– تۇرعىندار جيناعان اقشالارىنا پاتەر الىپ, ەرەكشە قۋانىشتى. بۇل مەملەكەتتىك قولداۋدىڭ, سالىمشىلاردىڭ تىلەك-تالاپ, ەڭبەكتەرىنىڭ ناتيجەسى. بارلىعى كەزىندە دەپوزيت اشىپ, تۇراقتى تۇردە اقشا سالىپ وتىردى. قازىر تۇرعىن ءۇي قۇرىلىس جيناق بانكى «باسپانا» بىرىڭعاي تاريفتىك باعدارلاماسىن ىسكە قوسۋ ارقىلى تاعى دا جەڭىل, ءتيىمدى جولدارىن جاساۋدا. ەندى بانك سالىمشىلارى قانشا جىل اقشا جيناپ, قانداي پايىزبەن تۇرعىن ءۇي زاەمىن الاتىندارىن وزدەرى شەشەدى, – دەيدى بانكتىڭ جەرگىلىكتى فيليالىنىڭ ديرەكتورى تالعات بايىلوۆ.
جاڭا ۇيدەگى پاتەردىڭ ءبىر شارشى مەترى 140 000 تەڭگەنى قۇرايدى. باسپاناعا يە بولۋ ءۇشىن بانك كليەنتتەرىنە پاتەر قۇنىنىڭ 30 پايىزىنا تەڭ قاراجاتتى ەسەپ-شوتتارىندا جيناۋ كەرەك.
مىسالى, ناتاليا نەديلكونىڭ وتباسى قۇنى 8,4 ميلليون تەڭگە تۇراتىن 2 بولمەلى پاتەر ءۇشىن 6 جىل بويى اقشا جيناپتى. جيناعاندارى 4,2 ميلليون تەڭگە. جەتپەيتىن قاراجاتتى بانك 6 جىلعا تۇرعىن ءۇي زاەمى تۇرىندە بەرەدى. نەسيە بويىنشا اي سايىن 68 مىڭ تەڭگە تولەيدى.
2009 جىلدان بەرى بانككە قاراجات جيناعان سالىمشى ءلاززات سەمبەكوۆا دا پاتەر الىپ, قۋانىشتى كوڭىل كۇيدە.
– جىل باسىنان بەرى وڭىردە 109 مىڭ شارشى مەتر ءۇي پايدالانۋعا بەرىلدى. قازىر «سارىارقا» شاعىن اۋدانىندا اۋماعى 24 مىڭ شارشى مەتر بولاتىن 360 پاتەرلى ءۇش ءۇي سالىنۋدا. وسىنداي اسەم, ساپالى ۇيلەر تۇرعىزعان قۇرىلىسشىلارعا دا راحمەت. قونىس تويى قۇتتى بولسىن! – دەدى وبلىس اكىمى ب. باقاۋوۆ.
جەرگىلىكتى فيليال مالىمەتىنشە, قازىر ءوڭىردىڭ ءاربىر 15-ءشى تۇرعىنى ۇيگە دەپ اقشا جينايدى. قازىرگى جيناقتاۋشى قور 21,6 ملرد تەڭگەنى قۇرايدى. سوندىقتان, بانك قولجەتىمدى باعامەن تاعى دا تۇرعىن ۇيلەر سالماقشى. وڭىردە «نۇرلى جەر» باعدارلاماسىنىڭ اياسىندا جەكە تۇرعىن ۇيلەردىڭ دە قۇرىلىسى باستالدى. بۇل جوبا ءۇشىن وبلىس ورتالىعىندا, اقسۋدا, ەكىباستۇزدا جەر تەلىمدەرى بولىنۋدە.
فاريدا بىقاي,
«ەگەمەن قازاقستان»
پاۆلودار
سۋرەتتى تۇسىرگەن
ۆالەري بۋگاەۆ
