ال الەم چەمپيوناتى تۋرالى جاعىمدى جاڭالىقتى باق وكىلدەرىنە قازاقستانداعى برازيليالىق جانە گرەپپلينگ فەدەراتسياسىنىڭ پرەزيدەنتى تولەگەن قۇماروۆ جەتكىزدى.
– ءبىزدىڭ قازاقستانداعى فەدەراتسيا 2013 جىلى قۇرىلعان. العاشىندا دجيۋ-دجيتسۋمەن اينالىساتىنداردىڭ باسىم بولىگى اقش-تا «بولاشاق» باعدارلاماسىمەن وقيتىن ستۋدەنتتەر ەدى. باستاپقى كەزدە تۋرنيرلەرگە 40-60 سپورتشى عانا قاتىساتىن. ەندى بۇل سپورت ءتۇرى ەلىمىزدە بالالاردىڭ دا, ەرەسەكتەر اراسىندا دا جاقسى دامۋدا. قازىرگى ءبىزدىڭ جارىستارعا قاتىسىپ جۇرگەن 600-گە جۋىق سپورتشى ءوزارا مىقتىنى انىقتايدى. توقسانىنشى جىلدارى UFC-دە باق سىناعان سپورتشىلاردىڭ اراسىندا برازيليالىق دجيۋ-دجيتسۋ ايگىلى بولاتىن, ونىڭ ۇزدىكتەرى جۇلدەلى ورىنداردان كورىندى. مەنىڭشە, UFC تۋرنيرلەرىنىڭ بىرنەشە دۇركىن جەڭىمپازى رويس گرەيسي ءالى دە ەل اۋزىندا. ول مىقتى قارسىلاستى قارا كۇشپەن ەمەس, ءابجىل ادىستەرمەن ۇتۋعا بولاتىنىن دالەلدەدى. وسىنىسىمەن دە دجيۋ-دجيتسۋ وزگە سپورت تۇرلەرىنەن ەرەكشە, – دەيدى تولەگەن قۇماروۆ.
وليمپياداعا پارا-پار اۋقىمدى ءتۋرنيردى ۇيىمداستىرۋ ءۇشىن بىرىنشىدەن, وسىناۋ سپورت ءتۇرىن ەلدە كەڭىنەن ناسيحاتتاۋ قاجەت. ەكىنشىدەن, ءىرى جارىستارعا قاتىسىپ, سىرت ەلدەرگە تانىلۋ كەرەك. وسى جولدا اۋقىمدى شارالار قولعا الىنىپ تا جاتىر. مىسالى, الدىمىزداعى قىركۇيەكتە جەرلەستەرىمىز ADCC الەم چەمپيوناتىندا ەل نامىسىن قورعايدى. بايراقتى باسەكە فينليانديادا وتەدى جانە رويس گرەيسيدىڭ سۋپەر فايتى جۇرەدى.
تولەگەن قۇماروۆ ەگەر رويس گرەيسيدىڭ جانكۇيەرلەرى قالاسا, ونى ەلدەگى سپورتشىلاردىڭ شەبەرلىگىن شىڭداۋعا شاقىراتىنىن ايتادى. بۇگىنگى تاڭدا قازاقستاننىڭ برازيليالىق دجيۋ-دجيتسۋ جانە گرەپپلينگ فەدەراتسياسى دەمەۋشىلەردىڭ قولداۋىمەن وسىنداي سەمينارلاردى وتكىزىپ ءجۇر.
ءبىر ايتا كەتەرلىگى, ءبىزدىڭ دجيتسەرلەر حالىقارالىق دەڭگەيدەگى تورەشىلەردىڭ سارابىنان ءوتىپ, ارنايى سەرتيفيكاتتارىن يەمدەنۋدە. وتاندىق فەدەراتسيا شاما-شارقىنشا جاس سپورتشىلاردىڭ حالىقارالىق ارەناداعى باسەكەلەستەرىمەن يىق تەڭەستىرۋىنە كۇش سالىپ كەلەدى. دەگەنمەن, مىقتىلارمەن تەڭەسۋ ءۇشىن ءالى ۋاقىت كەرەك. ويتكەنى, بىزدە قارا جانە قوڭىر بەلبەۋ يەگەرلەرى از. وسى سپورت تۇرىنەن قارا بەلبەۋ يەگەرى اتانۋ ءۇشىن, كەم دەگەندە 10 جىل اينالىسۋ قاجەت كورىنەدى.
ال تولەگەن قۇماروۆتىڭ ءوزى قىزىلكۇرەڭ بەلدىگىنىڭ يەگەرى. بۇعان دەيىن, ول كاراتە, دزيۋدو جانە سامبومەن اينالىسقان. كەيىن دجيۋ-دجيتسۋدى تاڭداعانىنا ەش وكىنبەيدى. قازىرگى تاڭدا, ول ارىپتەستەرىمەن بىرگە ءتۇرلى جوبالارمەن, سونىمەن قاتار, ArlanGripSelection ءتۋرنيرىن ۇيىمداستىرۋمەن اينالىسادى. اتالمىش جارىس تەك ءبىزدىڭ ەلدە عانا ەمەس, وزگە مەملەكەتتەردە دە تانىمال.
وسى جەردە قازاقستاندىق دجيتسەرلەر جايلى تاعى ءبىر جاعىمدى جاڭالىقپەن بولىسە كەتۋگە بولادى. ولار تۇڭعىش رەت 23-24 قىركۇيەك كۇندەرى فينليانديا مەملەكەتىندە وتەتىن ADCC الەم چەمپيوناتىندا باق سىنايدى. ءدۇبىرلى دودادا وسمانجان قاسىموۆ (77 كگ) جانە مۇحامماد سۇلەيمانوۆ (+99 كگ) ەل نامىسىن قورعايتىن بولادى.
ءوز كەزەگىندە ADCC الەم چەمپيوناتى ءار ەكى جىلدا ۇيىمداستىرىلاتىنىن ايتا كەتكەن ءجون. مۇنداي باسەكەگە قاتىسۋ ءۇشىن دجيتسەر ەكى كەزەڭدە جەڭىسكە جەتۋ قاجەت.
– ال ءبىزدىڭ سپورتشىلارىمىز دا ىرىكتەۋ كەزەڭدەرىنەن سۇرىنبەي ءوتىپ, الەم بىرىنشىلىگىنە جولداما الىپ وتىر. ولار قازاقستان چەمپيوناتى مەن ازيا جانە وكەانيا بىرىنشىلىگىندە جەڭىمپاز اتانىپ, ەل مەرەيىن ۇستەم ەتتى. بيىل وسمانجان قاسىموۆ جاپونيادا چەمپيون اتانسا, مۇحامماد بىلتىر الماتىدا وتكەن ازيا جانە وكەانيا چەمپيوناتىنىڭ جەڭىمپازى. البەتتە, جاقسى ناتيجەلەرگە جەتۋدەن ۇمىتتەنەمىز. الەم بىرىنشىلىگىنە قاتىسۋدىڭ ءوزى – جەتىستىك, دەگەنمەن, ءبىرىنشى ورىننىڭ اقشالاي قورى 40 مىڭ دوللار, – دەيدى فەدەراتسيا باسشىسى.
تولەگەن قۇماروۆتىڭ ويىنشا, مۇنداي جۇيە بارلىق جەرگە ەنگىزىلىپ جاتىر ەكەن. اقشالاي سىيلىق سپورتشىلاردىڭ ىنتالارىن ارتتىراتىنى ايدان انىق. ءتىپتى, جاسوسپىرىمدەردى اتالمىش سپورت تۇرىنە قىزىقتىرۋ ءۇشىن جارىستا جەتكىنشەكتەرگە باعالى سىيلىقتار تابىستالادى. كوپتەگەن كلۋبتار جاعدايى تومەن وتباسىلاردان شىققان بالالارعا دجيۋ-دجيتسۋمەن اينالىسۋ ءۇشىن قولداۋ كورسەتەدى.
بۇگىنگى كۇنى, الماتى, استانا, قاراعاندى جانە اقتوبەدە اتالعان سپورت ءتۇرى قارقىندى دامىپ كەلەدى. فەدەراتسيا باسشىسى قازاقستاننىڭ ءار ايماعىندا دجيۋ-دجيتسۋمەن اينالاساتىن كەم دەگەندە ءبىر كلۋبتىڭ بار ەكەنىن قۋانا ايتتى.
ايناش ەسالي,
«ەگەمەن قازاقستان»
الماتى
