قازاقتىڭ قوناقجاي كەيپىمەن الدىمىزدان نان-تۇز الىپ شىققان اۋىل تۇرعىندارى سالعاننان-اق كوركى كوڭىل تويعىزارلىقتاي بولىپ تۇرعان جاڭا نىسانعا شاقىردى. اينالاسى ەكى-ءۇش جىلدىڭ بەدەرىندە ادام ايتسا نانعىسىز وزگەرگەن جۇزقۇدىق اۋلىنىڭ جاڭا كەيپىن كورىپ, ەرەكشە سەزىمگە بولەندىك. جولسوقتى بولىپ كەلگەن ءبىزدى العاش تاڭعالدىرعان نارسە اۋەلەتە شىرقالعان اسەم ءاننىڭ كەلىستى ىرعاعى بولدى. اسىرەسە «شۋحرات» مەدالىنىڭ يەگەرى, استانادا وتكەن ء«شامشى اندەرى» فەستيۆالىنىڭ جەڭىمپازى سەرجان جاناحمەتوۆتىڭ ورىنداۋىنداعى «جۇزقۇدىق» ءانى تىڭداۋشىسىن ەلىتىپ, تۇڭعيىق تەرەڭىنە تارتتى. ورىنداۋشىسى كەلىسسە ءاننىڭ دە اجارى اشىلا تۇسەدى ەكەن-اۋ, شىركىن!..
استانادان جەتكەن سىي
سودان سوڭ وبلىس اكىمى, ولي ماجليس سەناتىنىڭ مۇشەسى قابۋل تۇرسىنوۆپەن بىرگە قازاقستاننىڭ وزبەكستانداعى توتەنشە جانە وكىلەتتى ەلشىسى ەرىك وتەمباەۆ سالتاناتتى تۇردە №2 مەكتەپتىڭ اشىلۋ لەنتاسىن كەستى. جاڭا نىساندى اشۋ سالتاناتىندا ەلشى قانداستارىمىزعا جاسالعان قامقورلىققا ريزا ەكەنىن, اللا جازسا, بۇگىن اشىلۋ سالتاناتى بولىپ جاتقان بۇل مەكتەپتەن تالاي مىقتىلار شىعاتىنىنا ءشۇباسىنىڭ جوق ەكەنىن ەرەكشە سەنىممەن ايتتى.
جاڭا قونىسقا جالاڭ قولمەن بارۋدى ابەس سانايتىن قازاق قاشاندا عيمارات يەسىنە تارتۋ-تارالعى جاساۋدى ادەتكە اينالدىرعان. قازاقتىڭ بەلگىلى اقىنى قادىر مىرزا ءالى:
قازاق وسى بىلە بىلگەن باعانى,
قازاق وسى سىيلاي بىلگەن اعانى.
قارا دا تۇر,
كەتەرىڭدە ول ساعان,
ات مىنگىزىپ, جىبەك شاپان جابادى,
– دەگەن جىر قاتارلارىن بەكەرگە ايتپاسا كەرەك. تاشكەنتتەن «قانداستارىمنان حابار الايىن», دەپ ارنايى كەلگەن ەلشى اۋىل بالالارىنا ارناپ «اقىلدى تاقتا», پلانشەت, جاڭالىقتار تابلوسىن, تاعى باسقا دا مەكتەپ وقۋشىلارىنا قاجەتتى زاماناۋي تەحنولوگيانىڭ سوڭعى قۇرالدارىن تارتۋ ەتتى.
قالىڭ جۇرتتى قۋانتقان قامقورلىق
ۇشقۇدىق اۋدانى, ء«بوزدوڭ» اۋىلدىق ازاماتتار جيىنىنا قاراستى جۇزقۇدىق ەلدى مەكەنىندە وتكەن مەرەكەلىك شاراعا رەسپۋبليكالىق قازاق ۇلتتىق مادەني ورتالىعىنىڭ توراعاسى سەرىكباي ۇسەنوۆ پەن نيزامي اتىنداعى تاشكەنت مەملەكەتتىك پەداگوگيكالىق ۋنيۆەرسيتيتەتتىڭ قازاق ءتىلى جانە ادەبيەتى ءبولىمىنىڭ مەڭگەرۋشىسى, پروفەسسور ەرگەش ابدۋۆاليتوۆ تا قاتىسقان بولاتىن. ولار جۇزقۇدىقتاعى جاڭا №2 جالپى ورتا ءبىلىم بەرەتىن مەكتەپتىڭ اشىلۋىمەن جۇرتشىلىقتى قۇتتىقتاپ, مادەني ورتالىق پەن ۋنيۆەرسيتەتتىڭ اتىنان قازاق اقىن-جازۋشىلارىنىڭ 500-گە جۋىق كىتابىن تارتۋ ەتتى. وسى كۇنگە دەيىن 30 بالاعا ارنالعان 40 ورىندى مەكتەپ, 14 بالاعا ارنالعان 12 بولمەلى بالاباقشا قۇرىلعانىن ەشقايدا ەستىمەگەنبىز, دەيدى اۋىل تۇرعىندارى. ءتورت ايدىڭ ىشىندە ۇلكەن وزگەرىستەر بولدى. مەكتەپ «ZioNET» تارماعىنا قوسىلۋى دا ءبىز ءۇشىن ۇلكەن جاڭالىق.
ريزا پەيىل
ەل زيالىلارى تاراپىنان بەرىلگەن سىي-سياپاتقا قالىڭ جۇرتشىلىقتىڭ اتىنان ء«بوزدوڭ» اۋىلدىق ازاماتتار جيىنىنىڭ ءتورايىمى مەيرامگۇل جالعاسباەۆا شەكسىز راقمەتىن ايتتى. ءتورايىم ءسوزىنىڭ سوڭىندا «ەل بىرلىگى مەن ىنتىماعىنا كوز تيمەسىن!» دەگەن اقجارما پەيىلىن دە ءبىلدىرىپ ءوتتى.
قاعابەرىستە مەكتەپ ومىرىنەن حاباردار بولۋدى مانسۇق ەتىپ, مەكتەپ وقۋ ءبولىمىنىڭ مەڭگەرۋشىسى مەرگەنباي تورەشوۆتى سوزگە تارتتىق.
– بۇرىن توزىعى جەتكەن مەكتەپتە بالالارعا ءبىلىم بەرەتىنبىز. ەسكىنىڭ اتى ەسكى ەمەس پە؟ بۇگىنگى كۇننىڭ تالابىنا ساي ءبىلىم بەرۋگە مۇمكىندىگىمىز جوق بولاتىن. ونىڭ ۇستىنە, «جىعىلعانعا جۇدىرىق» دەگەندەي, مامان وقىتۋشىلار دا تاپشى ەدى. مىنە, بيىل ءوتىنىشىمىز وزبەكستان باسشىسىنىڭ قۇلاعىنا جەتىپ, جاڭا وقۋ ورنىنا قول جەتكىزدىك. مەكتەبىمىزدە بۇگىندە 31 وقۋشى بار. ولارعا تاجىريبەلى وقىتۋشىلار ساباق بەرەدى.
وزبەكستاندا ادام دەنساۋلىعىن ساقتاۋ ەڭ نەگىزگى سالالاردىڭ ءبىرى. قوعامنىڭ باسقا تارماقتارى سياقتى وركەن جايعان بۇل سالا سوڭعى جىلدارى كوز كورىپ, قۇلاق ەستىمەگەن سونى بەلەستەردى باعىندىردى.
مىڭ جىلدىقتى لۇقپان حاكىم ءىلىمى يەمدەندى, ەندىگى مىڭ جىلدىق مەنىكى, دەگەن ەكەن مەديتسينا عىلىمدارىنىڭ اتاسى يبن سينا. ايتسا ايتقانداي-اق, بۇل كۇندە عۇلامانىڭ ءسوزىنىڭ راستىعىن زاماننىڭ ءوزى ايعاقتاپ تۇرعانداي.
ء«بوزدوڭ» اۋىلدىق ازاماتتار جيىنىنا قاراستى جۇزقۇدىق ەلدى مەكەنىندەگى اۋىلدىق دارىگەرلىك پۋنكت تۇرعىندارعا تۇراقتى قىزمەت ەتەدى. ەمحانا 2011 جىلى ناۋاي كەن مەتاللۋرگيا كومبيناتى تاراپىنان قايتا جوندەلىپ, جاڭادان قۇرىلدى. قازىر ەمحانا جۇزقۇدىقتاعى 281 تۇرعىنعا قالتقىسىز قىزمەت ەتەدى. كەڭ اۋلاعا ورنالاسقان كورىكتى عيمارات اعىمداعى جىلى دا كۇردەلى جوندەۋدەن ءوتىپتى.
حالىق ءۇشىن قالتقىسىز قىزمەت
وسى ورايدا سوزگە ارالاسقان اۋداندىق مەديتسينا بىرلەستىگىنىڭ باس دارىگەرى زافار راسۋلوۆ جۋىردا وسى ەمحاناعا «سالاماتتىق-2» باعدارلاماسى بويىنشا ۇكىمەت تاراپىنان زەرتحانالىق جيھازدار, ەكگ اپپاراتى, اۆتوكلاۆ, توڭازىتقىش, ۋلترادىبىس اپپاراتى, گينەكولوگيالىق جيھازدار بەرىلگەنىن ايتتى. ەندى, دەرتتى جاندار ءدارى-دارمەك ىزدەپ اۋدانعا سابىلمايدى. ويتكەنى ەمحانا جانىنان اشىلعان ءدارىحانادا العاشقى جاردەمگە قاجەتتى ءدارى-دارمەكتەر تولىق جەتكىلىكتى. العاشقى كومەككە جۇمسالاتىن ءدارى-دارمەكتەر تەگىن بەرىلەتىن كورىنەدى.
– وعان قوسىمشا اۋدانداعى مەديتسينالىق بىرلەستىك تاراپىنان ۇيىمداستىرىلعان جىلجىمالى ءدارىحانامىز دا بار. ولار اۋىل تۇرعىندارىنىڭ تاپسىرىس بويىنشا قاجەتتىلىكتەرىن قالتقىسىز وتەۋگە تىرىسادى. ەمحانامىزدا ءۇش مەدبيكە قىزمەت ەتەدى. ونىڭ ءبىرى پاتروناج, ەكىنشىسى اعا مەدبيكە, ءۇشىنشىسى دەرتتى جاندارعا ەمحانادا ءدارى ەگەتىن مەدبيكە. ۇشەۋى دە ءوز كاسىبىنىڭ ناعىز شەبەرلەرى. كەلگەن ناۋقاستارعا جىلى قاباق تانىتىپ, كوڭىلدەرىن اۋلاۋعا تىرىسادى, – دەيدى ز.راسۋلوۆ.
ء سابي كۇلكىسىمەن الەم قۇلپىرادى
جۇزقۇدىق ەلدى مەكەنىندەگى كورىكتى كەشەندەردىڭ ءبىرى سابيلەر تاربيەلەنەتىن ورىن ەكەن. كەزىندە شارۋاشىلىق كەڭسەسى بولعان بۇل ورىن ول تاراعان سوڭ قايتا جوندەلىپ سابيلەرگە تاپسىرىلىپتى.
– بۇگىندە بالاباقشامىزدا ءۇش-جەتى جاستاعى بالالار تاربيەلەنۋدە, – دەيدى بىزبەن سۇحباتتاسقان بالاباقشا مەڭگەرۋشىسى ايجان ەردەشوۆا
ناۋايداعى «قىزىلقۇمتسەمەنت» اكتسيونەرلىك قوعامى مەن «ناۋاي» كەن مەتاللۋرگيا كومبيناتى 500 ميلليون سۋمعا قايتا جوندەپ پايدالانۋعا تاپسىردى. شەبەر قۇرىلىسشىلاردىڭ قولىمەن قايتا جاڭارعان بالاباقشادا بالالار تاماقتاناتىن بولمە, جاتىن بولمەسى, ويىن وينايتىن بولمە ءبارى دە جان-جاقتى جابدىقتالعان. ءبىز اۋلاعا كەلگەندە قازدىڭ بالاپاندارىنداي قاز-قاتار تىزىلگەن بالالار تاربيەشىلەرىمەن بىرگە ەشنارسەنى دە ىشىنە جاسىرمايتىن رياسىز جارقىن پەيىلمەن قارسى الدى. سودان سوڭ وزدەرى جاتتاعان وتان, انا, تۋعان جەر تۋرالى ولەڭدەرىن وقىپ جينالعانداردى ءبىر سەرپىلتىپ تاستادى.
جاڭالىق جان جادىراتادى
اۋىل ورتالىعىنداعى بالاباقشا قۇرىلىسىنىڭ بىتكەنىنە كوپ بولماسا دا, قولداعى بارىن بالا باقىتىنان ايامايتىن دەمەۋشىلەر بالاباقشا اۋلاسىنا ەرتەگى كەيىپكەرلەرى مەن ويىن جابدىقتارىن ورناتۋدى دا ۇمىتپاپتى. وزدەرىن وسى ءوڭىردىڭ قوجاسىنداي سەزىنەتىن پەرىشتە مىنەز سابيلەر اۋلادا اسىر سالىپ ويناپ, ەشنارسەدەن بەيحابار, ۋايىم-قايعىسىز كۇي كەشۋدە.
باقىتقا باستار جول
«سۋ اتاسى – بۇلاق, ءسوز اتاسى – قۇلاق, جول اتاسى – تۇياق», دەيدى دانا حالقىمىز. حاديستەردە ايتىلۋىنشا, كوپشىلىك جۇرەتىن جولدى جوندەۋ ساۋابى مول سالماقتى ىستەردىڭ ءبىرى ەكەن.
جۋىردا جۇزقۇدىق ەلدى مەكەنىنە اكەلەتىن 65 شاقىرىمدىق تاس جولدى جولشىلار 400 ميلليون سۋمدىق قارجىعا جوندەپ, جولاۋشىلاردىڭ جول قاتىناسىنا ءبىرشاما قولايلىلىق جاساپتى. اۋىل ىشىندەگى جاڭادان سالىنعان جول دا جۇرگىنشىلەرگە ءىشىنارا جەڭىلدىكتەر تۋعىزدى. كۇنى كەشە بورپىلداق قۇمدى كەشىپ جۇرگەن اۋىل تۇرعىندارى ايناداي جارقىراعان تاس جولمەن ءجۇرىپ, قۋانىسىپ قالىستى.
جۇزقۇدىق اۋلىندا جوعارىداعىلاردان باسقا 36 نىسان جوندەلىپ, جوندەۋ جۇمىستارىنا جالپى 200 ميلليون سۋم قارجى جۇمسالدى.
اتالار اماناتى
بۇگىنگى جاڭا تامدىنىڭ كەلبەتى كىمدى دە بولسا سۇيسىندىرەرى حاق. بۇرىن قازاقتىڭ باتىرى باۋىرجان مومىش ۇلى, بەلگىلى كومپوزيتور, ۆالس پاديشاسى اتانعان ءشامشى قالداياقوۆ, اقىن قادىر مىرزا ءالى كەلىپ سۇڭعىلا اقساقالدارمەن سۇحباتتاسقان بايىرعى ءوڭىر, بۇگىن دە جاڭارىپ جاندانا تۇسكەن. قادىر اقىننىڭ سوزىنە جازىلعان ولەڭگە ءشامشى ءان باعىشتاپ حالىققا تاراتقان «تامدى ارۋى» ءانى بۇگىندە ءيسى قازاقتىڭ ءيىرىمدى ىرعاعىنا اينالدى. باتىر باۋكەڭ دە تامدى جايلى «قايماعى بۇزىلماعان قازاقتار تۇراتىن اياۋلى مەكەن ەكەن», دەپ ءوز باعاسىن بەرىپتى. ءيا, دۋالى اۋىز اقساقالدىڭ ايتقانى بەكەر بولماسا كەرەك. تامدىنىڭ كەز كەلگەن قارياسى كونە تاريحتىڭ كوزىن اشا الارى حاق.
وتكەننەن سىر شەرتەتىن مۇراجاي
«جۇزقۇدىقتاعى» مەملەكەت تاراپىنان حالىق يگىلىگى ءۇشىن اتقارىلعان يگى ىستەردىڭ كۋاسى بولعان ءبىز كەلەسى كۇنى تامدى اۋدانىنىڭ ورتالىعىنا باعىت الدىق. مۇندا دا ءبىزدى شات-شادىمان حالىق كەرنەي-سىرنايلار اۋەنىمەن مەرەكەدەگىدەي قارسى الدى. مۋزىكا مەكتەبىندەگى تالانتتى جاستاردىڭ ءان ورىنداۋ, كۇي تارتۋ ونەرلەرىنە سۇيسىنگەن قوناقتار مەكتەپتەگى مۇراجايدى كورىپ, بايىرعى اتا-بابامىزدىڭ تۇرمىستا قولدانعان كونە قۇرال-سايماندارىمەن تانىستى. تامدى وڭىرىنە بەلگىلى ەكى مارتە ەڭبەك ەرى اتانعان شارۋاگەر جاباي باليمانوۆ, اتاقتى بالقى بازار, توقا بەردالى تۋرالى تىڭ دەرەكتەردەن حاباردار بولدى.
ەڭبەكتەن باقىت تاپقان جان
سوعىس ءبىتىپ, ەل ەسىن ەندى عانا جيا باستاعان شاق بولاتىن. جاز بازارى تارقاپ, بوزاڭ تارتقان بوزدالا توسىندە قاڭباق جۇيتكىپ, قاراشانىڭ وكپەك جەلى بيلىك تۇعىرىنا كوتەرىلگەن شاقتا, قوي باعىپ, قوڭىر تىرلىك كەشىپ وتىرعان ساعات اقساقالدىڭ شاڭىراعىندا شەكەسى تورسىقتاي ۇل بالا دۇنيەگە كەلدى. ءومىر بويى جالعىزدىق تاقسىرەتىن تارتىپ, جاپا شەككەن وتاعاسى وزىمە سەرىك بولسىن دەگەن نيەتپەن نارەستەنىڭ اتىن سەرىكباي دەپ قويادى.
جاستايىنان-اق تابيعاتتىڭ تىلسىم سىرلارىن كوڭىل تورىنە قاتتاپ وسكەن بالا سەرىكباي ەس بىلە كەلە زەردەلى دە زەيىندى بولىپ وسەدى. وقۋ جاسىنا كەلگەندە ءوز قۇرداستارىمەن بىرگە, جۇمباق دۇنيەنىڭ قىر-سىرىن بىلمەك بولىپ اۋىل ورتالىعىنداعى مەكتەپ تابالدىرىعىن اتتايدى. تابيعات سىيلاعان زەرەكتىگىنىڭ ارقاسىندا جاس شاكىرت قۇرداستارىنان وق بويى وزىق بولادى. جاستىق كەۋدەگە ارماندار مەن قيالدار تۇنعان شاق ەمەس پە؟! قىزىلقۇم توسىندەگى اۋىل جاستارى دا ءبىرى قالاعا, ءبىرى دالاعا بيىك ارماندى قانات ەتىپ ۇشتى دا كەتتى. شوپان بەينەتىنىڭ اۋىرتپالىعىن كوزىمەن كورىپ, جالعىز قولدى اكە تاعدىرى جانىن سىزداتقان سەرىكباي اقساقال الىپ ۇشقان ارمانىن جۇگەندەپ, اكە جانىنا اتتاندى.
ءيا, ول كەزدە ساعات اقساقال وتەمۇرات ەلدى مەكەنىنە قاراستى «قوسوبا» قۇدىعىندا وتىراتىن. بۇلاي بولارى ءۇش ۇيىقتاسا دا تۇسىنە كىرمەگەن وتاعاسى كامەلەتكە تولىپ, قالتاسىنا اتتەستات سالىپ كەلگەن بالاسىنىڭ بۇل كەلىسىنە تاڭىرقاي دا, تاڭدانا قارادى. سالدەن سوڭ-اق دۇرىس تاربيە بەرگەنىن ويلاعاندا جۇرەگى اتشا تۋلاپ, اكەلىك مەيىرىمگە تولدى. ولاي ەتپەگەندە شە!؟ كەيبىرەۋلەردىڭ بالاسى سىندى جاعدايعا قاراماي «وقيمىن», دەپ جەر تەپكىلەپ تۇرىپ السا قايتپەك ەدى. سول جىلى اكەسىنە كومەكشى شوپان بولعان سەرىكباي شوپاندىقتىڭ ءوزى بىلمەيتىن جۇمباق تۇستارىن كانىگى اكەسىنەن ۇيرەندى.
«ەر جىگىتتىڭ باسى ەكەۋ بولماي, مالى ەكەۋ بولماس», دەگەن ءسوز بار قازاقتا. سەرىكباي اعا دا كوپ كەشىكپەي ءوزى تەڭدەس پارشاگۇل اتتى قىزعا كوڭىل قويىپ ۇيلەندى. «جىگىتتى بار ەتەتىن دە, جوق ەتەتىن دە ايەل», دەيدى حالقىمىز. سول سول ەكەن, جاڭا وتباسىنىڭ كوشى العا باسىپ سالا بەردى.
1969 جىلدىڭ قىسى شارۋاعا قاتال سىن بولدى. قاڭتاردا جاۋعان قالىڭ قار, ناۋرىزدىڭ اياعىنا دەيىن ءمىز باقپاي جاتىپ الدى. تاجىريەبەسىزدەۋ شوپاندار تاياق ۇستاپ قالىپ جاتقاندا, كەيىپكەرىمىز قىتىمىر قىستان شىعىنسىز شىقتى. ەتكەن ەسەلى ەڭبەك ەر جىگىتتى ەل العىسىنا بولەدى.
كەلەر جىلى ءار ءجۇز ساۋلىقتان ءجۇز ەلۋدەن قوزى الىپ اكىمشىلىك تاراپىنان ماقتاۋ قاعازىمەن ماراپاتتالدى. بۇل قۇرمەت جاس شوپاندى جاڭا بيىكتەرگە جىگەرلەندىرە ءتۇستى.
بەرەكە-بىرلىگى بار جەرگە تۇراقتايدى ەكەن. قوساعى پارشاگۇل اپامەن بىرگە عۇمىر كەشكەن ۇزاق جىلدار بەدەرىندە ءجۇز شايىسىپ كورمەگەن وتاعاسى بايقاپ وتىرسا باقىت باسپالداعىنىڭ بىرىنەن سوڭ ءبىرىن اتتاپتى. جىلجىعان جىلدار كەرۋەنى وڭكەي وڭ قاباق تانىتىپ وتىرعان سىڭايلى. اۋزىن اشسا جۇرەگى كورىنەتىن سەرىكباي اعانى اۋىلداستارى اسا قۇرمەتتەيدى. قىسىلعاندا ۇلكەن-كىشى اقىل سۇراپ الدىنا كەلەدى. اعا دا ءوز كەزەگىندە كورگەندەرى مەن كوڭىلگە تۇيگەندەرىن اقىل سۇراي كەلگەندەرگە ايتۋدان جالىقپايدى.
«اقىرىن ءجۇرىپ انىق باس,
ەڭبەگىڭ كەتپەس دالاعا»,
– دەگەن سوزدە قانشا استارلى ماعىنا بار دەسەڭىزشى. ۇلى دانىشپان ايتقان وسى ءسوز بىرلىكتىك شوپان سەرىكباي ساعاتوۆتىڭ دا اينىماس كرەدوسىنا اينالعانداي.
اۋىل مەكتەبىنىڭ اجارى
اۋدان ورتالىعىنان 160-170 شاقىرىمداي جول جۇرگەننەن سوڭ, ىسپا قۇمداردى ىسىرا سالىنعان اۋىلعا كەزىكتىك. بۇل «شيەلى» اۋىلدىق جيىنىنا قاراستى وتەمۇرات ەلدى مەكەنى ەكەن. بۇل ايماقتا تۇراتىن جالپى حالىق سانى 805 ادام. اۋىلدا ءبىر مەكتەپ, ءبىر بالاباقشا, اۋىلدىق دارىگەرلىك پۋنكت بار.
قوناقتاردى العاش وزىنە تارتقان اۋىل ورتالىعىنداعى مەكتەپ ورنى بولاتىن. جالپى, 130 وقۋشىعا ارنالعان بۇل مەكتەپ الىس جول ءجۇرىپ كەلگەن قوناقتاردى مەرەكەدەگىدەي كوڭىل كۇيمەن قارسى الدى. كۇمبىرلەگەن كۇي مەن اسقاقتاي شىرقالعان اندەر تىڭداۋشىسىن ەلىتىپ-اق بارادى.
ناۋاي وبلىسىنىڭ شەتكى ايماقتارىنداعى حالىقتىڭ حال-كۇيىمەن تانىسپاق بولىپ كەلگەن قوناقتار مەكتەپتىڭ جاڭا وقۋ جىلىنا دايىندىعىن كوزدەن وتكىزىپ, اقىل-كەڭەستەرىن بەردى.
جاقىندا عانا كۇردەلى جوندەۋدەن وتكەن مەكتەپ عيماراتى وتكەن-كەتكەننىڭ كوز جاۋىن الىپ, «مەنمۇندالاپ» تۇر. كىرەر اۋىزدا بۇكىل رەسپۋبليكاعا بەلگىلى – ءومىرى جاس ۇرپاققا ونەگە وزبەكستان قاھارمانى سەرىكباي ساعاتوۆتىڭ سۋرەتى ءىلىنىپ, ءومىر جولى جازىلعان. مەكتەپتەگى ءاربىر بولمەدە عۇلامالاردىڭ عيبراتتى سوزدەرىنەن ۇزىندىلەر ىلىنگەن. مۇنى وقىعان مەكتەپ جاستارىنىڭ كۇنى ەرتەڭ اتالارىنداي بولۋعا تىرىساتىنى ايدان انىق.
وسىدان سوڭ قۇرمەتتى قوناقتار مەكتەپتىڭ سپورت زالىندا بولىپ, وقۋشىلارعا ۆولەيبول, باسكەتبول, فۋتبول دوپتارى, تەننيس راكەتكاسى, سپورت كيىمدەرىن, تاعى باسقا دا سپورتتىق جيھازداردى سىيعا تارتتى.
جيىن سوڭىندا رەسپۋبليكالىق قازاق ۇلتتىق مادەني ورتالىعىنىڭ توراعاسى سەرىكباي ۇسەنوۆ پەن نيزامي اتىنداعى تاشكەنت مەملەكەتتىك پەداگوگيكالىق ۋنيۆەرستيتەتتىڭ پروفەسسورى ەرگەش ابدۋۆاليتوۆ وزدەرى اكەلگەن بەس جۇزگە تارتا ادەبي كىتاپتى مەكتەپ كىتاپحاناسىنا سىيعا تارتتى
ماتەريالدى دايىنداعان
ايتۋار سابىروۆ,
«نۇرلى جول» گازەتىنىڭ مەنشىكتى ءتىلشىسى
وزبەكستان رەسپۋبليكاسى
