تىلدەردى دامىتۋ جونىندەگى وڭىرلىك باسقارمانىڭ ۇيىمداستىرۋىمەن «تىلدەردى دامىتۋ مەن قولدانۋدىڭ 2017-2019 جىلدارعا ارنالعان وبلىستىق ءىس-شارالار جوسپارى» شەڭبەرىندە 10-تامىز اباي اتامىزدىڭ تۋعان كۇنى قۇرمەتىنە ارنالىپ وبلىس ورتالىعىندا «اباي وقۋلارى» بايقاۋى وتكىزىلدى.
شارانىڭ ماقساتى – وزگە ۇلت وكىلدەرى اراسىندا مەملەكەتتىك ءتىلدىڭ قولدانۋ اياسىن كەڭەيتۋ, اقىن شىعارمالارىن ناسيحاتتاۋ ارقىلى قازاق مادەنيەتىنە, ءتىلى مەن ادەبيەتىنە دەگەن جاستاردىڭ قۇشتارلىعىن ارتتىرۋ ەكەن. اقىن ولەڭدەرىن, قاراسوزدەرىن وقۋ ارقىلى كوركەمسوز شەبەرلىگىن, ءتىل مادەنيەتىن شىڭداۋ باعىتىندا وتكەن بايقاۋعا 17 مەن 29 جاس ارالىعىنداعى قالالار مەن اۋىلداردان قاتىسۋشىلار كەلدى.
ءبىلىم, عىلىم جانە ونەر تاقىرىپتارىنا ورىلگەن پوەزيالىق شىعارماسى مەن قارا ءسوزىن مانەرلەپ وقۋدان, «اباي جولى» رومانىنان ءۇزىندىنى كوركەم شەبەرلىكپەن جاتقا جانە ابايدىڭ اندەرىن ورىنداۋدان بايقاۋعا ءتۇستى. سۋرەتتەگى كسەنيا روندە ماي اۋدانى, مالايسارى اۋىلىنان كەلدى. قازاق ءتىلىن ءوزىنىڭ تۋعان انا تىلىندەي كورەدى. ال, قازىلار القاسى قاتىسۋشىلاردىڭ كوركەم ءماتىندى تاڭداۋ جانە وقۋ شەبەرلىگىنە, قازاق ءتىلىنىڭ ورفوەپيالىق نورمالارىن ساقتاپ, تازا سويلەۋىنە, ءان ورىنداۋ شەبەرلىگىنە, كورەرمەندەر الدىندا ءوزىن-ءوزىن ۇستاۋ مادەنيەتىنە نازار اۋداردى. باس جۇلدەنى مارينا حارچۋك يەلەندى.
فاريدا بىقاي,
«ەگەمەن قازاقستان»
پاۆلودار
