مىندەتتى مەملەكەتتىك ورگاندار ورىندايتىن بەلگىلى ءبىر دەڭگەيدەگى سالالىق قىزمەتتەردى رەتتەۋ زاڭ نەگىزىندە جۇزەگە اسىرىلاتىن بولادى.
