ا.كامالدينوۆ كورول حاماد بەن يسا ءال حاليفاعا قازاقستان پرەزيدەنتى نۇرسۇلتان نازارباەۆتىڭ 2017 جىلعى 10-11 قىركۇيەكتە استانادا وتەتىن يسلام ىنتىماقتاستىعى ۇيىمىنىڭ (يىۇ) عىلىم جانە تەحنولوگيالار جونىندەگى ءبىرىنشى سامميتىنە قاتىسۋ ءۇشىن جولداعان شاقىرۋىن تاپسىردى. اتالعان باستامانى مەملەكەت باسشىسى ءبىرىنشى رەت 2016 جىلعى ساۋىردە ىستانبۇلدا وتكەن يىۇ-نىڭ 13-ءشى ءسامميتى شەڭبەرىندە جاريا ەتكەن بولاتىن.
عىلىمي جانە تەحنولوگيالىق الەۋەتتى دامىتۋ سالاسىندا مۇسىلمان قاۋىمىنىڭ كۇش-جىگەرىن بىرىكتىرۋگە باعىتتالعان استانا سامميتىنە ۇيىمعا مۇشە بارلىق مەملەكەت (55 ەل), سونداي-اق, بايقاۋشى مەملەكەتتەر مەن بىرقاتار باسقا دا حالىقارالىق جانە وڭىرلىك ۇيىمداردىڭ ءبىرىنشى باسشىلارى شاقىرىلادى. سامميت قوناقتارىنىڭ 10 قىركۇيەكتە ەكسپو-2017 حالىقارالىق مامانداندىرىلعان كورمەسىنىڭ رەسمي جابىلۋ سالتاناتىنا قاتىسۋلارى دا كۇتىلىپ وتىر.
باحرەين كورولى قازاقستان پرەزيدەنتىنىڭ شاقىرۋىن ۇلكەن ريزاشىلىقپەن قابىل الدى جانە بۇل باستاما يسلام الەمىنىڭ ىلگەرىلەۋى مەن دامۋىن قولداۋ تۇرعىسىندا ماڭىزدى ەكەندىگىن اتاپ ءوتتى. ول پرەزيدەنت ن.نازارباەۆتىڭ بىتىمگەر جانە عالامدىق ساياساتكەر رەتىندەگى رولىنە جوعارى باعا بەردى.
كەزدەسۋ بارىسىندا باحرەيندىك مونارح الداعى يىۇ سامميتىنە ءوزىنىڭ قاتىسۋى تۋرالى نيەتىن ءبىلدىردى.
سونىمەن قاتار, قازاقستان پرەزيدەنتىنىڭ ارنايى وكىلى مەملەكەت باسشىسىنىڭ ءارتۇرلى جانجالداردى شەشۋ بويىنشا ستراتەگيالىق ماقساتقا قول جەتكىزۋ مەن مۇسىلمان ەلدەرىنىڭ ەكونوميكالىق ىنتىماقتاستىعى ءۇشىن قولايلى جاعداي تۋدىرۋعا باعىتتالعان وزگە دە ايتۋلى باستامالارى − يسلامدىق تاتۋلاسۋ ۇدەرىسى جانە «يسلامدىق ينفراقۇرىلىمدىق ينتەگراتسيا» باعدارلامالىق قۇجاتىن ازىرلەۋ تۋرالى ايتتى.
جالپى العاندا, تاراپتار كەلىسسوزدەر بارىسىندا استانا مەن ماناما اراسىنداعى ءارتۇرلى سالالارداعى ەكىجاقتى ىنتىماقتاستىقتى جانداندىرۋ جولدارىن, سونداي-اق, ەكى ەلدىڭ حالىقارالىق ۇيىمدار, سونىڭ ىشىندە يىۇ شەڭبەرىندەگى ءوزارا ءىس-قيمىلىنىڭ جاعدايى مەن بولاشاعىن تالقىلادى.
باحرەيننىڭ سىرتقى ىستەر ءمينيسترى شەيح حالەد بەن احماد ءال حاليفامەن بولعان كەزدەسۋدە ەكىجاقتى ىنتىماقتاستىقتىڭ, حالىقارالىق جانە ايماقتىق ساياساتتىڭ وزەكتى ماسەلەلەرى تالقىلاندى. جۋىق ارادا قازاقستان-باحرەين ۇكىمەتارالىق كوميسسياسىن قۇرۋ, سىرتقى ىستەر مينيسترلىكتەرى اراسىندا كونسۋلتاتسيالار وتكىزۋ, نەگىزگى ەكىجاقتى قۇجاتتارعا قول قويۋ, باحرەيندىك بيزنەس-دەلەگاتسيانىڭ قازاقستانعا ساپارىن ۇيىمداستىرۋ جانە ت.ب. بويىنشا ۋاعدالاستىقتارعا قول جەتكىزىلدى.
كورولدىكتىڭ ءبىلىم ءمينيسترى ءماجيت بەن ءالي ءال-نۋەيميمەن كەزدەسۋدە ءبىلىم باعدارلامالارى شەڭبەرىندەگى ىنتىماقتاستىق سالاسىنداعى ەكى ەلدىڭ ءوزارا ءىس-قيمىلىن دامىتۋ جولدارى, ستۋدەنتتەرمەن جانە عىلىمي ورتالىقتار اراسىندا تاجىريبە الماسۋ جانە ت.ب. ماسەلەلەر قاراستىرىلدى.
