كورولدىك ايەلدەرى تاريحتا العاش رەت كولىك جۇرگىزۋگە رۇقسات الدى. باسىلىمنىڭ حابارلاۋىنشا, بۇل اقپاراتتى ساۋد ارابياسىنىڭ سىرتقى ىستەر مينيسترلىگى دە راستاپ وتىر. مونارح بۇل شەشىم قوعامعا وڭ اسەر ەتەدى دەپ ويلايتىنىن ايتىپتى. بىراق جارلىقتا اۆتوكولىك جۇرگىزۋ شاريعات زاڭدارىنا ساي بولۋ كەرەكتىگى ايتىلعان.
سونداي-اق قۇجات بويىنشا ىشكى ىستەر, قارجى, ەڭبەك جانە الەۋمەتتىك دامۋ مينيسترلىكتەرىنىڭ قاتىسۋىمەن جوعارى دەڭگەيلى كوميتەت قۇرىلىپ, 30 كۇننىڭ ىشىندە كۋالىك بەرۋ ءتارتىبى قاراستىرىلاتىنى ايتىلعان.
"بۇل ساۋد ارابياسى ايەلدەرى ءۇشىن ۇلكەن جەڭىس. بۇل پروبلەمامەن ايەلدەر بىرنەشە جىل ەمەس, ءومىر بويى كۇرەسىپ كەلدى. ءتىپتى, ايەلدەرگە كولىك جۇرگىزۋ كەرەك ەمەس دەگەن دە ويلار ايتىلدى", دەيدى ساۋد ارابياسى شۋرا كەڭەسىنىڭ مۇشەلەرى.
بۇۇ باس حاتشىسى انتونيو گۋتەررەش بۇل شەشىمدى قولدايتىنىن ءبىلدىردى. ول ءوزىنىڭ تۋيتتەردەگى پاراقشاسىندا "ساۋد ارابياسىنىڭ ايەلدەرگە كولىك جۇرگىزۋ قۇقىعىن بەرگەنىن قولدايمىن. بۇل دۇرىس باعىتتاعى ماڭىزدى قادام", دەپ جازدى.
وسى كۇنگە دەيىن ساۋد ارابياسىندا ايەلدەردىڭ كولىك جۇرگىزۋىنە تىكەلەي تىيىم بولماسا دا, ولارعا جۇرگىزۋشى كۋالىگى بەرىلمەدى.
ەستەرىڭىزگە سالا كەتسەك, ساۋد ارابياسىندا 2011 جىلدان باستاپ ايەلدەر قۇقىعى بويىنشا وزگەرىستەر ەنگىزىلە باستادى. سول كەزدە ابداللا اتتى كورول ايەلدەرگە شۋراعا, ياعني كورولدىك ۇكىمەتىندەگى كەڭەس ورگانىنا سايلانۋعا رۇقسات بەردى. ودان كەيىن 2012 جىلى ايەلدەر العاش رەت وليمپيادا ويىندارىنا قاتىسسا, 2015 ءجىلى مۋنيتسيپالدى سايلاۋعا قاتىسۋ قۇقىعىن يەلەنگەن بولاتىن.
گۇلنۇر قۋانىشبەكقىزى,
"ەگەمەن قازاقستان"
