ايتتىق داستارxاننان بەس مىڭعا جۋىق ادام ءدام تاتتى. شارانىڭ ماقساتى - اسىل ءدىنىمىزدىڭ قۇندىلىعىن ارتتىرىپ, قازاق حالقىنىڭ دارحاندىعى مەن مادەنيەتىن پاش ەتۋ.
شارادا ءسوز العان وڭتۇستىك قازاقستان وبلىسى اكىمىنىڭ ورىنباسارى ۇلاسبەك سادىبەكوۆ بارشا استانالىكتاردى قۇربان ايت مەيرامىمەن قۇتتىقتادى.
«وزدەرىڭىزگە ءمالىم, 2017 جىلعى 29 تامىز – 3 قىركۇيەك ارالىعىندا «ەكسپو-2017» حالىقارالىق مامانداندىرىلعان كورمەسى اياسىندا استانا قالاسىندا وڭتۇستىك قازاقستان وبلىسىنىڭ كۇندەرى وتۋدە. قۇربان ايت – ادامداردىڭ ءبىر-بىرىنە قايىرىم جاساۋىنا ۇيىتقى بولاتىن ەرەكشە ءدىني مەرەكە. قاسيەتتى قۇربان ايتتا ىنتىماق پەن بىرلىگىمىزدى, ءوزارا تاتۋلىعىمىزدى ارتتىرۋ ماقساتىندا وبلىس باسشىسى اتىنان استانالىقتارعا جانە ەلوردا قوناقتارىنا ارنايى داستارحان جايىپ اس تاراتىلىپ وتىر», – دەدى ۇلاسبەك سادىبەك ۇلى.
شارا بارىسىندا قۇربان ايت مەرەكەسىنە وراي ءبىر ءىرى قارا مەن ەكى قوي قۇرباندىققا شالىنىپ, 1 توننا باۋىرساق ءپىسىرىلدى. قالا تۇرعىندارى مەن قوناقتارىنا تولەبي اۋدانىنىڭ قىمىزى مەن وتىرار اۋدانىنىڭ شۇباتى ۇسىنىلدى. سونداي-اق كەلۋشىلەرگە وڭتۇستىكتىڭ تاتتىلىگى ءتىل ۇيىرەر جەمىس-جيدەكتەرى مەن قاۋىن-قاربىزى تەگىن ۇلەستىرىلدى.
وبلىستىڭ مادەني, تاريحي كەلبەتىن ايقىندايتىن 2000-عا جۋىق قۇندى جادىگەر مەن قىلقالام جانە قولونەر شەبەرلەرىنىڭ تۋىندىلارى دا استانا حالقى مەن ەكسپو قوناقتارى نازارىنا ۇسىنىلدى. سونىڭ ىشىندە قازاق تاريحىندا ورنى ايىرىقشا كەنەسارى قاسىم ۇلىنىڭ قىلىشى دا بار.
ەتنو اۋىلداعى ۇلىق مەرەكەنىڭ كوركىن وڭتۇستىك قازاقستان وبلىستىق فيلارمونياسىنىڭ انشىلەرى قىزدىرا ءتۇستى. كۇمىس كومەي, جەز تاڭداي انشىلەر كيىز ۇيلەردى ارالاي ءجۇرىپ, قازاقتىڭ ءداستۇرلى اندەرىن ناقىشىنا كەلتىرىپ ورىنداپ, كوپشىلىكتىڭ ىقىلاسىنا بولەندى.
