ەلىمىز ءوزىنىڭ شيرەك عاسىرلىق ىرگەلى مەملەكەت رەتىندە دامۋى كەزەڭىندە قوعامدىق قاتىناستاردىڭ بارلىق سالاسىندا دا جاڭا تابىستارعا جەتتى. بارلىق جەتىستىكتەر مەملەكەت باسشىسىنىڭ جان-جاقتى, سىندارلى ءارى ناقتى ستراتەگياسىنىڭ, سونداي-اق, مەملەكەتتىك جانە قوعامدىق دامۋدىڭ بەرىك كونستيتۋتسيالىق نەگىزدەرىنىڭ ارقاسىندا مۇمكىن بولدى. وسى تۇرعىدان العاندا قازاقستان كونستيتۋتسياسى ەلىمىزدىڭ جەمىستى مەملەكەتتىك ستراتەگيانىڭ ساياسي قۇقىقتىق, دۇنيەتانىمدىق جانە يدەولوگيالىق نەگىزى بولىپ تابىلادى.
اتا زاڭ – مەملەكەت پەن جەكە ادامنىڭ بوستاندىعى جانە ءوزارا جاۋاپكەرشىلىك قاعيداتتارىنا كەپىلدىك بەرەتىن اسا ماڭىزدى قۇرال. قازاقستاندىق دامۋ ستراتەگياسىنىڭ جوعارى كونستيتۋتسيالىق دەڭگەيى ونىڭ بارلىق مەملەكەتتىك قۇقىقتىق ينستيتۋتتارىنىڭ ءتيىمدى جۇمىس ىستەۋىنىڭ كەپىلى. كونستيتۋتسيادا قازاقستاندىق قوعامنىڭ دۇنيەتانىمدىق دامۋ باعدارلارى ايقىندالعان. اتا زاڭنىڭ يدەيالارىن, پرينتسيپتەرى مەن نورمالارىن تولىق جانە دايەكتى ىسكە اسىرۋ – قازاقستاندى قۇقىقتىق تۇرعىدان دامىتۋدىڭ باستى ماقساتى. كونستيتۋتسيا وزگەرىلمەيتىن قۇقىقتىق قۇجات ەمەس. ول ءومىر زاڭدىلىقتارىنا يكەمدەلگەن باعدارلاما جانە قۇقىقتىق قولداۋ نەگىزى. سوندىقتان قازاقستاننىڭ كونستيتۋتسيالىق دامۋى احۋالدىڭ وزگەرۋىن جانە قوعامنىڭ قاجەتتىلىگىن ەسكەرە وتىرىپ, ودان ءارى جالعاسۋدا.
بيىلعى جىلى كونستيتۋتسيالىق رەفورماعا سايكەس, پرەزيدەنت, پارلامەنت پەن ۇكىمەت اراسىندا بيلىك وكىلەتتىكتەرىن جانە مەملەكەتتىك بيلىكتى ءبولۋ جۇمىستارى جۇزەگە اسىرىلعانى بەلگىلى. مەملەكەت باسشىسىنىڭ قۇقىقتىق وكىلەتتىلىگى ناقتىلانىپ, ونىڭ بىرقاتار فۋنكتسيا-لارى ۇكىمەتكە بەرىلدى. ۇكىمەتتىڭ پارلامەنتكە ەسەپ بەرۋى جانە ونىڭ باقىلاۋىندا بولۋ تەتىگى كۇشەيتىلدى. جوعارعى سوتتىڭ سوت جۇيەسىندەگى فۋنكتسيالارىن جانە سۋديا بولۋعا ۇمىتكەرلەرگە قويىلعان تالاپتاردى بەلگىلەۋدىڭ زاڭنامالىق دەڭگەيىن انىقتايتىن ناقتىلاۋلار جانە تۇزەتۋلەر ەنگىزىلدى. جالپى, سوت جۇيەسى قازاقستاننىڭ دامۋىنا ءوز ۇلەسىن ۇنەمى قوسىپ كەلەدى.
مەملەكەت باسشىسى نۇرسۇلتان نازارباەۆ ءوز سوزىندە: ءححى عاسىردا ۇلتتىڭ دامۋىنداعى ماڭىزدى كريتەري – ول ءمىنسىز جانە ءتيىمدى سوت جۇيەسى, تاۋەلسىز جانە ءادىل سوت كەز كەلگەن مەملەكەتتىڭ قىزمەتتىك دىڭگەگى. ونسىز الەمنىڭ بىردە-ءبىر ەلىندە, ءتىپتى ەڭ دامىعان مەملەكەتتەردىڭ وزىندە دە قولايلى ينۆەستيتسيالىق احۋالدىڭ, ازاماتتاردىڭ ءال-اۋقاتىنىڭ جوعارى دەڭگەيىنىڭ بولۋى, قوعامنىڭ تابىستى تۇردە دامۋىنىڭ ورىن الۋى مۇمكىن ەمەس – دەگەن بولاتىن.
جەكەلەگەن ەلدەردىڭ بىزدەگى كونستيتۋتسيالىق رەفورماعا قىزىعۋشىلىق تانىتىپ وتىرعانىن اتاپ ءوتۋ كەرەك. بۇل, اسىرەسە, قازىرگى زامانعى مەملەكەتتەردىڭ ساياسي قۇقىقتىق جانە الەۋمەتتىك-ەكونوميكالىق دامۋىن ايقىنداۋ كەزەڭىندە وتە ماڭىزدى.
قايرات ءمامي,
جوعارعى سوت توراعاسى
