قازاق ەلىنىڭ بوكسشىلارى المانياداعى الامانعا مىنا قۇرامدا اتتانعان بولاتىن: ەرجان جومارت (49 كگ), ازامات يساقۇلوۆ (52 كگ), قايرات ەراليەۆ (56 كگ), ادىلەت قۇرمەتوۆ (60 كگ), بەكداۋلەت يبراگيموۆ (64 كگ), ابىلايحان ءجۇسىپوۆ (69 كگ), ءابىلحان امانقۇل (75 كگ), ەرىك ءالجانوۆ (81 كگ), ۆاسيلي لەۆيت (91 كگ) جانە قامشىبەك قوڭقاباەۆ (+91 كگ). وسىلاردىڭ اراسىندا بۇرىن الەم چەمپيوناتىنىڭ تارتىسىنا تۇسكەن ءۇش-اق بوكسشى بولدى. ولار – قايرات ەراليەۆ, ابىلايحان ءجۇسىپوۆ جانە ۆاسيلي لەۆيت. قالعاندارىنىڭ جاس شاماسىن بوتا تىرسەك بوزبالا دەپ ايتۋعا كەلمەس, دەگەنمەن مۇنداي دەڭگەيدەگى سايىستا باق سىناپ, ىسىلا قويماعان بوكسشىلار ەدى.
بىردەن ايتا كەتۋ كەرەك, وسىنداي جاڭارعان, سىناق تۇرىندەگى قۇرامدا سىنعا تۇسكەن بوكسشىلارىمىزدىڭ ناتيجەسىن تولايىم تابىسقا بالاعان ءجون. ارينە, بۇدان دا ءتاۋىر ناتيجەگە قول جەتكىزۋگە بولۋشى ەدى. بىراق, بۇيىرعانى وسى بولدى.
ءار نارسەنىڭ پارقى سالىستىرعاندا بىلىنەدى. ماسەلەن, قۇرامانىڭ وسىدان ەكى جىل بۇرىن, ياعني 2015 جىلى دوحادا (قاتار) وتكەن الەم چەمپيوناتىنداعى ناتيجەسى تۇرعىسىنان العاندا, العا باسقان قادامىمىز ارشىندى بولدى. دوحادا ءبىزدىڭ بوكسشىلارعا ەكى-اق جۇلدە بۇيىرعان بولاتىن. دانيار ەلەۋسىنوۆ (69 كگ) پەن يۆان دىچكو (+91 كگ) فينالدىق جەكپە-جەكتەرىندە جەڭىلىپ, كۇمىس مەدالعا قاناعات ەتكەن ەدى.
بيىلعى الەم چەمپيوناتىنىڭ جارتىلاي فينالىنا التى بىردەي بوكسشىمىز اتويلاپ شىقتى. قورجىندا كەم دەگەندە التى «قولا» بار دەپ كوڭىل مارقايتقانىمىزبەن, «التىن», «كۇمىستەن» دە دامەمىز زور ەدى. وكىنىشكە قاراي, التى بوكسشىمىزدىڭ ۇشەۋى جارىستىڭ كەلەسى كەزەڭىنە شىعا الماي, قولا جۇلدەنى قاناعات ەتتى.
ەندى, فينالعا شىققان ءۇش بوكسشىمىزدىڭ كورسەتكەن ونەرى تۋرالى از-كەم ايتا كەتەيىك. جامبىل بوكس مەكتەبىنىڭ تۇلەگى, 75 كيلو سالماقتا سىنعا تۇسكەن 20 جاستاعى ءابىلحان امانقۇل, ءسوز جوق دارىندى بوكسشى. وسى چەمپيوناتتا ول ءوزىنىڭ جاستىعىنا قاراماستان, سابىرلى ءجۇرىپ اسقان سالقىنقاندىلىقپەن جۇدىرىقتاساتىن, سوققىلارى وتە اۋىر شەبەر رەتىندە كورسەتتى.
فينالعا دەيىن نەبىر ازۋلى بوكسشىلاردى تۇقىرتىپ, تىزە بۇكتىردى. جارتىلاي فينالدا وليمپيادا جانە الەم چەمپيونى كۋبالىق ارلەن لوپەستى جەڭگەنىنىڭ ءوزى سەنساتسياعا بالانعان ەدى. وكىنىشكە قاراي, شەشۋشى جەكپە-جەككە ءبىزدىڭ بوكسشى شارشاڭقىراپ شىقتى, پسيحولوگيالىق تۇرعىدان دا ايقاسقا ءازىر بولماعانى كورىنىپ تۇردى. سول سەبەپتى, ەۋروپانىڭ بيىلعى چەمپيونى ۋكراينالىق الەكساندر حيجنياك رينگ ۇستىندە ويىنا كەلگەندى ىستەپ, ءبىزدىڭ بوكسشىنى ويسىراتا جەڭدى.
اسا اۋىر سالماقتا ءۇمىت ەتكەن قىزىلوردالىق قامشىبەك قوڭقاباەۆقا قارسى وتە تاجىريبەلى, تالاي سويقاندى كورگەن ازەربايجاندىق ماگومەدراسۋل مەدجيدوۆ جۇدىرىقتاستى. ءبىزدىڭ بوكسسۇيەر قاۋىمنىڭ ەسىندە ول قازىر كاسىپقوي بوكسقا اۋىسقان يۆان دىچكونى نوكاۋتقا تۇسىرگەنىمەن ەستە قالعان ەدى. جارتىلاي فينالدا كامەرۋندىق قارا كۇش يەسى فوكۋ ارسەننىڭ ءوزىن ەكى رەت نوكداۋنعا جىبەرىپ, بوكس ماماندارىنىڭ جىلى ءىلتيپاتىنا بولەنگەن بوكسشىمىزدىڭ شەشۋشى جەكپە-جەكتە شالعىسى تاسقا ءتيدى. «قامشىبەككە ءالى دە بولسا كوپ جۇمىس ىستەۋ كەرەك», دەدى باس باپكەر فينالدان كەيىن جۋرناليستەرگە بەرگەن سۇحباتىندا. سونداي-اق, ول ءابىلحان امانقۇلدىڭ كۇمىس جۇلدەسىن وتە جوعارى ناتيجە رەتىندە باعالادى. «العاشقى الەم چەمپيوناتىندا فينالعا جەتۋ دەگەن جاس بوكسشى ءۇشىن تاماشا كورسەتكىش», دەدى ول.
ال قازاق ەلىنە جالعىز التىن جۇلدەنى سىيلاعان قايرات ەراليەۆتىڭ اتىنا قانداي ماداق ايتسا دا جاراسادى. جالپى, وڭتۇستىك قازاقستان بوكسىنىڭ وكىلى ەراليەۆ ەل قۇراماسىنداعى ەڭ تاجىريبەلى بوكسشىلاردىڭ ءبىرى, بيىل ول 29 جاستا. ايقاستى باستان كوپ وتكەرىپ, ىسىلعاندىعىنىڭ ارقاسىندا ول نەبىر مىقتى قارسىلاستارىن جارىس جولىنان ىعىستىردى. اسىرەسە, ەجەلگى قارسىلاسى, ريو-2016 وليمپياداسىندا ءوزىنىڭ جولىن كەسكەن وزبەك بوكسشىسى مۋرودجون احماداليەۆتى بەتقاراتپاي جەڭگەنى ەراليەۆتىڭ ەڭسەسىن كوتەرىپ جىبەرگەنى ءسوزسىز ەدى. التىن جۇلدە ءۇشىن بولعان ايقاستا ءبىزدىڭ بوكسشى امەريكالىق جاس دارىن ديۋك روگاندى قينالماي جەڭدى. «ەراليەۆتىڭ قارسىلاستارى مىقتى بولدى. دەگەنمەن, ول ءوزىنىڭ اقىل-ويى, تاجىريبەسى جانە شەبەرلىگىنىڭ ارقاسىندا چەمپيون اتاندى», دەدى الەم چەمپيونىنىڭ جەكە باپكەرى جانە ۇلتتىق قۇراما كوماندانىڭ باس جاتتىقتىرۋشىسى مىرزاعالي ايتجانوۆ.
جالپى, گامبۋرگ رينگى بوستاندىق ارالى وكىلدەرى ءۇشىن اسا تابىستى بولدى. جالپىكوماندالىق ەسەپتە ءبىرىنشى ورىندى جەڭىپ العان كۋبا قۇراماسىنان حوانيس ارگيلاگوس (49 كگ), يوسباني ۆەيتيا (52 كگ), ەندي كرۋس گومەس (64 كگ), حۋليو سەسار لا كرۋس (81 كگ) جانە ەريسلاندي ساۆون (91 كگ) چەمپيون اتانسا, لاسارو الۆارەس (60 كگ) پەن رونيەل يگلەسياس (69 كگ) كۇمىس جۇلدەگەر اتاندى.
سونىمەن قاتار, بۇل چەمپيونات وزبەكستان بوكسىنىڭ ورلەۋ ۇستىندە ەكەندىگىنە تاعى ءبىر مارتە كوز جەتكىزدى. باۋىرلاس ەلدىڭ بىلعارى قولعاپ شەبەرلەرى جالپى سانى التى مەدال جەڭىپ الىپ, كۋبا بوكسشىلارىنان كەيىنگى ەكىنشى ورىنعا تابان تىرەدى. شاحرام گياسوۆ (69 كگ) چەمپيون اتانسا, حاسانبوي دۋسماتوۆ (49 كگ), جاسۋربەك لاتيپوۆ (52 كگ) جانە يكبولجون حولداروۆ (64 كگ) كۇمىس جۇلدەگە يە بولدى. ال بەكتەمىر مەليكۋزيەۆ (81 كگ) پەن سانجار تۋرسۋنوۆ (91 كگ) قولا مەدالدى قانجىعاعا بايلادى.
گامبۋرگتەگى الەم چەمپيوناتىندا ماماندار قاباعى مەن ماڭدايى جارىلعان بوكسشىلاردىڭ كوپ بولعانىنا نازار اۋداردى. بىراق, بوكسشىلاردىڭ باسىنا كيەتىن شلەم تۋرالى اڭگىمە ازىرگە قوزعالا قويعان جوق. ايتسە دە, ەرتە مە, كەش پە شەبەرلەردىڭ شەكەسىن قىزدىرماي تۇرعان بۇل ماسەلە كۇن تارتىبىنە قويىلۋى ابدەن مۇمكىن.
ال ءبىز بولساق, الەمدە ۇزدىك ۇشتىكتىڭ ىشىنە كىرەمىز دەگەن ءسوزىمىزدى ۇستاپ قالدىق. تاعى دا قايتالاپ ايتامىز, جاڭارعان قۇراممەن جاھاندىق دودادا كوماندالىق جۇلدەگە ىلىگۋ دەگەنىڭىز ايتقانعا عانا وڭاي شارۋا!
المانياداعى بوكس الامانىندا تورەشىلەر تاراپىنان قاساقانا بۇرمالاۋشىلىقتار بولماسا دا, ارا-تۇرا بەلگىلى ءبىر بوكسشىلارعا قاتىستى بۇيرەكبۇرۋشىلىقتاردىڭ ورىن العانى راس. دەگەنمەن, جالپى العاندا, بۇل چەمپيوناتتا قازىلاردىڭ ادىلەتتىڭ اق جولىنان الىسقا ۇزاي قويماعانى قۋانتتى. وسى تۇرعىدان العاندا, ايبا-نىڭ ادىلەتسىز تورەشىلەرمەن اياۋسىز كۇرەسىپ جاتىرمىز دەگەن مالىمدەمەسىنە سەنگىڭ-اق كەلەدى.
اۋەسقوي بوكسشىلاردىڭ كەلەسى حح الەم چەمپيوناتى ەكى جىلدان كەيىن رەسەيدىڭ سوچي قالاسىندا وتەدى. وعان دەيىن ءبىزدىڭ بوكسشىلار يندونەزيانىڭ دجاكارتا جانە پالەمبانگ قالالارىندا وتەتىن ازيا ويىندارىندا باق سىنايدى. ال ول سارىقۇرلىق دوداسىنا قازاقستان كومانداسىنىڭ قانداي قۇرامدا بارارى الدىمىزداعى قاراشا ايىندا وتەتىن ەل چەمپيوناتىنان كەيىن بەلگىلى بولۋى مۇمكىن. بۇل تۋراسىندا باس باپكەر مىرزاعالي ايتجانوۆ بىلاي دەدى: «بىزدە رەزەرۆ بار جانە باسەكە وتە جوعارى. الدىمىزدا قازاقستان چەمپيوناتى جانە باسقا دا تۋرنيرلەر بار. ازيا ويىندارىنا مىقتى قۇرامدا اپارىپ, جالپىكوماندالىق ەسەپتە ءبىرىنشى ورىن الۋعا بار كۇشىمىزدى سالامىز».
قايرات ءابىلدا,
«ەگەمەن قازاقستان»
سۋرەتتەردى تۇسىرگەن
دانيار مايلىباەۆ
