اجارى ايشىقتى ەلوردا كوركىنەن شابىت العان ءتۇسىرىلىم توبى ءبىر عيماراتتىڭ عانا ەمەس, ارقا توسىنە بوي كوتەرگەن تۇتاس استانانىڭ قالىپتاسۋ تاريحىن بەينەلەۋدى ۇيعارعان. فيلم دۋبايداعى «بۋردج-حاليفا», كۋالا-لۋمپۋرداعى «پەتروناس», لا-مانش بۇعازىنداعى ەۋروتوننەل سىندى الەمنىڭ اتاقتى عيماراتتارىنىڭ قۇرىلىس تاريحى كورسەتىلەتىن «مەگاعيماراتتار» دەرەكتى سەريالىنىڭ ءبىر ەپيزودى بولىپ تابىلادى.
تۋىندىدا قازاقستان استاناسىنداعى قولايسىز اۋا رايى مەن كۇردەلى لوگيستيكالىق, ينفراقۇرىلىمدىق جاعدايلارعا قاراماستان «بايتەرەك» مونۋمەنتى, «حان شاتىر» ساۋدا جانە ويىن-ساۋىق ورتالىعى سياقتى ءىرى نىسانداردىڭ, جاڭا ۆوكزال مەن نۇرسۇلتان نازارباەۆ حالىقارالىق اۋەجايىنىڭ تۇرعىزىلۋى تۋرالى باياندالادى. باستى نازار شىنىدان تۇرعىزىلعان الەمدەگى ەڭ ۇلكەن سفەرالىق عيمارات – «نۇر الەم» پاۆيلونىنا اۋدارىلادى. National Geographic ءتۇسىرىلىم توبى سفەرانىڭ سوڭعى شىنىسى ورناتىلعان تاريحي مەزەتتى دە ءتۇسىرىپ العان.
ءتۇسىرىلىم جۇمىستارىنا قازاقستان پرەزيدەنتى نۇرسۇلتان نازارباەۆ قاتىسىپ, ءوز يدەياسىنان تۋعان جاڭا استانانىڭ بوي كوتەرۋى تۋرالى بايانداپ بەرەدى. قىرىق بەس مينۋتتىق «مەگاعيماراتتار: استانا – بولاشاقتىڭ قالاسى» ءفيلمىنىڭ الدىن الا كورسەتىلىمى ەلورداداعى ەكسپو-2017 كورمەسى كەشەنىندە ءوتتى. ءفيلمنىڭ الەمدىك تۇساۋكەسەرى 40-تان استام مەملەكەتتە 22 تىلدە ۇسىنىلماق.
ء«فيلمنىڭ نەگىزگى تۇساۋكەسەرى «National Geographic channel» ارناسىندا وتەدى جانە ۇلىبريتانيا, يتاليا, يسپانيا, پولشا, سينگاپۋر, ءۇندىستان سەكىلدى بارلىق ەۋرازيا اۋماعىندا ەكى جىل بويى كورسەتىلەدى. ازىرگە كورسەتىلىمنىڭ ناقتى سانى بەلگىسىز», دەگەن «National Geographic Partners» ەۋروپا-افريكا ءبولىمىنىڭ اتقارۋشى ۆيتسە-پرەزيدەنتى دەبورا ارمسترونگ استانا قۇرىلىستارى قايتالانباستىعىمەن جانە وزگەشەلىگىمەن تاڭ قالدىراتىنىن, عاجايىپ ءارى تارتىمدى قالا ەكەنىن ايتتى.
«ەڭ الدىمەن, بۇل قازاقستاننىڭ پرەزيدەنتى نۇرسۇلتان نازارباەۆتىڭ ارمانى ەدى. از ۋاقىتتىڭ ىشىندە ونىڭ بارلىق ويلاعانى ىسكە اسىرىلدى. كورمە اۋماعىنداعى قۇرىلىستار, سونداي-اق, «نۇر الەم» پاۆيلونى الەمنىڭ ءار تۇكپىرىنەن كوپتەگەن ادامداردى تارتادى. ءبىز «National Geographic: «مەگاعيماراتتار: استانا – بولاشاقتىڭ قالاسى» دەرەكتى ءفيلمىنىڭ كورسەتىلىمى اياسىندا جاس استانانىڭ وسىنداي تاماشا نىساندارىمەن تانىستىراتىنىمىزعا وتە قۋانىشتىمىز», دەدى ۆيتسە-پرەزيدەنت.
تەلەارنانىڭ ەۋروپا-افريكا ءبولىمىنىڭ اتقارۋشى پروديۋسەرى يۆان بۋسو كارتينادا قالانىڭ قالىپتاسۋ تاريحىنا عانا ەمەس, ەكسپو-2017 حالىقارالىق مامانداندىرىلعان كورمەسىنە دە باسا نازار اۋدارىلعانىن جەتكىزدى. ء«بىز ءوز فيلمدەرىمىزدە ادامدار ءتىپتى ويلانبايتىن نارسەلەردى كورسەتەمىز. مەن وسى جوبادا جۇمىس ىستەي باستاعان كەزىمدە – 20 جىل بۇرىن استانا مۇنداي تاماشا عيماراتتارسىز شاعىن عانا قالا بولعانىن ءبىلدىم. قازىر قازاق ەلورداسى گۇلدەنە تۇسكەن. ەكسپو-2017 وبەكتىلەرى, اتاپ ايتقاندا, «نۇر الەم» ۇلتتىق پاۆيلونى 21 ايدا سالىنىپ شىققان. وسى سىندى تاريحتار ادامداردى قىزىقتىرىپ, تاڭ قالدىرادى. بۇل فيلم الەم جۇرتشىلىعىن قازاقستانعا كەلۋگە شابىتتاندىراتىنى ءسوزسىز», دەدى ول.
ماماندار مالىمدەگەندەي, تەلەارنا ۇجىمى بۇل ءفيلمدى الەمنىڭ 170 ەلىندە 37 تىلدە كورسەتۋدى جوسپارلاپ وتىر.
اسحات رايقۇل,
«ەگەمەن قازاقستان»
