ينۆەستيتسيالار جانە دامۋ ءمينيسترى جەڭىس قاسىمبەك الداعى جىلىتۋ ماۋسىمىنا دايىندىق ماقساتىندا 2017-2018 جىلدارعا ارنالعان جۇمىستار جوسپارى بەكىتىلگەنىن ايتىپ ءوتتى. وعان سايكەس 15 قازانعا قاراي بارلىق نىسانداردى, سونىڭ ىشىندە دەربەس قازاندىقتار مەن ينجەنەرلىك جەلىلەردى دايىنداۋ جۇمىستارى تولىعىمەن اياقتالادى, سونداي-اق, بۇكىل دەربەس جىلۋ كوزدەرى وتىننىڭ نورماتيۆتىك قورىمەن قامتاماسىز ەتىلەدى.
قازىرگى تاڭدا ءبىلىم بەرۋدىڭ 11 139 نىسانى – جوسپار بويىنشا 100% جوندەلگەن. دەنساۋلىق ساقتاۋ نىساندارى بويىنشا 6 445 نىساندى جوندەۋ كوزدەلگەن بولاتىن, ولاردىڭ بۇگىندە 98%-ى دايىن. جوندەۋ جۇمىستارىن جۇرگىزۋ جوسپارلانعان 43 572 تۇرعىن ءۇيدىڭ 88,2%-ى دايىن.
جىلۋ كوزدەرى تۋرالى ايتار بولساق, جەرگىلىكتى اتقارۋشى ورگاندار 10 326 دەربەس قازاندىقتى جوندەۋدى جوسپارلاعان, ولاردىڭ 94,3%-ى ءازىر. قازىرگى كەزەڭگە جوسپارلانعان 2 113 شاقىرىم جىلۋ جەلىسىنىڭ 2 000 شاقىرىمى جوندەلگەن. بۇگىنگى تاڭدا الماتى, اتىراۋ جانە سولتۇستىك قازاقستان وبلىستارىنىڭ جىلۋ جەلىلەرى شامامەن 85%-عا دايىن. سۋمەن جابدىقتاۋ جەلىلەرىن ازىرلەۋ اياسىندا, جوسپارداعى 2 040 شاقىرىمنىڭ 87,6%-ىنا جوندەۋ جۇمىستارى جۇرگىزىلگەن.
وتىن ازىرلەۋ ماسەلەسى بويىنشا, دەربەس قازاندىقتاردىڭ وتىنعا دەگەن قاجەتتىلىگى الداعى ماۋسىمدا 1 227 مىڭ توننا كومىر مەن 122 مىڭ توننا مازۋتتى قۇرايدى. بۇگىنگى تاڭدا 1 070 مىڭ توننا كومىر (87,2%) جانە 63,6 مىڭ توننا مازۋت (52%) وندىرىلگەن.
ءبىلىم جانە عىلىم ءمينيسترى ەرلان ساعاديەۆ ءبىلىم جانە عىلىم مينيسترلىگى جەرگىلىكتى اتقارۋشى ورگاندارمەن بىرلەسىپ, ءبىلىم بەرۋ نىساندارىنىڭ الداعى جىلىتۋ ماۋسىمىنا دايىندىق جۇمىستارىنا مونيتورينگ جۇرگىزىپ جاتقانىن مالىمدەدى.
وبلىستاردىڭ جانە استانا مەن الماتى قالالارىنىڭ اكىمدىكتەرىنىڭ اقپاراتى بويىنشا جىلىتۋ ماۋسىمىنا 2 617 مەملەكەتتىك بالالار باقشاسى, 7 094 مەملەكەتتىك جالپى ءبىلىم بەرەتىن مەكتەپ, 473 كوللەدج جانە 130 جوعارعى وقۋ ورنى دايىن. ءبىلىم بەرۋ نىساندارى جىلىتۋ ماۋسىمىنا ازىرلىك بويىنشا اكتتەردى الدى.
دەنساۋلىق ساقتاۋ ءمينيسترى ەلجان ءبىرتانوۆ 2017-2018 جىلدارعا ارنالعان جىلىتۋ ماۋسىمىنا دايىندىق جۇمىستارى كوممۋنالدىق قىزمەتتەرمەن بەكىتىلگەن كەستەلەرگە سايكەس جۇرگىزىلىپ جاتقانىن ايتتى. بارلىق وڭىرلەردە دەنساۋلىق ساقتاۋ ۇيىمدارىن جىلىتۋ ماۋسىمىنا دايىنداۋ جۇمىستارى جۇرگىزىلىپ جاتىر .
رەسپۋبليكادا دەنساۋلىق ساقتاۋدىڭ 5 774 نىسانى (ارەندالىق جانە جەكەمەنشىك نىسانداردى ەسەپكە الماعاندا) جۇمىس ىستەيدى, ولاردىڭ: 822-ءسى ورتالىقتان جىلىتىلادى, 312-ءسى ەلەكترمەن, 3 815-ءسى قاتتى ءارى سۇيىق وتىنمەن جانە 825-ءى گاز جابدىعىمەن جىلىتىلادى.
جوندەۋ جانە دايارلاۋ جۇمىستارى, وتىن ساتىپ الۋ جانە جەتكىزۋ جۇمىستارى بەكىتىلگەن جوسپارعا سايكەس جۇرگىزىلىپ جاتىر. رەسپۋبليكالىق ماڭىزى بار 41 نىسان بويىنشا جىلىتۋ ماۋسىمىنا ورتاشا دايىندىق 98%-دى قۇرايدى, 37 نىسان ازىرلىك اكتىسىن الدى, 4 نىساندا جۇمىس جالعاستىرىلىپ جاتىر جانە ونى 30 قىركۇيەككە دەيىن اياقتاۋ كوزدەلگەن.
جەرگىلىكتى ماڭىزى بار 5 733 نىسان بويىنشا جاو مالىمەتىنە سايكەس, جىلىتۋ ماۋسىمىنا دايىندىق ورتا ەسەپپەن 92%-دى قۇرايدى. سونىمەن قاتار 11 وڭىردە جۇمىستار 90% جانە ودان جوعارى پايىزعا ورىندالعان. سونداي-اق, قر ۇكىمەتىنىڭ وتىرىسى كەزىندە اقمولا وبلىسىنىڭ اكىمى مالىك مىرزالين, پاۆلودار وبلىسىنىڭ اكىمى بولات باقاۋوۆ, سقو اكىمى قۇمار اقساقالوۆ, وقو اكىمى جانسەيىت تۇيمەباەۆ, قوستاناي وبلىسىنىڭ اكىمى ارحيمەد مۇحامبەتوۆ, استانا اكىمى اسەت يسەكەشەۆ, الماتى اكىمى باۋىرجان بايبەك جانە قاراعاندى وبلىسى اكىمىنىڭ ورىنباسارى اناتولي شكارۋپا ءسوز سويلەدى.
پرەمەر-مينيستر باقىتجان ساعىنتاەۆ جىلىتۋ ماۋسىمىنا دايىندىق جۇمىستارىن تۇراقتى باقىلاۋدا ۇستاۋدى, سونىمەن قاتار وڭىرلەرگە وتىن ساتىپ الۋعا بولىنگەن قاراجاتتار تۋرالى دەرەكتەردى جيناقتاۋدى تاپسىردى. اتالعان جۇمىسقا جاۋاپكەرشىلىك قر پرەمەر-ءمينيسترىنىڭ ءبىرىنشى ورىنباسارى اسقار مامينگە جۇكتەلدى.
