جيىنعا يسلام-كۋك اندەركارتىندا كەزدەسۋ وتكىزەتىن بارلىق قازاقستاندىق بوكسشىلار مەن ولاردىڭ قارسىلاستارى قاتىستى. سونداي-اق, برەندون كۋك پەن ونىڭ جاتتىقتىرۋشىسى مايك گايەت, پروموۋتەرى تايلەر براكستون دا كەلدى.
قازاقستاندا ەكىنشى رەت جەكپە-جەك وتكىزەيىن دەپ جاتقان قانات يسلام الداعى كەزدەسۋگە دايىن ەكەنىن ايتتى. «ەلوردادا تۇڭعىش رەت كەزدەسۋ وتكىزبەكپىن. 9-شى قىركۇيەك كۇنى شارشى الاڭعا شىعاتىن بوكسشىلاردىڭ بارلىعى تاۋەلسىز ەلدىڭ ەر-ازاماتتارى. ماقساتىمىز - ەلگە جەڭىس سىيلاۋ, قازاق بوكسشىلارىنىڭ مىقتى ەكەنىن بۇكىل الەمگە تانىتۋ», دەدى ول.
ال كانادالىق بوكسشى برەندون كۋك قازاقستانعا تەك جەڭىس ءۇشىن كەلگەنىن ايتادى. ول وزگە ەلدە العاش رەت جەكپە-جەك وتكىزەيىن دەپ جاتسا دا, بۇل جەڭىسكە جەتۋىمە ەش كەدەرگى كەلتىرمەيدى دەيدى. «مەن نەگىزى قازاقستانعا جوسپارلانعان ۋاقىتتان ءۇش كۇن ەرتە كەلىپ الدىم. ۋاقىتتىق بەلدەۋگە, اۋا رايىنا تەز ۇيرەنىسىپ كەتتىم. قاناتتىڭ جەكپە-جەكتەرىن قاراپ شىقتىم. بىراق, قازىر سىزدەرگە ول تۋرالى ەشتەڭە ايتا المايمىن. ءبارىن شارشى الاڭ كورسەتەدى. بۇل مەنىڭ سىرت ەلدەگى العاشقى كەزدەسۋىم. مەن ەلدەرىڭىزگە تەك جەڭىس ءۇشىن كەلدىم», دەيدى كۋك.
ايتا كەتەيىك, قانات يسلام مەن برەندون كۋك اراسىنداعى جەكپە-جەك 9-شى قىركۇيەك كۇنى استاناداعى «سارىارقا» ۆەلوترەگىندە وتەدى. سونداي-اق, بۇل كەشتە قاناتتان باسقا سەگىز بوكسشىمىز جۇدىرىقتاسادى. ولار: مەيىرىم نۇرسۇلتانوۆ, جانحوش تۇراروۆ, جانىبەك ءالىمحان ۇلى, ايدوس ەربوسىن ۇلى, ءالي احمەدوۆ, ديماش نيازوۆ, رۋسلان مىرساتاەۆ جانە نۇرسۇلتان جاڭاباەۆ.
