وزگە وڭىرلەرمەن سالىستىرا قاراعاندا بۇل وڭ ءۇردىستىڭ گەومەتريالىق قارقىنى اقتوبە ايماعىندا باسىم ەكەنى ايقىن بايقالادى. وسىنداي جاعىمدى, وڭ دەموگرافيالىق جانە اگلومەراتسيالىق ءوسىم مەن فاكتور الدىن الا مۇقيات ەسكەرىلگەن وڭىردە قازىرگى كۇنى 25 جالپى ورتا ءبىلىم بەرەتىن مەكتەپتىڭ قۇرىلىسى قارقىندى جۇرگىزىلىپ كەلەدى. الداعى وقۋ جىلىنان باستاپ 11 مىڭعا جۋىق بالانىڭ ويداعىداي ءبىلىم الۋىنا ارنالعان مەكتەپ عيماراتتارى قۇرىلىسىنا 25 ميلليارد تەڭگەدەن استام قوماقتى قاراجات بولىنگەن.
ال كۇنى كەشە عانا ەلىمىزدىڭ تۇكپىر-تۇكپىرىندەگى مەكتەپتەردە قوڭىراۋ سوعىلىپ, جاڭا وقۋ جىلى باستالىپ كەتكەنى ءمالىم. قوڭىراۋ سىڭعىرىمەن بىرگە مىڭداعان اقتوبەلىك ورەندەر وقۋدى سىڭعىرلاعان سۋ جاڭا عيماراتتاردا باستاۋعا مۇمكىندىك الدى. جۇزدەرى قۋانىشتان جايناعان جاس ۇلانداردىڭ وسى مەرەيلى دە باقىتتى ساتتەرىنە اقتوبە وبلىسىنىڭ اكىمى بەردىبەك ساپارباەۆ ورتاقتاسىپ, ولاردىڭ الداعى قادامدارىنا ءسات-ساپار تىلەدى.
ايتالىق بۇگىنگى كۇنى وبلىس ورتالىعىندا قۇرىلىس كەڭىنەن قانات جايعان اۋدانداردىڭ ءبىرى «باتىس-2» تۇرعىن ءۇي اۋماعى بولسا, بۇل جەردە تۇرعىندار سانىنىڭ وسۋىنە وراي جاڭا مەكتەپ عيماراتتارىنىڭ بوي كوتەرۋى قاجەتتىگى ەشقانداي تالاس تۋعىزبايدى. سولاي بولدى دا. وسىنداعى 320 جانە 620 وقۋشىعا ارنالعان جاڭا مەكتەپتەر ساپالى ءبىلىم بەرۋ نورمالارى مەن جوعارى ستاندارتتارعا سايكەس تۇرعىزىلعان.
جاڭا ءبىلىم بەرۋ نىساندارى ەڭ سوڭعى ۇلگىدەگى جاڭا تەحنولوگيالارمەن, وقۋ كابينەتتەرىمەن, كومپيۋتەر-كىتاپحانالارمەن جابدىقتالعان. سونىمەن بىرگە سپورت جانە ءماجىلىس زالدارى, مۋلتيمەديالىق قۇرال-جابدىقتارىمەن ينتەراكتيۆتى تاقتالار دا جاڭا مەكتەپ عيماراتتارىنىڭ ءباسى مەن مارتەبەسىن بيىكتەتە تۇسەدى. ءدال وسىنداي وقۋ عيماراتىنىڭ ءبىرى اقتوبە قالاسىنىڭ ىرگەسىندەگى نوكين اۋىلىندا دا بوي كوتەرىپ, ءبىلىم كۇنى ەسىگىن ايقارا اشتى.
جاڭا وقۋ جىلىندا جاڭا مەكتەپ عيماراتتارىنىڭ پايدالانۋعا بەرىلۋ ءراسىمى شالعايداعى شالقار, ىرعىز, ويىل جانە مۇعالجار اۋداندارىن دا وتكىزىلدى. ولاردىڭ ارقايسىسى 600 وقۋشىعا ارنالعان. وسى ورايدا ەلدىڭ شەتى مەن جەلدىڭ وتىندە ورنالاسقان اۋدانداردا تۇرعىزىلعان بۇگىنگى زاماننىڭ بيىك تالاپتارىنا تولىقتاي جاۋاپ بەرە الاتىن ءبىلىم بەرۋ نىساندارى وبلىستاعى اپاتتى جاعدايدا تۇرعان جانە ءۇش اۋىسىمدىق ءبىلىم بەرەتىن مەكتەپتەردى ايتا كەتۋدىڭ ءوزى ۇلكەن مارتەبە.
وسىلايشا وبلىستا اتالعان ساناتتاعى مەكتەپتەردى جويۋ جونىندەگى بەلگىلەنگەن ءىس-شارالار مەن كەشەندى جۇمىستار اجەپتاۋىر شەشىمىن تاپتى دەپ ءتۇيىن جاساۋعا تولىق نەگىز بار. ءسوز سوڭىندا اقتوبە ايماعىندا ءبىلىم كۇنى وقۋشىلار مەن اتا-انالاردىڭ جانە ۇستازداردىڭ قۋانىشتارىن كول-كوسىر قىلعان جاڭا مەكتەپ عيماراتتارى ەلباسى بەلگىلەپ بەرگەن «نۇرلى جول» باعدارلاماسىنىڭ تيگىزگەن شاپاعاتى ەكەنىن وقۋشىلار نازارىنا بەرۋدى باستى پارىزىمىزدىڭ ءبىرى دەپ بىلەمىز.
تەمىر قۇسايىن,
«ەگەمەن قازاقستان»
اقتوبە وبلىسى
سۋرەتتە: جاڭا مەكتەپتەردىڭ اشىلۋ راسىمىنەن كورىنىس
