جيىن بارىسىندا قازاق جازۋىن لاتىن الىپبيىنە كوشىرۋگە وراي, ونىڭ الەۋمەتتىك-ەكونوميكالىق جانە ساياسي نەگىزى, قازاق قوعامىنداعى كيريلل ءالفاۆيتىنىڭ اتقارعان ءرولى, لاتىنعا وتۋدەگى ۇيىمدىق جانە تەحنيكالىق شارالار, لاتىن الفاۆيتىنە كوشۋدەگى وزگە ەلدەردىڭ تاجىريبەسى سىندى بىرقاتار تاقىرىپتار قوزعالدى.
ء«الفاۆيتتى وزگەرتۋ – قوعام ءۇشىن اۋقىمدى دا ماڭىزدى ماسەلە, ۇستىمىزدەگى عاسىردا, قازىرگى «ينتەللەكتۋالدىق تەحنولوگيا» زامانىندا, اسىرەسە وركەنيەتتى الەمنىڭ نەگىزگى عىلىمي-تەحنيكالىق, باسقا دا اقپاراتتى اعىلشىن تىلىندە پايدالاناتىن كەزەڭىندە قوعامداعى وراسان زور ماڭىزدى شارا. وسىعان وراي بەلگىلى عالىمدار مەن ساراپشىلار جانە جالپى جۇرتشىلىق تاراپىنان قازاق گرافيكاسىن لاتىن الپبيىنە كوشىرۋدىڭ تاعدىرلى شەشىمى جان-جاقتى تالقىلانۋى ءتيىس. لاتىن جازۋى عاسىرلار بويى قۇنىن جوعالتپاي كەلەدى. الەم تۇرعىندارىنىڭ 80 پايىزدان استامى لاتىن قارپىن پايدالانادى. الەمدەگى اقپاراتتاردىڭ 70 پايىزى لاتىن ارپىندە باسىلادى. ءالىپبيدى وزگەرتۋ –قوعامىمىزدىڭ جان جاقتى دامۋىنا تۇرتكى بولاتىن تاريحي شەشىم», دەدى قر بعم عك فيلوسوفيا, ساياساتتانۋ جانە ءدىنتانۋ ينستيتۋتىنىڭ ديرەكتورى, ساياسي عىلىمدارىنىڭ دوكتورى, پروفەسسور اقان بيجانوۆ.
كەزدەسۋدە قازاقستان حالىق اسسامبلەياسى توراعاسىنىڭ ورىنباسارى, «يرنىحاس» وسەتين مادەني-اعارتۋ ورتالىعىنىڭ توراعاسى كازبەك مامسۋروۆ, قر بعم عك فيلوسوفيا, ساياساتتانۋ جانە ءدىنتانۋ ينستيتۋتىنىڭ اعا عىلىمي قىزمەتكەرى, فيلوسوفيا عىلىمدارىنىڭ دوكتورى, پروفەسسور رۇستەم قادىرجانوۆ, فيلوسوفيا عىلىمدارىنىڭ كانديداتى جازيرا وشاقباەۆالار وزەكتى ماسەلەگە وراي قازاق جازۋىن لاتىن الىپبيىنە كوشىرۋ جونىندەگى عىلىمي ۇسىنىستارىن ورتاعا سالدى.
پروفەسسور رۇستەم قادىرجانوۆ لاتىن قارپىنە قاتىستى پىكىرىن بىلدىرە كەلە: ء«الىپبيدى اۋىستىرۋ – كۇردەلى الەۋمەتتىك-ساياسي پروتسەسس. ويتكەنى ول وسى مەملەكەتتە ءومىر ءسۇرىپ وتىرعان ءاربىر ادامعا قاتىستى ماسەلە, ءاربىر ادامنىڭ مادەني كودىنىڭ الداعى ۋاقىتتا رۋحاني تۇردە جاڭعىرۋى, وزگەرۋى دەگەندى بىلدىرسە كەرەك. تاۋەلسىزدىك العان ۋاقىتتان بەرى ءالسىن-ءالسىن كوتەرىلىپ, قوعام اراسىندا جاقتاۋشىلار مەن قارسى ءۋاج ايتۋشىلاردىڭ ايتىس-تارتىسىنا ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىنداعى لاتىن قارپىنە كوشۋ تۋرالى باستاماسى اقىرعى نۇكتەسىن قويدى. ەندىگى ماسەلە – قازىرگى ۇسىنىلىپ جاتقان ءالىپبي نۇسقالارىنىڭ ىشىندەگى ەڭ وڭتايلى, حالقىمىزدىڭ تىلدىك, ۇندىك ەرەكشەلىكتەرىن تولىعىمەن وتەپ, تولىعىمەن جەتكىزە الاتىن ءتۇرىن تاڭداي ءبىلۋ. ول ءۇشىن البەتتە, ۇلكەن جۇك, ۇلكەن سىن ەڭ الدىمەن عالىمدارعا تۇسەتىنى انىق» دەدى.
ءىس-شاراعا «عىلىم ورداسى» گۋمانيتارلىق ينستيتۋتتارىنىڭ عىلىمي قىزمەتكەرلەرى, قازاقستان حالقى اسسامبلەياسى عىلىمي-ساراپتاما توبىنىڭ مۇشەلەرى مەن قوعام وكىلدەرى قاتىستى.
ميرا بايبەك,
«ەگەمەن قازاقستان»
