مىنبەگە ءبىرىنشى بولىپ كوتەرىلگەن ء«بىلىم» كوميسسياسىنىڭ ءتورايىمى, وبلىستىق ءماسليحاتتىڭ دەپۋتاتى عابۋرا بوستەكوۆانىڭ ايتۋىنشا, ءۇش اۋىسىمدىق جانە اپاتتى جاعدايداعى مەكتەپتەردىڭ ماسەلەسى تولىق شەشىلگەن. 3 پەن 6 جاستاعى بالدىرعانداردى مەكتەپكە دەيىنگى مەكەمەلەرمەن قامتۋ 99,6 پايىزدى قۇرايدى.
ول ءوز سوزىندە قالادا جۇمىس ىستەيتىن 125 قىسقا مەرزىمدى شاعىن ورتالىقتاردا ءبىلىم, تاربيە ساپاسىنىڭ تومەندىگىن ايتا كەلىپ, ولاردىڭ سانىن قىسقارتۋدى ۇسىندى. كەرىسىنشە, «بەرەكە», «جاس وركەن» شاعىن ورتالىقتارى بالاباقشاعا مۇقتاج. سول سياقتى 3 جاسقا دەيىنگى بالاقايلاردى مەكتەپكە دەيىنگى تاربيەمەن قامتۋ جايى دا وتكىر كۇيىندە قالىپ وتىر. مەملەكەت-جەكەمەنشىك ارىپتەستىگى شەڭبەرىندە 19 عانا مەكەمە بار. بۇل سالادا ىلگەرىلەۋ باياۋ. اسىرەسە, پەداگوگ كادرلارىنىڭ جەتىسپەۋشىلىگى ايقىن سەزىلەدى. بۇگىنگى تاڭدا 253 شتات بوس تۇر. 47 ماتەماتيك تاپشى. ونىڭ بىردەن-ءبىر سەبەبىنە اۋىلدىق جەرلەردەگى وقۋشىلار سانىنىڭ ازدىعى كولدەنەڭ تارتىلدى.
وبلىستىق فيليال توراعاسى, ايماق باسشىسى قۇمار اقساقالوۆ اۋىلدىق مەكتەپتەردە 6-7 بالا وقىسا دا, ساپالى بىلىممەن قامتاماسىز ەتۋ باستى تالاپ بولىپ تابىلاتىنىن, ماسەلەنى جان-جاقتى سارالاۋ قاجەتتىگىن, ورىن العان كەمشىلىكتەردى جويۋعا جەرگىلىكتى اتقارۋشى ورىنداردى دا جۇمىلدىرۋدى اتاپ كورسەتتى.
وبلىستىق ءبىلىم باسقارماسىنىڭ باسشىسى گۇلميرا كارىموۆا ءوز حابارلاماسىندا ءبىلىم بەرۋ سالاسىندا 15846 مۇعالىم ەڭبەك ەتەتىنىن, ولاردىڭ 53 پايىزى جوعارى جانە ءبىرىنشى ساناتقا يە ەكەنىن جەتكىزدى. جاڭارتىلعان باعدارلاما شەڭبەرىندە 8400 وقۋشى ءبىلىم العان. جاڭا وقۋ جىلىنان باستاپ 30 مىڭ وقۋشى قامتىلماق. «ديپلوممەن – اۋىلعا» باعدارلاماسى اياسىندا بىلتىر 360 جاس مامان ەلدى مەكەندەرگە ورنالاستىرىلسا, بيىل 510 مامان كەلەدى دەپ كۇتىلۋدە. اتقارىلعان جۇمىستارعا قاراماستان جاس مامانداردىڭ ۇلەسى 3,8 پايىز عانا. ولارعا الەۋمەتتىك قولداۋ جان-جاقتى جاسالمايتىندىقتان, تۇراقتاي بەرمەيدى. ۋنيۆەرسيتەت پەن كوللەدجدەردە پەداگوگ ماماندىقتارى از دايىندالاتىنى كوپتەن بەرى كوتەرىلىپ كەلەدى. كەي ماماندىقتار بويىنشا 5-6 ادام عانا وقيدى. ۇلتتىق بىرىڭعاي تەستىلەۋ قورىتىندىسى قاناعاتتاندىرمايتىنىن اتاپ كورسەتكەن قۇمار ىرگەباي ۇلى جاعدايعا تالداۋ جاساۋدى جۇكتەدى.
مامليۋت اۋدانىنىڭ اكىمى ەربولات بەكشەنوۆ پەن «نۇر وتان» پارتياسى قىزىلجار اۋداندىق فيليالى توراعاسىنىڭ ءبىرىنشى ورىنباسارى دانيار ءابۋتالىپ «ارداگەرلەردى ارداقتايىق!», «كەدەرگىسىز كەلەشەك» باعدارلامالارىنىڭ ورىندالۋ بارىسى جايلى باياندادى. مامليۋت اۋدانىندا 25 ءىس-شارا وتكىزىلىپ, مۇمكىندىگى شەكتەۋلى 6 ادام جۇمىسقا ورنالاستىرىلعان. عيماراتتارعا قيىندىقسىز كىرۋ ۇنەمى قاداعالانىپ وتىرادى. قىزىلجار اۋدانىندا جەتى جوبا بويىنشا 236 شارا ۇيىمداستىرىلىپ, ولارعا 7 مىڭنان استام ادام قاتىسقان. 343 قاريا مەن 17 مىسكىن جانعا تۇراقتى قولداۋ كورسەتىلەدى. «باقىتتى بالالىق شاق» جوباسى اياسىندا 102 جەتىم بالا قامقورلىققا الىنعان. تۇرعىنداردىڭ سۇرانىسىنا زەر سالۋ, كۇندەلىكتى تۇرمىس-تىرشىلىگىن ءبىلۋ اسا ماڭىزدى. وكىنىشكە قاراي, كەي جەرلەردە ءبىر مۇگەدەك جاندى اي سايىن جۇمىسقا ورنالاستىرىپ, بىرنەشە جاڭا جۇمىس ورنىن اشقان سياقتى ەسەپ بەرۋ فاكتىلەرى كەزدەسەدى, دەدى فيليال توراعاسى. وسى جاعىن ىقتياتتاۋدى مىندەتتەدى.
فيليال توراعاسىنىڭ ءبىرىنشى ورىنباسارى ارتۋر مولداعۇلوۆ ساياسي ۇيىمنىڭ «بىرلىك. تۇراقتىلىق. جاسامپازدىق» اتتى سايلاۋالدى باعدارلاماسىنىڭ 8 باعىتى بويىنشا پارتيالىق كۋراتورلاردىڭ اتقارعان جۇمىستارىنا تالداۋ جاساپ, كەيبىرىنە كوڭىل تولماۋشىلىق ءبىلدىردى. تاپسىرىلعان ۋچاسكەلەرگە ءجۇردىم-باردىم قاراعان «يندۋستريالىق دامۋ» كوميسسياسىنىڭ توراعاسى قۋانىش ءبيشىموۆ پەن «شاعىن جانە ورتا كاسىپكەرلىكتى قولداۋ» ساراپتاما توبىنىڭ ۇيلەستىرۋشىسى گيۋلاگا يلدىرىموۆقا پارتيالىق جازا قولدانۋ ۇسىنىسى ماقۇلداندى.
ق.اقساقالوۆ الداعى ۋاقىتتا مۇنداي دەپۋتاتتاردىڭ كۋراتورلىققا لايىقتى-لايىقسىزدىعىن شەشۋدى تاپسىردى. پارتيالىق جوبالار شەڭبەرىندە جۇزەگە اسىرىلاتىن ءىس-شارالاردىڭ اۋقىمدىلىعىمەن قوسا, ساپاسى باستى نازارعا الىنۋىن ەرەكشە ەسكەرتتى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
