وقيعا ورنىنا مەملەكەتتىك قۇرىلىمدار مەن قۇقىق قورعاۋ ورگاندارىنىڭ وكىلدەرى كەلىپ, جەدەل شارالار ارقىلى وقيعانىڭ الدى الىندى. الايدا, بىرقاتار ازاماتتار قوعامدىق ءتارتىپتى بۇزىپ, جاعدايدى ۋشىقتىرماقشى بولعان. ەسىل اۋداندىق پروكۋرورى ءتارتىپ بۇزۋشىلاردىڭ جاۋاپقا تارتىلاتىنى تۋرالى رەسمي ەسكەرتۋ جاسادى.
ىشكى ىستەر مينيسترلىگى مەملەكەتتىك ءتىل جانە اقپارات دەپارتامەنتى وكىلىنىڭ حابارلاۋىنشا, جانجال ءۇندىستاننان كەلگەن ماس جۇمىسشىنى كۇزەتشى نىسان اۋماعىنا كىرگىزۋدەن باس تارتقاننان كەيىن تۋىنداعان. وسىدان كەيىن ول وتانداستارىن شاقىرىپ, كۇزەتشىنى سوققىعا جىققان. جەرگىلىكتى جۇمىسشىلار بولسا, كۇزەتشىگە بولىسىپ, سونىڭ سالدارىنان توبەلەس تۋىنداپ, وعان شامامەن 30 ادام قاتىسقان. «ىشكى ىستەر ورگاندارى كەلەڭسىزدىكتەردىڭ الدىن الۋعا باعىتتالعان شارالار جۇرگىزدى. تۇرعىنداردىڭ ورىنسىز ارەكەتتەرگە بارماۋىن جانە تەكسەرىلمەگەن اقپاراتقا سەنبەۋىن سۇرايمىز. قازىرگى تاڭدا جاعداي قالىپتى جانە پوليتسيانىڭ تولىق باقىلاۋىندا», – دەپ حابارلايدى جوعارىدا اتالعان دەپارتامەنت وكىلى.
اقپارات جانە كوممۋنيكاتسيالار ءمينيسترى داۋرەن اباەۆ بۇل جاعدايدىڭ ۇلتارالىق سيپاتتاعى جانجال ەمەس ەكەنىن ايتىپ, حالىقتى دۇرلىكپەۋگە, سابىر ساقتاۋعا شاقىردى. سونداي-اق, الەۋمەتتىك جەلى قولدانۋشىلاردان ارانداتۋشىلىق سيپاتتاعى جالعان اقپاراتتار تاراتپاۋدى سۇرادى. «قازىرگى كەزدە بۇل كيكىلجىڭ تولىعىمەن شەشىلدى. بىزدەگى مالىمەتتەر بويىنشا جانجالدان زارداپ شەككەندەر جوق. تۇرعىنداردىڭ الاڭداۋىنا دا ەش نەگىز جوق ەكەنىن, بارلىق ماسەلەنىڭ بەيبىت جولمەن شەشىلەتىنىن ايتقىم كەلەدى», دەپ اتاپ كورسەتتى مينيستر.
