وسى ورايدا مەملەكەت باسشىسى ن.نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا جۇمىس كۇشى كوپ جەرلەردەن وزگە جەرلەرگە ادام تارتۋ, جۇمىس كۇشىن جىبەرۋ ماسەلەسىن ۇسىنعان بولاتىن. بۇل ىشكى كوشى-قون تالاي وتانداستىڭ وڭتايىنا ورالاتىن باستاما بولماق – جۇمىس تابا الماي داعدارعان جانە باسپانا الا الماي قينالعاننىڭ ارمانى وسى باعىت بويىنشا ورىندالماق. بۇل باعىتتاعى جۇمىستارعا مەملەكەتىمىزدىڭ «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى» دا سەرپىن بەرە ءتۇستى.
ماڭعىستاۋ – مۇنايلى ءوڭىر, بىراق تۇرعىنداردىڭ بارلىعى بىردەي اتالمىش سالادا جۇمىس جاساۋى مۇمكىن ەمەس. دەمەك, جولداۋدا ايتىلعان تاپسىرما مەن جوعارىدا ايتىلعان مەملەكەتتىك باعدارلاما وزگە سالادان ءناسىپ ىزدەگەندەر مەن كاسىبىن اشامىن دەۋشىلەرگە قاجەتتى قۇجات.
ماڭعىستاۋ وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى بۇل باعىتتاعى جۇمىستى قارقىندى جۇرگىزىپ كەلەدى. جۇمىسپەن قامتۋدى جانە كاسىپكەرلىكتى دامىتۋدى, جۇمىس كۇشى تاپشى وڭىرلەرگە ەڭبەك رەسۋرستارىن قونىستاندىرۋدى كوزدەيتىن ەرىكتى قونىس اۋدارۋ يدەياسى حالىق اراسىنا ءتۇسىندىرىلىپ, كوشەم دەۋشىلەردىڭ العاشقى لەگى قۇتتى قونىستارىنا اتتاندىرىلدى.
– بيىلعى جىلدىڭ مامىر ايىندا العاش رەت اقتاۋدا ەرىكتى قونىس اۋدارۋشىلار فورۋمى ءوتتى. ەكى كۇنگە سوزىلعان فورۋم اقتاۋ, جاڭاوزەن قالالارى مەن مۇنايلى اۋدانىندا ۇيىمداستىرىلدى. 600 ادام قاتىسقان فورۋم اياسىندا بوس جۇمىس ورىندارىنىڭ جارمەڭكەسى ءوتىپ, وعان 400-دەن استام ادام قاتىستى. سونداي-اق, ورالمان قانداستارىمىز كوپ شوعىرلانعان مۇنايلى اۋدانىندا حالىقپەن كەزدەسۋ ءوتىپ, ەرىكتى قونىس اۋدارۋدىڭ ءمان-ماڭىزى ءتۇسىندىرىلدى, – دەيدى ماڭعىستاۋ وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى گۇلجيحان امانجان.
ەلىمىز بويىنشا جۇمىس ورىندارى تاپشى وڭىرلەر ساناتىندا جۇرتشىلىققا پاۆلودار, سولتۇستىك قازاقستان وبلىسى, شىعىس قازاقستان وبلىسى جانە قوستاناي وبلىسى ۇسىنىلدى. فورۋم جۇمىسىنا اتالمىش وڭىرلەردەن وكىلدەر كەلىپ قاتىسىپ, ءوز وڭىرلەرىندەگى بوس جۇمىس ورىندارى مەن كوشىپ كەلۋشىلەرگە جاسالاتىن جاعداي, باسپانا ماسەلەسى تۋرالى ءسوز قوزعادى. وسى جۇمىستاردىڭ ماڭعىستاۋ وڭىرىندەگى بىردەن-ءبىر ۇيلەستىرۋشىسى بولىپ وتىرعان ماڭعىستاۋ وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ دەرەگى بويىنشا, شىعىس قازاقستان وبلىسىندا ءبىلىم بەرۋ, دەنساۋلىق ساقتاۋ سالالارىنا, مەملەكەتتىك قىزمەتكە, سونداي-اق اۋىل شارۋاشىلىعى مەن كوممۋنالدىق سالالارعا بارلىعى 219 ادامعا جۇمىس ورىندارى بوس دەپ كورسەتىلسە, پاۆلودار وبلىسىندا 500-دەن استام, قوستاناي وبلىسىندا 30-عا تارتا گازبەن, ەلەكترمەن دانەكەرلەۋشى, مۇعالىم, مەحانيزاتور, جۇرگىزۋشى, ارنايى تەحنيكا جۇرگىزۋشىسى, ۆەتەرينار, دارىگەر, فەلدشەر ماماندار قاجەت ەكەن. ال سولتۇستىك قازاقستان وبلىسىنداعى 790 بوس جۇمىس ورنى مۇعالىم, دارىگەر, بيۋدجەت سالاسى ماماندارىن, اۋىل شارۋاشىلىعىنا قىزمەت ەتەتىن ەڭبەككەرلەردى كۇتەدى.
ءتۇسىندىرۋ جۇمىستارى ناتيجەسىندە ماڭعىستاۋدان 169 وتباسى كوشۋگە نيەت بىلدىرسە, «جول مۇراتى – جەتۋ» دەگەن قۇرامىندا 50-دەن استام مۇشەسى بار 12 وتباسى: 4 وتباسى پاۆلودار وبلىسىنا, 6 وتباسى شىعىس قازاقستان وبلىسىنا, 1 وتباسى سولتۇستىك قازاقستان وبلىسىنا جانە 1 وتباسى قوستاناي وبلىسىنا قونىستانىپ ۇلگەردى. جۇمىس ورنى مەن جاسالاتىن جاعدايعا قانىققان تاعى دا 6 وتباسى كوش-كولىكتەرىن ازىرلەۋدە.
بارعان ادامداردىڭ الدىنان باقىر شىعىپ, اڭتارىلىپ قالماۋى ءۇشىن جەرگىلىكتى باسقارما وكىلدەرى الدىن الا اتالمىش وبلىستارعا ىسساپارعا بارىپ, كوشى-قون, جۇمىس, باسپانا ماسەلەسىن پىسىقتاپ قايتتى. وزگە وڭىرلەردەگى ءوز ارىپتەستەرىمەن مەموراندۋم جاساسىپ, بىرلەسە جۇمىس جۇرگىزۋ ءۇشىن كەلىسىمگە كەلدى. باسقارما وكىلدەرىنىڭ ايتۋىنشا, كوشىپ بارۋشىلار تۇرعىن ۇيمەن قامتاماسىز ەتىلىپ, ءبىر جىل بويى كوممۋنالدىق اقىدان بوساتىلادى, جۇمىسقا ورنالاسقان سوڭ ولارعا جاردەماقى تولەنىپ, قاجەت ەتكەندەرگە ەگىن ەگۋ ءۇشىن جەر تەلىمى دە بەرىلەدى. ەگىن ەگىپ, اۋىل شارۋاشىلىعىمەن اينالىسامىن دەگەندەرگە سۋبسيديا مەن جەڭىلدەتىلگەن نەسيە بەرىلىپ, بالالار باقشامەن قامتىلادى ەكەن. ءتىپتى جەر ورنىن الىپ, ەگىن سالىپ, كاسىبىن گۇلدەندىرەمىن دەگەن كاسىپكەرلەردىڭ بارۋىنا دا جول اشىق.
قازاقستاننىڭ ازاماتتىعىن العاندار دا, ورالمان مارتەبەسىندەگىلەر دە قاتىسا الاتىن ەرىكتى قونىس اۋدارۋ باعدارلاماسىنىڭ مىندەتى جۇمىسپەن قامتۋ بولسا, ايتپاعى – قازاق دالاسىنىڭ ءتورت تارابىن ءوزارا بايلانىستىرۋ, قازاق بالاسىنا قازاق دالاسىنىڭ جاتتىعى جوقتىعىن ۇعىندىرۋ. باستامانى جەمىستى جۇزەگە اسىرۋ ءۇشىن قونىس اۋدارىپ بارۋشىنى وزەكتەن تەپپەي باۋىرىنا باسىپ, بىلمەگەنىن ۇيرەتىپ, جات ورتاعا ءسىڭىسىپ كەتۋى ءۇشىن قاراپايىم حالىقتىڭ, اۋىل اقساقالدارىنىڭ جانە جەرگىلىكتى بيلىك وكىلدەرىنىڭ بەلسەندى اتسالىسقانى ءجون, دەيدى ماماندار.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
