«ەگەمەن اكادەمياسى» – جۋرناليستەرگە ءبىلىمىن شىڭداۋعا, بىلىكتىلىگىن ارتتىرۋعا جانە زاماناۋي ترەندتەرمەن تانىسۋعا مۇمكىندىك بەرەتىن وقۋ الاڭى.
«اكادەميادا» ەلىمىزدىڭ جۋرناليستيكا سالاسىنىڭ مايتالماندارىمەن قاتار سالالىق تاقىرىپتار بويىنشا ماماندار بىلىمىمەن بولىسەدى. جوبانىڭ ماقساتى - قازاقتىلدى باسىلىم قىزمەتكەرلەرىنىڭ ءبىلىمىن ارتتىرىپ, سالالىق جۋرناليستيكاعا بەيىمدەۋ, سونداي-اق وزەكتى تاقىرىپتار توڭىرەگىندە تالقىلاۋ الاڭىن كەڭەيتۋ.
«عاسىرلىق تاريحى بار «ەگەمەن قازاقستان» قازاق ءباسپاسوزىنىڭ قاراشاڭىراعى رەتىندە كەلەلى مەكتەپ قالىپتاستىرعانى بەلگىلى. وسى يگى ءداستۇردى جاڭا دەڭگەيگە شىعارىپ, جۋرناليستەردىڭ ءبىلىمى مەن بىلىكتىلىگىن ارتتىرۋ ءىسىن جۇيەلى جولعا قويۋ ءۇشىن باس باسىلىمنىڭ جانىنان «ەگەمەن اكادەمياسىن» اشىپ وتىرمىز.
سەمينار, لەكتسيا, دوڭگەلەك ۇستەل سياقتى ءتۇرلى فورماتتا وتەتىن اكادەميا ساباقتارىندا قازاق جۋرناليستيكاسىنىڭ كورنەكتى تۇلعالارى مەن زاماناۋي مەديانىڭ قىر-سىرىن مەڭگەرگەن بىلىكتى ماماندار ءسىزدىڭ كاسىبي تۇرعىدان شىڭدالۋىڭىزعا ءوز ۇلەسىن قوساتىن بولادى», – دەدى باسقارما توراعاسى دارحان قىدىرالى.
سەمينار كۋرستارىنا جازىلىپ, ەلىمىزدىڭ باس گازەتىندە بىلىكتىلىگىن ارتتىرعىسى كەلەتىن ارىپتەستەرگە ەسىگىمىز ءاردايىم اشىق. تىركەلۋ ءۇشىن www.academy.egemen.kz سايتىنا ءوتۋىڭىزدى سۇرايمىز.
