اتالمىش كەشەندە ءۇش زال جۇمىس اتقارادى. 160 كورەرمەنگە ارنالعان مىنبەرى بار امبەباپ ويىن زالىندا بوكس رينگى دە ورناتىلعان. كۇرەس زالى جانە ترەناجەرلىق زال بار. نىساننىڭ اۋماعى 1337 شارشى مەتر. بۇل عيماراتتا «شاحتەر» اۋىلىنىڭ تۇرعىندارى عانا ەمەس, كورشىلەس اۋىلداردىڭ سپورتقا قىزىعۋشىلىق تانىتقان بالالارى دا جاتتىعۋىنا بولادى. كەشەندە كۇنىنە 100-دەن اسا بالا بىرنەشە سەكتسيادا شەبەرلىكتەرىن شىڭدايدى. اتالمىش عيماراتتىڭ اشىلۋ سالتاناتىندا ءسوز سويلەگەن اۋدان اكىمىنىڭ ورىنباسارى م.تۇراروۆ ايتقانداي, ايتۋلى مەرەكە قارساڭىندا جاڭا كەشەننىڭ ىسكە قوسىلىپ جاتقانى – اۋدان تاريحىنداعى اسا ماڭىزدى وقيعا. بۇل قادام اۋىلدىڭ الەۋمەتتىك ينفراقۇرىلىمىن دامىتۋعا, تۇرعىنداردىڭ جاعدايىن جاقسارتۋعا زور مۇمكىندىك بەرەدى.
– وتكەن جىلى اتالعان اۋىلدا زامان تالابىنا ساي جابدىقتالعان كوكونىس قويماسى, ءجۇزۋ باسسەينى بوي كوتەرگەن ەدى. وسىنداي يگى ىستەر وبلىستىق ءماسليحاتتىڭ دەپۋتاتى, «وتان» وردەنىنىڭ يەگەرى گ.پروكوپ باسشىلىق ەتىپ وتىرعان «شاحتەرسكوە» سەرىكتەستىگىنىڭ ارقاسىندا جۇزەگە اسۋدا. ال اۋىلدىق جەردە دەنە شىنىقتىرۋ-ساۋىقتىرۋ كەشەنىن ىسكە قوسۋ ەلباسى نۇرسۇلتان ءابىش ۇلى نازارباەۆتىڭ «بولاشاققا باعدار: رۋحاني جاڭعىرۋ» ماقالاسىنداعى «تۋعان جەر» باعدارلاماسىن ءتيىمدى ىسكە اسىرۋ مەن ناعىز ءپاتريوتيزمنىڭ كورىنىسى بولىپ وتىر, – دەدى اكىمنىڭ ورىنباسارى.
سالتاناتتى شاراعا وبلىستىڭ دەنە شىنىقتىرۋ جانە سپورت باسقارماسىنىڭ باسشىسى ناتاليا سۋحورۋكوۆا, قازاقستان كاسىپوداقتار فەدەراتسياسىنىڭ توراعاسى ابىلعازى قۇسايىنوۆ, نۇرا اۋدانىنىڭ قۇرمەتتى ازاماتى داۋىلباي قۇسايىنوۆ ارنايى قاتىسىپ, ىزگى تىلەكتەرىن ءبىلدىردى. ابىلعازى قۇسايىنوۆ كاسىپوداقتار فەدەراتسياسىنىڭ اتىنان گ.پروكوپقا العىس حات تابىس ەتتى.
ميراس اسان,
«ەگەمەن قازاقستان»
قاراعاندى وبلىسى, نۇرا اۋدانى
