جىل سايىن استانا مەشىتتەرى جاناشىر ازاماتتاردىڭ قولداۋىمەن 800-گە جۋىق وقۋشىنى مەكتەپكە دايىندايدى. قالا مەشىتتەرىندەگى «مەكتەپكە جول» اكتسياسى بيىل «نۇر استانا» ورتالىق مەشىتىنەن باستاۋ الدى. ءداستۇرلى شاراعا قمدب نايب ءمۇفتيى, استانا قالاسىنىڭ باس يمامى ناۋرىزباي قاجى تاعان ۇلى, استانا قالاسى ءدىن ىستەرى باسقارماسىنىڭ باسشىسى دانيار ەسين جانە "نۇر استانا" ورتالىق مەشىتىنىڭ قۇرمەتتى اقساقالى اۋدانباي قاجى احمەتجانوۆ قاتىسىپ, جينالعانداردى كەلە جاتقان ءبىلىم كۇنىمەن قۇتتىقتادى.
الەۋمەتتىك جاعدايى تومەن جانە كوپبالالى وتباسىلاردىڭ بالالارىنا باعىتتالعان وسى يگى ءىس اياسىندا 1-11 سىنىپ وقۋشىلارىنا دەمەۋ كورسەتىلدى.
– يسلام ءدىنى ءبىلىم-عىلىمعا اسا ۇلكەن ءمان بەرگەن. سەبەبى, قۇراننىڭ العاشقى اياتى «يقرا», ياعني, «وقى!» دەپ تۇسكەن. پايعامبارىمىز مۇحاممەد (س.ع.س.) ءبىر حاديسىندە «كىم دە كىم ءبىلىم ىزدەنۋ جولىنا شىقسا, اللا تاعالا ول ادامنىڭ جۇماققا باراتىن جولىن جەڭىلدەتىپ, پەرىشتەلەر ونىڭ تابانىنىڭ استىنا قاناتتارىن توسەيدى» دەگەن ەكەن. ياعني وقۋشىلاردىڭ جولدارى وتە ماڭىزدى ءارى ساۋاپتى. وسىنى ەسكەرىپ, ءبىز دە «مەكتەپكە جول» اتتى قايىرىمدىلىق اكتسياسىن ۇيىمداستىرىپ جاتىرمىز. سەبەبى قاسيەتتى قۇراننىڭ ء«مايدا» سۇرەسىنىڭ 2-ءشى اياتىندا «...جاقسىلىققا, تاقۋالىققا جاردەمدەسىڭدەر» دەپ, ادامزاتتى ىزگى ىستەردى قولداۋعا بۇيىرادى. ءوز كەزەگىندە ەلباسىمىز نۇرسۇلتان نازارباەۆ تا بيىلعى قازاقستان حالقىنا ارناعان جولداۋىندا «كومەككە مۇقتاج ازاماتتارىمىزعا كوبىرەك كوڭىل ءبولۋ كەرەك. ولار ءۇشىن قازاقستان كەدەرگىسىز ايماققا اينالۋعا ءتيىس» دەپ, ءاربىر اۋقاتتى قازاقستاندىقتىڭ الەۋمەتتىك سالاعا كوڭىل ءبولۋىن ۇندەگەن ەدى, - دەدى قمدب نايب ءمۇفتيى, «نۇر استانا» ورتالىق مەشىتىنىڭ باس يمامى ناۋرىزباي قاجى تاعان ۇلى. سونداي-اق, ول ساۋاپتى ىستەردەن قالىس قالماي, «نۇر استانا» ورتالىق مەشىتىنىڭ وسى ءبىر يگى باستاماسىنا قولۇشىن بەرىپ, قولداۋ كورسەتكەن ازاماتتارعا ريزاشىلىعىن ءبىلدىردى.
– مەن كوپبالالى انامىن. بەس بالام بار, ونىڭ 3-ەۋى مەكتەپكە بارسا, ءتورتىنشىسى ءبىرىنشى سىنىپقا ەندى قادام باسىپ جاتىر. ەكى جىل قاتارىنان مەشىتتەگى «مەكتەپكە جول» اكتسياسىنىڭ شاراپاتىن سەزىنىپ كەلەمىز. بالالاردى وقۋعا دايىنداۋ وڭاي ەمەس. ارقايسىسىنا قىرۋار اقشا كەتەتىنىن كەز كەلگەنى بىلەدى. مەشىتتەگى قايىرىمدىلىقتىڭ ارقاسىندا وسى قيىندىقتى جەڭىل ەڭسەرىپ كەلەمىز. مەشىت ۇجىمىنا العىس بىلدىرەمىن. بالالارىم ساباقتى جاقسى وقيدى دەپ سەنەمىن, - دەدى وسى ءىس-شارادا مەكتەپكە باراتىن 4 بالاسىنا كومەك العان بايان جامانعارينوۆا.
ال, قىزى 3-ءشى سىنىپقا كوشكەن جالعىزباستى انا ارايلىم وماروۆا:
- قىزىم ءماز. ونىڭ قۋانىشىن كورىپ مەن دە ريزامىن. ءالى مەكتەپكە دايىندالعان جوق ەدىك. وتكەندە وسى اكتسيا تۋرالى ەستىپ ءوتىنىش جازىپ كەتكەنبىز. ەندى بۇگىن قاجەتتى قۇرال-جابدىقتارعا قول جەتكىزىپ جاتىرمىز. جالپى, مەشىتتەردە قايىرىمدىلىقتىڭ ۇزبەي بەرىلۋى ماعان كوپ كومەگىن تيگىزدى. ماسەلەن, قالا مەشىتتەرىنەن ءدارى-دارمەككە قاجەت اقشالاي كومەك تە, ازىق-ت ۇلىك تە, اراسىندا ەت تە بەرىلىپ تۇرادى. وسىنداي شارالارعا اتسالىسقان ءاربىر جاناشىر ازاماتقا اللا تاعالا رازى بولسىن! – دەگەن العىسىن جەتكىزدى.
«نۇر استانا» ورتالىق مەشىتىنەن باستاۋ العان يگى شارا قالاداعى باسقا دا مەشىتتەردە ءوز جالعاسىن تاۋىپ, الداعى ۋاقىتتا قالا بويىنشا جالپى سانى 600-گە جۋىق بالانى قامتاماسىز ەتۋ جوسپارلانۋدا.
