جاپونيا ەكسپو كورمەسىنە مىقتاپ دايىندالىپتى. پاۆيلوندى تانىستىراتىن 40 جاستى كونكۋرس ارقىلى تاڭداپ العان. ولارعا قازاق ءتىلىن ءبىلۋ مىندەتتەلگەن. ستەندشى ۇل-قىزدار تىم بولماسا, سالەمدەسۋ, قوشتاسۋ, العىس ءبىلدىرۋدى قازاقشا ايتۋى ءتيىس بولعان.
جاپون پاۆيلونىندا قازاق تىلىنە سۋداي ەكى جاپون قىزى بار. سونىڭ ءبىرى – ميزۋكي كوزاسا. ول توكيو شەت تىلدەرى ۋنيۆەرسيتەتىن بىتىرگەن. قازىر وسىندا ماگيستراتۋرادا وقيدى. قىزىعى سول, ميزۋكي وسى وقۋ ورداسىنىڭ «قازاق حالقىنىڭ ەتنوگرافياسى» فاكۋلتەتىندە ءبىلىم الىپتى.
«مەنى يسلام ءدىنى, شامانيزم ەرەكشە قىزىقتىرادى. وسى جونىندە اقپاراتتاردى ينتەرنەتتەن قاراپ وتىرىپ, قازاقتار تۋرالى مالىمەتتەرگە كەزىكتىم. قازاق ءتىلىن ۇيرەنۋگە دەگەن قۇشتارلىعىم وسىدان باستالدى. ءتىل ۇيرەنۋ ءۇشىن سوناۋ جاپونيادان الماتىعا ارنايى كەلىپ, ءال-فارابي اتىنداعى قازاق ۇلتتىق ۋنيۆەرسيتەتىنىڭ دايىندىق توبىندا ءبىر جىل وقىدىم. ءتىلدى دە وسى كەزدە ۇيرەندىم. قازىر قازاق دوستارىم دا كوپ», دەيدى ميزۋكي.
ول قازاق پەن جاپون داستۇرىندە ۇقساستىقتار كوپ ەكەنىن ايتادى. اسىرەسە, ۇلكەندى قۇرمەتتەۋ, كىشىگە ىزەت كورسەتۋ, بارعا – قاناعات, جوققا سابىر ەتۋ سەكىلدى ادامگەرشىلىك پايىمداردى جاپوندار دا جاقسى سىڭىرگەن. ميزۋكيدىڭ ايتۋىنشا, جاپون تىلىندە «موتتايناي» جانە «اريگوتاي» دەگەن سوزدەر بار. جاپوندىقتاردىڭ تۇسىنىگىنشە, بۇل كەز كەلگەن نارسەنى شۇكىرشىلىكپەن قابىلداپ, قولدا باردى ۇقساتىپ, جوققا تارىلماۋ دەگەن ءسوز. بۇل قاعيدات جاپونيانىڭ ەنەرگيانى تۇتىنۋىنا دا قاتىستى ايتىلادى. سەبەبى, بۇل ەلدىڭ تابيعي رەسۋرستارى از. سوندىقتان, جاپونيا بالامالى ەنەرگيا سالاسىنا ايرىقشا ءمان بەرىپ, بۇل سالاداعى تەحنولوگيانى ءتيىمدى دامىتىپ كەلەدى.
قىمبات توقتامۇرات,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات,
«ەگەمەن قازاقستان»
