بۇگىن استاناداعى ماڭعىستاۋ وبلىسىنىڭ مادەنيەت كۇندەرى اياسىندا ەكسپو الاڭىندا ورنالاسقان «Kazakh Invest» پاۆيلونىندا ماڭعىستاۋ وبلىسىنىڭ اكىمى ەرالى توعجانوۆ پەن 10-نان اسا شەتەل ەلشىلەرىنىڭ قاتىسۋىمەن ينۆەستيتسيالىق كەزدەسۋ ءوتتى. شارا اياسىندا ءوڭىر باسشىسى ماڭعىستاۋ وبلىسىنىڭ ينۆەستيتسيالىق پوتەنتسيالى تۋرالى باياندادى.
- ەلباسى العا قويعان مىندەتتەردى ىسكە اسىرۋدا, سونىڭ ىشىندە ينۆەستيتسيا تارتۋ باعىتىندا ماڭعىستاۋ وبلىسىندا قول جەتكەن جەتىستىكتەر بارشىلىق. بۇگىنگى تاڭدا وبلىستىڭ ينۆەستيتسيالىق پورتفەلىندە جۇزەگە اسىپ جاتقان 49 جوبا جانە 2 ملرد اقش دوللار سوماسىنا بىرنەشە جوبانى ىسكە اسىرۋ كوزدەلگەن. «اقتاۋ تەڭىز پورتى» ارنايى ەكونوميكالىق ايماعى ىسكە قوسىلعاننان بەرى 74 ملرد تەڭگە ينۆەستيتسيا تارتىلىپ, 231 ملرد تەڭگەنىڭ ءونىمى ءوندىرىلىپ, بيۋدجەتكە 19 ملرد تەڭگە كولەمىندە سالىقتار تولەندى. ايماقتا 12 مەكەمە بەلسەندى قىزمەت ەتۋدە جانە مىڭنان استام جۇمىس ورنىن قۇرىلعان. وسى ورايدا ماڭعىستاۋ وبلىسىنىڭ الەۋەتى زور, كەلەشەگى كەلىستى دەپ بىلەمىن, – دەدى ماڭعىستاۋ وبلىسىنىڭ اكىمى ەرالى توعجانوۆ.
باسقوسۋ اياسىندا ماڭعىستاۋ وبلىسى اكىمدىگى مەن بىرنەشە شەتەلدىك كومپانيالار اراسىندا مەموراندۋمعا قول قويىلدى. مۇنايلى ماڭعىستاۋ قىتايلىق ينۆەستورلارمەن ەكونوميكانىڭ سان ءتۇرلى سالاسىندا سەنىمدى سەرىكتەستىك ورناتىپ كەلەدى.
«سITIC Group Corporation» كورپوراتسياسىنىڭ وكىلدەرى ماڭعىستاۋ وبلىسى قاراجانباس كەنورنىندا سۋ تۇششىتۋ زاۋىتىن سالۋ جوباسىن ىسكە اسىرماق. وسى ماقساتتا ءوڭىر باسشىسى ەرالى توعجانوۆ پەن شەتەلدىك كومپانيا باسشىسى اراسىندا ەكى جاقتى مەموراندۋمعا قول قويدى.
سونداي-اق, اقتاۋ قالاسىنىڭ اكىمى سەرىكباي ترۇموۆ يتاليا ەلىنىڭ وكىلىمەن لونيگا قالاسى اراسىندا باۋىرلاستىق جونىندەگى كەلىسىمگە قول قويدى. ماقسات - قوس قالانىڭ مادەني سالادا بايلانىستارىن نىعايتىپ, تۋريزم جانە الەۋمەتتىك-ەكونوميكالىق سالالاردىڭ دامۋىنا ىقپال ەتۋ, تاجىريبە الماسۋ.
ال وبلىس اكىمى فين ەلىنىڭ «ۆارسيلا» مەكەمەسىمەن ماڭعىستاۋدا 250 مەگاۆاتتىق ەلەكترستانتسياسىن سالۋ جونىندە كەلىسىم شارتقا قول قويدى.
