يسپانيا كورولدىگى, بوليۆيا, قازاقستان رەسپۋبليكاسىنداعى جانە رەسەي فەدەراتسياسىنداعى يسپانيا ەلشىلىكتەرى, ماسكەۋدەگى سەرۆانتەس ينستيتۋتى ۇيىمداستىرعان شاراعا قازىرگى زامانعى يسپاندىق جانە بوليۆيالىق كينوونەردىڭ ءتۇرلى جانرداعى ۇزدىك فيلمدەرى تاڭداپ الىندى.
كينوكورسەتىلىم رەپەرتۋارىنا كوركەم كينو سالاسىنداعى بەلدى ماراپاتتار مەن جۇلدەلەرگە يە بولعان ونەر تۋىندىلارى ەنگەن. ولاردىڭ قاتارىندا «اجىمدەر», «ترۋمەن» «جاماندىق جايلاماعان جەر», «اركتيكا», «كوزدى جۇمىپ ءومىر سۇرگەن وڭاي», «وبا», «ستوكگولم», «كوتەرىلىسشىلەر» سىندى كارتينالار بار. فيلمدەردىڭ كوبىسى – جىل سايىنعى «گويا» ۇلتتىق جۇلدەسىنىڭ جەڭىمپازدارى مەن نومينانتتارى.
«كورمە قوناقتارى يسپانيا مەن لاتىن امەريكاسىنداعى زامانداستارىنىڭ ومىرىمەن ەتەنە تانىسسىن دەگەن نيەتپەن ارنايى وسى فيلمدەردى اكەلدىك. فيلمدەر توپتاماسىندا سان الۋان جانرداعى كينونى تاماشالاۋعا بولادى. ونىڭ ىشىندە كومەديا, دراما, فانتاستيكا, شىتىرمان وقيعا سىندى جانرلار بار. ءبىزدىڭ ءومىرىمىزدىڭ ورنەگى وسىلاردان توقىلعان دەسەك تە بولادى», دەدى يسپانيا پاۆيلونىنىڭ ديرەكتورى كارمەن بۋەنو.
كينوكورسەتىلىمگە نەگىزىنەن 2011-2015 جىلدار ارالىعىندا شىققان فيلمدەر كىرگەن. «يسپانيا جانە لاتىن امەريكاسى ەلدەرىنىڭ كينەماتوگرافى قارقىندى دامىپ كەلەدى. سوڭعى جىلدارى نازار اۋدارۋعا تۇرارلىق ءبىرتالاي جۇمىستار شىعارىلدى. وسى كورسەتىلىمگە ارناپ فيلمدەردى ىرىكتەۋ كەزىندە ءبىز ارىپتەستەرىمىزبەن جانە سەرىكتەستەرىمىزبەن بىرگە ۇزاق ۋاقىت بويى مۇقيات جۇمىس جۇرگىزدىك. ءبىزدىڭ كينو جۇرتشىلىقتىڭ كوڭىلىنەن شىعىپ, وسىنىڭ ارقاسىندا كورمە قوناقتارىنىڭ جانە جالپى قازاقستاندىقتاردىڭ يسپان ءتىلدى ەلدەردىڭ مادەنيەتىنە دەگەن قىزىعۋشىلىعى ارتسا ەكەن دەپ ۇمىتتەنەمىز», دەدى بوليۆيا پاۆيلونىنىڭ كوميسسارى رافاەل گونسالەس الەمان.
اسحات رايقۇل,
"ەگەمەن قازاقستان"
