ايماق باسشىسى قۇمار اقساقالوۆ اۋدانداردى ارالاۋ كەزىندە ەگىستىك القاپتارىن ءارتاراپتاندىرۋدىڭ نارىقتىق قاجەتتىلىگىن اتاپ كورسەتتى. بۇل باعىتتار بويىنشا اتقارىلعان اۋقىمدى شارالار قازاقستاننىڭ الەم بويىنشا جاسىمىق وسىرۋدەن بەسىنشى, ال ونى ەكسپورتتاۋدان ءتورتىنشى ورىننان كورىنۋىنە مۇمكىندىكتەر بەرمەك. ونىڭ ءبىر تونناسىنىڭ وزىندىك قۇنى 32 مىڭ تەڭگەنى قۇراسا, ساتىلىم باعاسى 180-200 مىڭ تەڭگەگە باعالانادى. جەرگىلىكتى اگروقۇرىلىمدار دا مايلى داقىلداردىڭ پايداسى شاش-ەتەكتەن ەكەنىن ءتۇسىنىپ, كولەمىن كوبەيتۋمەن بىرگە, الا جاز بويى كۇتىپ-باپتاۋ جۇمىستارىن قاجەتتى اگروتەحنيكالىق تالاپتارعا ساي اتقارا ءبىلدى. قازىرگى كۇنى ەگىس تاناپتارى ماساتىداي قۇلپىرىپ, ماساقتارى كەرە قارىس ءداندى داقىلدار كوز جاۋىن الادى. جەردى ءتيىمدى پايدالانا بىلۋگە مەملەكەت تاراپىنان بەرىلگەن جەڭىلدىكتى سۋبسيديالاردىڭ جاردەمى ايتارلىقتاي بولدى. ەرتە پىسەتىن, ەليتالى تۇقىمدار ەگۋ كورسەتكىشتەرى ارتتى.
وتكەن جىلعا قاراعاندا, اۋا رايىنىڭ ءبىرشاما قولايلى بولۋى وتان قامباسىنا مول استىق قۇيۋعا مۇمكىندىك بەرىپ, نەگىزگى ماقسات ەندى جيىن-تەرىمدى ۇيىمشىلدىقپەن وتكىزىپ, شاشپاي-توكپەي جيناپ الۋعا باعىتتالعان. ول ءۇشىن قاجەتتى 75 مىڭ توننا ارزانداتىلعان جانار-جاعارمايدىڭ 45 مىڭ توننادايى جەتكىزىلدى. جاۋاپتى ناۋقانعا توعىز مىڭعا جۋىق كومبايننىڭ قاتىساتىنى بەلگىلەنسە, ونىڭ ۇشتەن ءبىرى وسى زامانعى قۋاتتى تەحنيكالار سانالادى. استىق قابىلدايتىن 50 ەلەۆاتور دايىن.
بۇگىندە وڭىردە جاسىمىققا شالعى ءتۇسىپ, جاۋاپتى ناۋقان باستالىپ كەتتى. ونىمدىلىك جاقسى. بەرەكەلى گەكتارلار الدا ەكەنىن ەسكەرسەك, ەكسپورتتاۋ مولشەرىنىڭ ۇلعايا تۇسەرى ءسوزسىز.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
