باسقوسۋدا ەكىجاقتى ىنتىماقتاستىقتىڭ وزەكتى ماسەلەلەرى, سونىڭ ىشىندە ساۋدا-ەكونوميكالىق قارىم-قاتىناستاردى ودان ءارى دامىتۋ بويىنشا 2017-2018 جىلدارعا ارنالعان بىرلەسكەن شارالاردىڭ جوسپارىن ىسكە اسىرۋ بارىسى تالقىلاندى.
جيىندا الدىمەن باقىتجان ساعىنتاەۆ ءسوز سويلەپ, قازاقستان-بەلارۋس قارىم-قاتىناسى جىل ساناپ ىلگەرىلەپ, دامىپ جاتقانىن اتاپ ءوتتى. «ەكى ەل اراسىنداعى ءتۇرلى سالاداعى بايلانىستار دوستىق پەن ىنتىماقتاستىق رۋحىندا قارقىندى تۇردە وركەندەپ كەلەدى. وسى ورايدا ءبىزدىڭ ەلدەردىڭ كوشباسشىلارىنىڭ ءرولى ايرىقشا. قازىرگى كەزدە ەلباسى نۇرسۇلتان نازارباەۆتىڭ مينسكىگە ساپارىنا قىزۋ دايىندىق ۇستىندەمىز. مەملەكەت باسشىسىنىڭ ساپارى قازاقستان-بەلارۋس قاتىناستارىن بۇرىنعىدان دا ىلگەرىلەتە تۇسۋگە ەلەۋلى سەرپىن بەرەدى دەپ بولجاپ وتىرمىز», دەدى ب.ساعىنتاەۆ.
ءوز كەزەگىندە اندرەي كوبياكوۆ قازاقستان تاراپىنىڭ قوناقجايلىعى ءۇشىن العىسىن ءبىلدىردى. «بيىل – ەلدەرىمىز ءۇشىن مەرەيتويلى جىل. ءبىز 25 جىل بۇرىن ديپلوماتيالىق قاتىناستاردى ورناتتىق. وسى ۋاقىت ارالىعىندا ىنتىماقتاستىعىمىز ستراتەگيالىق مانگە يە بولدى. قازاقستان – ءبىزدىڭ ماڭىزدى ءارى ساۋدا اينالىمى كولەمى بويىنشا سەنىمدى سەرىكتەسىمىز, سىزدەرمەن ەكىجاقتى, سونداي-اق, ينتەگراتسيالىق تۇرعىدا ءارى حالىقارالىق ۇيىمدار اياسىندا جوعارى دەڭگەيدەگى ءوزارا ءىس-قيمىلداردى قولداپ كەلەمىز», دەدى بەلارۋس ۇكىمەتىنىڭ باسشىسى.
باسقوسۋدا ەكى تاراپ ساۋدا-ەكونوميكالىق ىنتىماقتاستىق جونىندەگى قازاقستان-بەلارۋس ۇكىمەتارالىق كوميسسياسى قىزمەتىنە قاتىستى ماسەلەلەردى قارادى جانە بيىل قىركۇيەك ايىندا قازاقستاندا وتەتىن كوميسسيانىڭ كەزەكتى 13-وتىرىسىن تالقىلادى. سودان كەيىن مامىر ايىندا قازان قالاسىندا تمد ەلدەرىنىڭ ۇكىمەت باسشىلارى كەڭەسىنىڭ وتىرىسىندا قول قويىلعان, «قازاقستاندىق توكاماك» بازاسىنداعى تاجىريبەلىك كەشەندى بىرلەسىپ پايدالانۋ تۋرالى كەلىسىمنىڭ ىسكە اسىرىلۋ جاعدايىن ءسوز ەتتى.
تاراپتار ەۋرازيالىق ەكونوميكالىق وداق اياسىندا ءوزارا ءىس-قيمىل جاساسۋ ماسەلەلەرىنە نازار اۋداردى. ونەركاسىپتىك سالادا, كولىك جانە كوممۋنيكاتسيالار, سونداي-اق, عارىش سالاسىندا ىنتىماقتاستىقتى كەڭەيتۋ ماسەلەلەرى قارالدى. شارا سوڭىندا ب.ساعىنتاەۆ پەن ا.كوبياكوۆ ەكسپو-2017 كورمەسى مەن استانادا قۇرىلاتىن ستارتاپ-حاب اياسىندا بىرلەسكەن جوبالاردى ىسكە اسىرۋ كەلەشەگىن تالقىلادى.
ەكى ەلدىڭ پرەمەر-مينيسترلەرى باقىتجان ساعىنتاەۆ پەن اندرەي كوبياكوۆتىڭ كەزدەسۋى بىرقاتار ەكىجاقتى كەلىسىمدەرگە قول قويۋ راسىمىمەن جالعاستى. قازاقستان قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ پەن بەلارۋس ۇلتتىق عىلىم اكادەمياسىنىڭ تورالقا توراعاسى ۆلاديمير گۋساكوۆ عارىش كەڭىستىگىن بەيبىت ماقساتتاردا زەرتتەۋ جانە پايدالانۋ سالاسىنداعى ىنتىماقتاستىق تۋرالى ۇكىمەتارالىق كەلىسىمگە قول قويدى.
«حابار» اگەنتتىگى» اق باسقارما ءتورايىمى الماگۇل احمەتجانوۆا مەن بەلتەلەراديوكومپانيا توراعاسى گەننادي داۆىدكو ىنتىماقتاستىق تۋرالى كەلىسىمدى بەكىتتى. سونىمەن قاتار قازاقستان سىرتقى ساۋدا پالاتاسىنىڭ باسقارما توراعاسى ايان ەرەنوۆ پەن بەلارۋس ساۋدا-ونەركاسىپ پالاتاسىنىڭ توراعاسى ۆلاديمير ۋلاحوۆيچ ىنتىماقتاستىق تۋرالى كەلىسىمگە قول قويدى.
اسحات رايقۇل,
«ەگەمەن قازاقستان»
