«كحدر زىمىراندىق جانە يادرولىق باعدارلامالارى بارلىق مۇددەلى تاراپتارعا كەلىسسوزدەر پروتسەسىن جەدەل قالپىنا كەلتىرۋ جولىمەن ءوزارا قولايلى شەشىمدى ىزدەستىرۋ جونىندەگى بىرلەسكەن كۇش-جىگەردى جانداندىرۋ قاجەتتىگىن تالاپ ەتەدى. قازاقستاندىق ديپلوماتيا پروبلەمانى كۇشپەن ەمەس, ۇنقاتىسۋ ارقىلى عانا شەشىپ, قالىپتاسقان جاعدايدان شىعۋعا بولادى دەپ ەسەپتەيدى», دەلىنگەن مالىمدەمەدە.
بۇۇ-نىڭ قاۋىپسىزدىك كەڭەسى وتىرىستا كحدر-دىڭ بۇۇ قك بارلىق ءتيىستى قارارلارىن بۇزىپ, يادرولىق باعدارلامانى ىسكە اسىرۋدى جالعاستىرۋىنا جاۋاپ رەتىندە وعان قاتىستى جاڭا قاراردى ءبىراۋىزدان قابىلدادى. 2 371-قارار (2017) بالليستيكالىق زىمىراندى سىناۋعا جاۋاپ رەتىندە قولدانىلاتىن ەڭ قاتاڭ سانكتسيالاردى قامتيدى. بۇل شارالار سولتۇستىك كورەيانىڭ نەگىزگى ەكسپورتىنا باعىتتالادى, ول كومىردىڭ (سولتۇستىك كورەيانىڭ سىرتقى ءتۇسىمىنىڭ اسا ءىرى كوزى), تەمىر رۋداسىنىڭ, قورعاسىننىڭ, قورعاسىن رۋداسىنىڭ جانە تەڭىز ونىمدەرىنىڭ ەكسپورتىنا تولىق تىيىم سالادى. بۇدان باسقا, اتالعان قارار بۇۇ قك-ءنىڭ بۇعان دەيىن قابىلداعان قارارلارىن بۇزۋعا قاتىسى بار كحدر-دىڭ جەكە جانە زاڭدى تۇلعالارىنىڭ سانكتسيالىق ءتىزىمىن كەڭەيتەدى.
بۇرىن-سوڭدى بولىپ كورمەگەن سانكتسيالىق شارالار سولتۇستىك كورەيانىڭ يادرولىق باعدارلاماسىن دامىتۋدى جالعاستىرۋعا ارنالعان قارجىلىق مۇمكىندىكتەردى شەكتەۋ ماقساتىندا ونىڭ ۆاليۋتالىق كىرىسىن قىسقارتۋعا دا (شامامەن ۇشتەن بىرىنە) ارنالادى.
