ولاي دەيتىن سەبەبىمىز, الاتاۋ باۋىرىنداعى اسەم شاھار الماتىنىڭ تورىندە قوڭىر كۇزدە ساعات اشىمباەۆتىڭ تۋعانىنا 70 جىل تولۋىنا وراي ۇلكەن جيىن, عىلىمي كونفەرەنتسيا وتەدى. بۇلاعىنان سۋ ءىشىپ, العاشقى وقۋعا ىنتىزار جۇرەگىن, ىنتىق كوڭىلىن تۋعان جەرىندەگى مەكتەپتەن, كىتاپحانادان ءبىلىم نارىمەن سۋارعان ساعات اشىمباەۆتىڭ جەرلەستەرى مەرەيلى تويدىڭ ەلدەن باستالۋىن ۇلگى رەتىندە وزدەرى قالاپتى. الدىمەن نارىنقولدا تۋعان ەلىنىڭ ازاماتتارى ۇيىمداستىرعان رەسمي جيىن ءوتىپ, كەيىن ساعات اشىمباەۆ تۋىپ-وسكەن جامبىل اۋىلىندا, اقكول جايلاۋىندا ءوز ىرعاعىن, ءمانىن تاپتى.
وبلىس باسشىلىعىنىڭ قولداۋىمەن اۋدان اكىمدىگى ۇيىمداستىرعان شارانىڭ رەسمي بولىگىن اقىن, مەملەكەتتىك سىيلىقتىڭ لاۋرەاتى, قازاقستان جازۋشىلار وداعىنىڭ باسقارما توراعاسى نۇرلان ورازالين جۇرگىزدى. ءسوز تىزگىنىن قولعا العان مودەراتور ساحنا تورىنە قايراتكەردىڭ دوسى, جازۋشى سماعۇل ەلۋبايدى, ساعاتتىڭ جارى, جازۋشى ءشاربانۋ بەيسەنوۆانى, زامانداس-قالامداستارىنىڭ ءبىرى, جازۋشى ماعيرا قوجاحمەتوۆانى, جازۋشى, «قازاق ادەبيەتى» گازەتىنىڭ باس رەداكتورى جۇماباي شاشتاي ۇلىن, ساعاتتىڭ ۇلى, پارلامەنت ءماجىلىسىنىڭ دەپۋتاتى ماۋلەن اشىمباەۆتى, وبلىس اكىمىنىڭ ورىنباسارى جاقسىلىق وماردى, اۋدان اكىمى جانات تاجيەۆتى جانە رايىمبەك اۋداندىق اقساقالدار القاسىنىڭ توراعاسى سابىر دوسىمبەكوۆتى شاقىرىپ, كەلەلى جيىندى باستادى.
ساعات اشىمباەۆتىڭ ءومىر جولى مەن شىعارماشىلىعى تۋرالى زامانداستارى ەستەلىك ايتىپ, ادەبيەت سىنشىسى ءاليا بوپەجانوۆا بايانداما جاسادى.
تۋعان ەلى ساعاتىن ساعىنىپتى. ساعاتتاي ەلگە قىزمەت قىلار ۇلدارىن ساعىنىپتى.
باعاشار تۇرسىنباي ۇلى,
«ەگەمەن قازاقستان»
الماتى وبلىسى
