الەمدى شارپىعان ەكونوميكالىق ماسەلەلەرگە قاراماستان, 2016 جىلى ەكى ەل اراسىنداعى ساۋدا اينالىمىنىڭ كولەمى 2,5 ملرد دوللاردى قۇرادى. قازاقستاندا ەڭ كوپ ينۆەستيتسيالىق جوبالاردى جۇزەگە اسىرعان ەلدەردىڭ ءبىرى دە – تۇركيا. تاياۋ بولاشاقتا ەكىجاقتى ساۋدا اينالىمىنىڭ جىلدىق كولەمىن 10 ميلليارد دوللارعا دەيىن جەتكىزۋ, بىرلەسكەن كاسىپورىنداردىڭ سانىن كوبەيتۋ, ينۆەستيتسيا كولەمىن ارتتىرۋ كوزدەلۋدە.
تۇركيا قازاقستاننىڭ حالىقارالىق باستامالارىنا دا ۇنەمى قولداۋ ءبىلدىرىپ كەلەدى. بۇل باۋىرلاس ەل ەكسپو-2017 كورمەسىنىڭ قازاقستاندا وتۋىنە دە بارىنشا قولداۋ تانىتتى. وسىنداي نيەتتەس, ۇستانىمدارى ۇقساس مەملەكەتتەردىڭ كومەگى ناتيجەسىندە بۇگىندە استانادا اتالعان كورمە اسا جوعارى دەڭگەيدە ءوتىپ جاتىر.
بۇگىن ەلوردادا ەكسپو-2017 كورمەسى اياسىندا تۇركيانىڭ ۇلتتىق كۇنى ۇيىمداستىرىلادى. وسى كۇنى كورمە اۋماعىندا تۋىسقان حالىقتىڭ باي سالت-ءداستۇرى مەن مادەنيەتى كورمەگە كەلۋشىلەردىڭ نازارىنا ۇسىنىلاتىن بولادى.
