– مەملەكەت ءتۇرلى زاڭسىزدىقتارمەن كۇرەستە كومەككە كەلەتىن ء«تورتىنشى بيلىك» وكىلدەرىنە قولداۋ كورسەتۋگە ىنتالى. «جۋرناليستىك ەتيكا» نورماسى – وبەكتيۆتىلىك, زاڭدىلىق, شىنايىلىق, ازاماتتاردىڭ جەكە ءومىرىن, ار-نامىسىن,ابىرويىن قۇرمەتتەۋگە نەگىزدەلگەن. اتالعان پۋنكت ورىندالماعان جاعدايدا جازاعا تارتىلمايدى. سوعان قاراماستان, كەيبىر باق وكىلدەرى بۇل نورمانى زاڭعا ەنگىزۋدىڭ قاجەتى جوق دەپ ءجۇر. ءبىز ولاي سانامايمىز, – دەگەن داۋرەن اباەۆ اتالعان نورمانى ىسكە اسىرۋدىڭ ماڭىزىنا توقتالىپ ءوتتى.
– نەگە دەسەڭىز, بىلتىر الماتىدا وتكەن تەرراكت كەزىن ەسكە الايىق. قالانى جالعىز تەرروريست باسىپ الدى. ساناۋلى مينۋتتاردا-اق قانشاما داقپىرت تارادى. وسىنىڭ كەسىرىنەن كەي بۇقارالىق اقپارات قۇرالدارىندا تەكسەرىلمەگەن اقپاراتتار جاريالانىپ جاتتى. بۇل جاعداي كاسىبي قادامعا جاتپايدى. جۋرناليستىك ەتيكا پرينتسيپتەرىن اسا كۇشەيتۋ قاجەت. وسى تۇرعىدان كەلگەندە بۇل ەڭ ەلدىمەن جۋرناليستەردىڭ بەدەلىن ارتىرۋعا ارنالعان قادام, – دەيدى مينيستر.
ءمينيستردىڭ ايتۋىنشا, سوڭعى جىلدارى مەملەكەتتىك ۇيىمدارعا جۋرناليستەر تاراپىنان تۇسەتىن ءوتىنىش ون ەسەگە ارتقان. «باق تۋرالى» زاڭعا ەنگىزىلگەن تۇزەتۋلەردىڭ ءبىرى مەملەكەتتىك ورگانداردىڭ جۋرناليستەردىڭ ساۋالىنا 15 كۇن ىشىندە جاۋاپ قايتارۋىنا قاتىستى بولاتىن. بۇل تۇزەتۋدىڭ انىق-قانىعىن مينيستر بىلايشا ءتۇسىندىردى:
«ۋاقىت از بولعانى سەبەپتى مەملەكەتتىك ورگاندار نەمقۇرايلى جاۋاپ بەرىپ جاتاتىنى راس. الەمدىك تاجىريبەنى ەسكەرە وتىرىپ, ساپانى قالىپقا كەلتىرۋ ماقساتىندا جاۋاپ بەرۋ مەرزىمىن 15 كۇنگە دەيىن ۇزارتۋدى ۇسىنىپ وتىرمىز. بۇل رەزونانس تۋدىراتىن ماسەلەلەرگە قاتىستى ەمەس. رەسمي حابارلاماعا بەرىلەتىن جاۋاپ مەرزىمىن 3 كۇننەن 2 كۇنگە قىسقارتتىق. ياعني, مەملەكەتتىك ورگان مالىمدەمە جاساعاندا, وسىعان قاتىستى جۋرناليست ساۋال جولداسا, ونىڭ جاۋابى ەكى كۇننەن كەشىكتىرىلمەي بەرىلۋى ءتيىس», دەدى ول.
ايا ءومىرتاي,
«ەگەمەن قازاقستان»
