– گريگوري الەكساندروۆيچ, ستۋدەنتتەر اراسىندا وتكەن ويىنداردان ءبىزدىڭ قۇراما بيىكتىككە سەكىرۋدەن سەرگەي گريگورەۆ ەنشىلەگەن ءبىر كۇمىس مەدالمەن ورالدى. تايبەي ستاديونىنداعى سپورتشىلاردىڭ باسەكەلەستىگى قالاي ءوربىدى؟
– يا, ۋنيۆەرسيادا جارىسىندا بىزگە ءبىر مەدال عانا بۇيىردى جانە بىرقاتار سپورتشىلارىمىز ۇزدىك وندىقتارعا ءىلىندى. فينالعا شىققان سپورتشىلارىمىز از بولمادى, الايدا ماراپات مىنبەرىنە كوتەرىلۋ باقىتى تەك سەرگەي گريگورەۆكە بۇيىردى. ول تايبەيدە جاقسى ناتيجە كورسەتتى, جەڭىسكە جەتۋگە دە مۇمكىندىگى بار ەدى. وزگە سپورتشىلارىمىز تۋرالى ايتاتىن بولساق, بارلىعى سوڭىنا دەيىن بار كۇشىن سالىپ, جۇلدە ءۇشىن تالاستى. بۇل سپورت, ۇدايى جەڭىسكە جەتە بەرۋ مۇمكىن ەمەس. ايەلدەر اراسىنداعى 100 مەترگە 4 قايتارا جۇگىرۋ ەستافەتاسى كوڭىلگە قاياۋ ءتۇسىردى. قىزدارىمىز جاقسى ناتيجە كورسەتتى, وزدەرىنىڭ مىقتى ەكەندەرىن دالەلدەدى. الايدا, ءبىر سپورتشىمىزدىڭ كورشى جولاقتى باسىپ كەتكەنى ءۇشىن بۇكىل قۇراما جارىستان شەتتەتىلدى. ەكىنشى بولىپ كەلگەن شۆەيتساريا قۇراماسى ارىز جازدى, ءبىز قارسى تۇرۋعا بارىمىزدى سالدىق, ەرەجەنىڭ اتى ەرەجە. قالاي بولعاندا دا, بۇل جارىس ءبىز ءۇشىن ۇلكەن تاجىريبە بولدى.
– جارىستا جەڭىسكە جەتكەن سپورتشىلاردىڭ ناتيجەلەرىنە قاراساق, ۋنيۆەرسياداداعى باسەكەلەستىك جوعارى بولعان سەكىلدى...
– تايبەيگە لوندونداعى الەم چەمپيوناتىنا قاتىسقان سپورتشىلار باردى, جارىستىڭ كەي تۇرلەرىندە وتە جاقسى ناتيجەلەر كورسەتىلدى. مىسالى, نايزا لاقتىرۋ بويىنشا التىن مەدال العان چاو-تسۋن چەننىڭ كورسەتكىشى الەمدىك بىرىنشىلىكتىڭ جەڭىمپازى, نەمىس يوحانەسس فەتتەردىڭ ناتيجەسىنەن دە اسىپ كەتتى. ۋنيۆەرسياداداعى جەڭىل اتلەتيكا بويىنشا وتكەن تۋرنير قۇرامى بويىنشا ەڭ مىقتى بولدى, جارىس جوعارى دەڭگەيدە ءوتتى.
– ءبىزدىڭ اتلەتتەردىڭ كورسەتكىشتەرىنە ىستىق اۋا-رايى اسەر ەتۋى مۇمكىن بە؟
– ولاي دەۋگە بولا قويماس. بارلىعىنا ورتاق جاعداي جاسالدى عوي, وعان قوسا كەيدە جارىس كەزىندە جاڭبىر جاۋىپ, كەيبىر ستارتتار شەگەرىلىپ تە جاتتى. بىراق, ۋنيۆەرسياداعا دايىندىق كەزىندە قازاقستاندا اپتاپ ىستىق بولدى, الەم چەمپيوناتىندا ونەر كورسەتپەگەن قۇرامانىڭ جارتىسى تولىققاندى جاتتىعۋ جۇمىستارىن وتكىزە المادى. مىسالى, يادرو لاقتىرۋشى يۆان يۆانوۆ كەيبىر جاتتىعۋلار كەزىندە 40 گرادۋس ىستىق بولعانىن, سونىڭ سالدارىنان دۇرىس بابىنا كەلە الماعانىن ايتتى. وكىنىشكە وراي, سپورتشىلارىمىز ءۇشىن ورتاق دايىندىق وتكىزۋگە مۇمكىندىك بولمادى. بۇل دا كورسەتكىشتەرگە ءوز اسەرىن تيگىزدى.
– تايبەيدەن ورالا سالا ءبىزدىڭ قۇراما كەلەسى ءىرى جارىسقا دايىندىق جۇمىستارىن باستاپ كەتتى. 17 قىركۇيەكتە اشىلاتىن اشحابادتاعى ازيا ويىندارىنان نە كۇتەسىزدەر؟
– تۇركىمەنستان استاناسىندا قازاقستان 15 اتلەتپەن سىنعا تۇسپەك, ولاردىڭ ساپىندا بارلىق مىقتى سپورتشىلارىمىز بار. ۋنيۆەرسيادادان كەيىن اتلەتتەرىمىز جاقسى ونەر كورسەتۋگە تالپىنىپ ءجۇر دەپ بىلەمىن. ازيادا وزدەرىنىڭ ۇزدىك ەكەندىكتەرىن دالەلدەيدى دەپ سەنەمىن. قازىر قارقىندى تۇردە جاتتىعۋ جۇمىستارى ءجۇرىپ جاتىر. الدىن-الا بولجام جاساعىم كەلمەيدى, الايدا, سوڭىنا دەيىن كۇرەسەمىز. ۆ. زيابكينا, و. سافرونوۆامەن بىرگە م. يشانگۋليەۆا, ە. ميحينا قاتىساتىن 400 مەترگە 4 قايتارا جۇگىرۋ بويىنشا ايەلدەر ەستافەتاسى قىزىق بولادى دەپ ويلايمىن. يشانگۋليەۆا 800 مەتر قاشىقتىقتا دا ءوز باعىن سىنايدى.
– ءبىزدىڭ الدىڭعى قاتارلى جەڭىل اتلەتىمىز ولگا رىپاكوۆا جاقىندا عانا «گاۋھار ليگادا» ۇزدىك ونەر كورسەتىپ, ەندى اشحابادتا ءۇش قارعىپ جانە ۇزىندىققا سەكىرۋدەن باق سىناماقشى, سولاي ما؟
– ازيا ويىندارىنىڭ ۇيىمداستىرۋشىلارىنا ءوتىنىش جولداي وتىرىپ ءبىز ونى ەكى ديستسيپلينا بويىنشا قاتىسادى دەپ جازدى. الايدا, ءبارى سول جەردە بەلگىلى بولادى. ونىڭ ءوزىن قالاي سەزىنۋىنە بايلانىستى, سوڭعى ءسوز ولگانىڭ وزىندە.
– قۇراما اشحابادقا قاشان اتتانادى؟
– قىركۇيەكتىڭ 15 كۇنى, ال جارىس ءۇش كۇن بويى وتەدى – 18-20 ارالىعىندا. اشحابادتاعى ازيا ويىندارى ءۇشىن ارنايى جابىق ارەنا سالىندى. ول بىزگە ساتتىلىك اكەلەدى دەپ ويلايمىن.
