بۇل توپتىڭ ءبىر ەرەكشەلىگى – جاستار اراسىندا كەڭىنەن تانىمالدىققا يە بولعان برەيكدانس ءبيىنىڭ ىرعاعىن كلاسسيكالىق مۋزىكامەن بايلانىستىرا بىلۋىندە. ال ەلوردا تورىندە وتكەن شارا اۆستريا پاۆيلونىمەن بىرىگىپ, «RedBull Flying Bach» اتاۋىمەن ۇيىمداستىرىلدى.
– ەكسپو اۋماعىندا, اسىرەسە اۆستريا پاۆيلونىندا ءتۇرلى شارالار ۇيىمداستىرىلادى. مۇندا كەلگەن ءاربىر جان بولاشاقتىڭ ەنەرگياسىن سەزىنە الادى دەسەم ارتىق ايتپاعان بولار ەدىم. Flying Steps توبى كورمەنىڭ ءسانىن كىرگىزىپ, شاراعا جينالعانداردى تاڭ قالدىراتىنىنا سەنىمىم مول, – دەدى الماتىداعى اۆستريا ەلشىلىگىنىڭ ساۋدا كەڭەسشىسى ميحاەل ميۋللەر.
ءبىر قاراساڭ برەيكدانس مەن كلاسسيكانىڭ قوزعالىستارى ءبىر-بىرىنە مۇلدەم كەلمەيدى. الايدا, اتالعان توپ پەن كونتسەرتتىڭ رەجيسسەر-قويۋشىسى كريستوف حاگەل ونى جوعارى دەڭگەيدە ۇشتاستىرۋعا بولاتىنىن دالەلدەي ءبىلدى. سەبەبى, شاراعا جينالعان جۇرتشىلىق ونەرپازداردىڭ ءتۇرلى قيمىل-قوزعالىستارىنا, كلاسسيكالىق مۋزىكانى ۇيلەستىرە العانىنا تاڭدانىستارىن جاسىرا المادى.
ايان ءابدۋالي,
«ەگەمەن قازاقستان»
