6 تامىزدا باستالىپ, 12-ءسى كۇنى مارەسىنە جەتەتىن بۇل بەدەلدى باسەكەدە بيىل التى كوماندا كۇش سىناسۋدا. اتاپ ايتقاندا, ولار – «اۆانگارد» (ومبى), «ادميرال» (ۆلاديۆوستوك), «داۆوس» (شۆەيتساريا), «نەفتەحيميك» (نيجنەكامسك), «تراكتور» (چەليابينسك) حوككەي كلۋبتارى جانە استانانىڭ «بارىس» كومانداسى. «داۆوستان» باسقاسىنىڭ ءبارى دە قۇرلىقتىق حوككەي ليگاسىندا وينايتىن قابىرعالى كلۋبتار. دەمەك, مۇنىڭ ءوزى سەگىزىنشى مارتە ۇيىمداستىرىلىپ وتىرعان بۇل جارىستىڭ ابىرويىن اسقاقتاتىپ, مارتەبەسىن كوتەرە تۇسەتىنى ءسوزسىز.
استانانىڭ «بارىس» حوككەي كلۋبى بۇل تۋرنيرگە باسىنان باستاپ قاتىسىپ كەلەدى. 2010 جىلى تۇڭعىش ۇيىمداستىرىلعان جارىستا ەلوردا حوككەيشىلەرى تاماشا ونەر كورسەتىپ, توپ جاردى. فينالدىق ماتچتا ولار مينسكىنىڭ «ديناموسىن» بۋلليت بويىنشا جەڭگەن بولاتىن.
بارىس» بۇل تابىسىن كەلەسى جىلى وتكەن تۋرنيردە تاعى دا قايتالادى. بۇل جولى كوماندا فينالدا حانتى-مانسيسكىدەن كەلگەن «يۋگرا» حوككەي كلۋبىنان باسىم ءتۇسىپ, ءتۋرنيردىڭ ەكى دۇركىن جەڭىمپازى اتاندى.
ءۇشىنشى رەت ۇيىمداستىرىلعان تۋرنيردە استانا حوككەيشىلەرى شەشۋشى ويىندا سكا (سانكت-پەتەربۋرگ) كومانداسىنا ەسە جىبەرىپ, كۇمىس جۇلدەنى قاناعات تۇتتى. ال قولا جۇلدەنى تاعى ءبىر قازاقستاندىق كلۋب – وسكەمەننىڭ «تورپەدوسى» يەلەنگەن بولاتىن.
2014 جىلى «بارىس» وسى تۋرنيردە قايتادان توپ جاردى. ول كەزدە ۇزدىك ۇشتىك بىلايشا تۇزىلگەن بولاتىن: 1. «بارىس» (استانا), 2. «يۋگرا» (حانتى-مانسيسك), 3. «امۋر» (حاباروۆ). اراعا جىل سالىپ وتكەن تۋرنيردە قازاقستاننىڭ باستى كلۋبى ءوزىنىڭ چەمپيوندىق اتاعىن ساقتاي المادى. «بارىس» پرەزيدەنت كۋبوگى سىنىنىڭ فينالىندا ومبىنىڭ «اۆانگاردىنان» 3:5 ەسەبىمەن جەڭىلىپ قالدى.
2015 جىلى التىنشى مارتە وتكەن ءتۋرنيردىڭ ەرەكشەلىگى زور بولدى. حوككەي تارتىسى سۋ جاڭا سپورت سارايى – «بارىس ارەنا» مۇز ايدىنىندا ءوتتى. ونىڭ ۇستىنە, بۇل ءدۇبىرلى دودانىڭ اشىلۋ سالتاناتىنا مەملەكەت باسشىسى نۇرسۇلتان ءابىش ۇلى نازارباەۆتىڭ ءوزى قاتىسقان بولاتىن.
بۇل جولعى ءتۋرنيردىڭ فينالىندا «بارىس» پەن «ادميرال» (ومبى) حوككەيشىلەرى تاعى دا يمەك تاياق ءتۇيىستىردى. وتە تارتىستى وتكەن ويىننىڭ نەگىزگى ۋاقىتى 2:2 ەسەبىمەن اياقتالىپ, كوماندالار ماتچتى وۆەر-تايمدا جالعاستىرۋعا ءماجبۇر بولدى. سول ويىندا كۋبوكتىڭ تاعدىرىن شەشكەن جالعىز شايبانى تالعات جايلاۋوۆ سوعىپ, ءوزىنىڭ كومانداسىنا جەڭىس سىيلاعان بولاتىن.
بىلتىرعى وتكەن تۋرنير دە ەستە قالار ەپيزودتارعا تولى بولدى. مىسالى, «بارىس» پەن قىتايدىڭ «كۋن لۋن رەد ستار» حوككەي كلۋبى اراسىنداعى ماتچ جاپپاي توبەلەسكە ۇلاسىپ, ويىن اياقتالماي قالعان بولاتىن. دەگەنمەن, بۇل كيكىلجىڭ ءتۋرنيردىڭ بەدەلىنە كىر جۇقتىرا المادى. «ەر شەكىسپەي بەكىسپەيدى» دەمەكشى, كوماندالار ءتارتىبىن تۇزەپ, كەلەسى ويىنداردا ءتاپ-ءتاۋىر ناتيجەلەرگە قول جەتكىزدى. ال ءتۋرنيردىڭ جەڭىمپازىن انىقتاعان شەشۋشى كەزدەسۋدە «بارىس» پەن نوۆوكۋزنەتسكىنىڭ «مەتاللۋرگ» كومانداسى كۇش سىناستى. ويىننىڭ نەگىزگى ۋاقىتى 1:1 ەسەبىمەن اياقتالىپ, ودان كەيىن حوككەيشىلەرگە وۆەر-تايمدا دا تەر توگۋگە تۋرا كەلدى. مۇندا دا ەسەپ وزگەرمەي, كەزەك بۋلليتكە دە كەلىپ جەتكەن. بۇل باسەكەدە «مەتاللۋرگتىڭ» شابۋىلشىسى يۆان ەمەتس مەرگەندىك تانىتىپ, «بارىستىڭ» جانكۇيەرلەرىن جەرگە قاراتقان بولاتىن.
بيىلعى تۋرنيرگە «بارىس» ادەتتەگىدەي تىڭعىلىقتى دايىندىقپەن كەلدى. العاشقى تۋردا كوماندا شۆەيتساريالىق «داۆوسپەن» كۇش سىناسىپ, 4:2 ەسەبىمەن جەڭدى. وكىنىشكە قاراي, ەكىنشى ويىندا جەرلەستەرىمىز «نەفتەحيميك» كومانداسىنا 1:2 ەسەبىمەن ەسە جىبەرىپ الدى. كەشە ەۆگەني كورەشكوۆتىڭ شاكىرتتەرى «اۆانگاردپەن» مۇز ايدىنىنا شىقتى.
«بارىس» كەلەسى كەزدەسۋىن 11 تامىز كۇنى «تراكتور» كومانداسىمەن وتكىزەدى.
قايرات ءابىلدا,
«ەگەمەن قازاقستان»
