نياز بىرنەشە جىل بۇرىن العان جاراقاتىنان ومىرتقاسىن زاقىمداپ, مۇگەدەك بولىپ قالعان ەدى. قازاقستاندىقتار وعان شەتەلدە وتا جاساتۋ ءۇشىن قارجى جيناپ بەرگەن. الايدا, مەديتسينالىق ورتالىقتىڭ ماماندارى وتانى تەگىن جاساۋعا دايىن ەكەندىكتەرىن جەتكىزدى. سوندىقتان, ول بىرنەشە جىل بويى ەمىنە جينالعان 5 ميلليون 584 مىڭ تەڭگەنى ارۋجان ءسايننىڭ قايىرىمدىلىق قورىنا اۋداردى. بۇل قاراجات 2 جاسار سوفيا برۋسەنسكايانىڭ سەۋلدە الىپ جاتقان ەمىنە جانە باسقا دا ناۋقاس بالالاردىڭ قاجەتىنە جۇمسالدى.
نيازدىڭ ەرلىگىن باتىرلىققا بالاعان قازاقستاندىقتار قايىرىمدىلىق كونتسەرتتەر ۇيىمداستىرىپ, ونىڭ ەمىنە كومەك كورسەتۋ ماقساتىندا بانكتە ەسەپشوتتار اشتى. بۇگىنگى تاڭدا مۇمكىندىگى شەكتەۋلى بالالار ءۇشىن ۇيىمداستىرىلاتىن شارالارعا قولداۋ كورسەتىپ كەلە جاتقان جومارت جىگىتتىڭ اياققا تۇرۋىنا تىلەكشى, ماتەريالدىق ءارى رۋحاني كومەك كورسەتىپ جۇرگەن جاندار بارشىلىق.
«مەنىڭ ماقساتىم دا, تىلەگىم دە – دەنساۋلىق. وسى ورايدا قازاقستاندىقتار ماعان كوپ قولداۋ كورسەتەدى, بۇل – شىن مانىندە قوعامعا كەرەك ەكەنىمدى بىلدىرەدى», دەيدى ول.
سونداي-اق, ول قيىن جاعدايعا تاپ بولعان ادامدارعا كومەكتەسكەنى ءۇشىن قاراعاندى وبلىسى اكىمىنىڭ «قاينار» جاستار سىيلىعىنىڭ جەڭىمپازى اتاندى.
بۇگىندە قاراعاندى قالاسىنىڭ تۇرعىنى شاھارداعى دوسى كوپ جاستىڭ ءبىرى. مۇگەدەكتەر ارباسىنا تاڭىلعانىنا قاراماستان, ەرتەڭىنە مول ۇمىتپەن قارايدى.
نيازدىڭ ايتۋىنشا, بارلىق قيىندىقتارعا مويىماي, اينالاعا جىلۋ شاشىپ, ادامداردىڭ قۋانىشتى ءتۇرىن كورۋدەن اسقان باقىت جوق. ءوز جۇرەگىڭنىڭ قالاۋىمەن جۇرسەڭ, بار جاقسىلىقتى كەيىنگە قالدىرۋعا بولمايتىنىن تۇسىنەسىڭ. ال جاقسىلىق, قاراپايىم سوزبەن ايتقاندا, كوڭىل ءبولۋ مەن مەيىرىمنەن تۇرادى. ادام ءومىرى قىسقا, سوندىقتان اركىم ءوز ءومىرىن لايىقتى وتكىزۋ ءۇشىن قايىرىمدى بولعانى دۇرىس.
ميراس اسان,
«ەگەمەن قازاقستان»
قاراعاندى وبلىسى
