ويىننىڭ ءبىرىنشى كەزەڭىندە استانانىڭ «بارىسى» 2:0 ەسەبىمەن العا شىققان بولاتىن. ماتچتىڭ سەگىزىنشى مينۋتىندا ليندەن ۆەي اسىرعان شايبانى نايدجەل دوۋس قاقپاعا ەنگىزدى. ال ارادا ەكى مينۋت وتكەندە ماكسيم سەمەنوۆ ەسەپتى 2:0-گە جەتكىزدى.
ەكىنشى كەزەڭنىڭ ورتا تۇسىنا جاقىنداعاندا الاڭ يەلەرى ەسەپتى تەڭەستىرىپ كەتتى. 26-شى مينۋتتا «سالاۆات يۋلاەۆ» ويىنشىسى يووناس كەمپپاينەن ەسەپ ايىرماسىن قىسقارتسا, ارادا ءبىر مينۋت وتكەندە قاقپامىزعا ەكىنشى گول ەندى. گول اۆتورى – ارتەم فەدوروۆ. وسىلايشا, ەكىنشى كەزەڭ 2:2 ناتيجەسىمەن تەڭ اياقتالدى.
ەكى كوماندا ءۇشىنشى 20 مينۋتتىق كەزەڭدى الما-كەزەك شابۋىلمەن باستادى. ويتكەنى, قاي كلۋب ءبىرىنشى گول سوقسا, جەڭىس سول كوماندانىڭ ەنشىسىندە كەتەتىن ەدى. ماڭىزدى ۇپاي ءۇشىن بارىن سالعان «سالاۆات يۋلاەۆ» حوككەيشىلەرى قاقپامىز ماڭىندا بىرنەشە قاۋىپتى شابۋىل جاساپ, 50-ءشى مينۋتتا ءوز دەگەندەرىنە جەتتى. تەەمۋ حارتيكاينەن گول سوعىپ, كومانداسىن العا شىعاردى. وسى گولدان كەيىن ۋفالىقتار وزدەرىن مەرزىمىنەن بۇرىن جەڭىسكە جەتەتىندەرىنە شامادان تىس سەنىم ارتىپ, بوساڭسىپ كەتتى. قارسىلاستارىنىڭ ەركىنسىپ كەتكەنىن سەزگەن «بارىس» حوككەي كلۋبى سوڭعى ءبىر مينۋتتا قاتارىنان ءۇش شايبا سوعىپ, «سالاۆات يۋلاەۆتان» جەڭىستى ج ۇلىپ اكەتتى. العاشىندا نايدجەل دوۋس ەسەپتى تەڭەستىرسە, مارتەن سەن-پەر ەلوردا كلۋبىنا جەڭىس سىيلادى. ال وسى ويىندا ءۇشىنشى گولىن سوققان دوۋس «بارىستىڭ» جەڭىسىن ايقىنداي ءتۇستى. قورىتىندى ەسەپ – 5:3.
«بارىس» كلۋبىنىڭ سىرت الاڭداعى جەڭىسى رەسەيلىك باق-تىڭ نازارىنان تىس قالمادى. Sports.ru باسىلىمى «جەڭىپ تۇرعان ماتچتىڭ سوڭعى 46 سەكۋندىندا قالاي جەڭىلۋگە بولادى؟», دەپ تاقىرىپ قويسا, «چەمپيونات» سايتى «بارىستىڭ» جەڭىسىن فانتاستيكا دەپ باعالادى.
قۇرلىقتىق حوككەي ليگاسىندا التى ويىن وتكىزگەن قازاقستاندىق كوماندا شىعىس ايماعى بويىنشا 13 ۇپايمەن ءۇشىنشى ورىندا كەلە جاتىر. جەتى ماتچتان كەيىن «كۋنلۋن رس» كلۋبى 14 ۇپايمەن توپ باستاپ تۇر. «بارىستىڭ» ەنشىسىندە ءتورت جەڭىس جانە ەكى جەڭىلىس بار.
ايتا كەتەيىك, «بارىس» حوككەي كلۋبى كەلەسى ماتچىن ەرتەڭ سىرت الاڭدا ريگادا جەرگىلىكتى «دينامو» كومانداسىنا قارسى وتكىزەدى.
ءالي بيتورە,
«ەگەمەن قازاقستان»
