«رەسمي ستاتيستيكا بويىنشا, جۇمىسسىز حالىقتىڭ 25 پايىزى ورتا مەكتەپتىك ءبىلىمى عانا بار ادامدار. ءوز بەتىنشە جۇمىسپەن قامتىلعاندار اراسىندا جارتىسى, اتاپ ايتقاندا 49 پايىزى ارنايى ءبىلىمى نەمەسە كاسىبي داعدىسى جوق ازاماتتار. سوندىقتان دا وقىتۋ شارالارى ءبىرىنشى كەزەكتە ۇلتتىق بىرىڭعاي تەستىلەۋدەن وتپەي, ياعني وقۋ ورىندارىنا تۇسپەي قالعان مەكتەپ تۇلەكتەرىنە قاتىستى بولادى. بۇگىنگە 21 مىڭعا جۋىق وسىنداي بالالاردى 1 قىركۇيەكتەن قابىلداۋعا 321 تەحنيكالىق جانە كاسىپتىك ءبىلىم بەرۋ ۇيىمى دايىن. باعدارلاما ەسەبىنەن شاكىرتاقىسى, ءبىر مەزگىلدىك ىستىق تاماعى, سونداي-اق سىرتتان كەلگەندەرگە جول شىعىندارى مەن تۇرعىن ءۇي جالداۋ شىعىندارىن وتەۋگە ماتەريالدىق كومەك بەرىلەدى»,-دەپ توقتالدى ۆيتسە-مينيستر.
ونىڭ سوزىنە قاراعاندا, وقىتۋدىڭ ەكىنشى ءتۇرى قىسقا مەرزىمدى كاسىپتىك وقۋعا ءساۋىر ايىنان باستاپ 28 مىڭ جۇمىسسىز ادام قاتىسۋدا. بۇل جەردە «اتامەكەن» ۇلتتىق كاسىپكەرلىك پالاتاسىمەن بىرلەسە وتىرىپ, وسى قىسقا مەرزىمدىك وقۋدى شىلدە ايىنان باستاپ باسىم تۇردە كاسىپورىنداردىڭ جانىنداعى وقۋ ورتالىقتارى ارقىلى ۇيىمداستىرۋ باستالدى. سەبەبى مۇنداي ۇستانىم ءبىلىم بەرۋ ساپاسىمەن قاتار, ولاردىڭ ودان ارى قاراي جۇمىسقا ورنالاسۋ مۇمكىندىگىن ارتتىراتىن كورىنەدى. ول ءۇشىن كاسىپكەرلەر پالاتاسىمەن ءتيىستى مەموراندۋمعا قول قويىلىپ, باعدارلاماعا قاجەتتى تۇزەتۋلەر ەنگىزىلىپ, جۇمىس بەرۋشىلەردىڭ جانىنان ازىرشە 39 وقۋ ورتالىقتارىنىڭ تىزبەسى ايقىندالدى. بۇل تىزبە تولىعادى. سونىمەن, جىل سوڭىنا دەيىن قىسقا مەرزىمدى كاسىپتىك وقۋمەن 70 مىڭنان استام ادامدى قامتۋ ەسكەرىلگەن.
«وڭىرلەر بولىنىسىندە وقىتۋ قارقىنى ءار ءتۇرلى. مىسالى, الماتى قالاسىندا قىسقا مەرزىمدىك كۋرستارمەن جوسپارلانعان كورسەتكىشتىڭ 10 پايىزى عانا, اقتوبە وبلىسىندا 18 پايىزى, سولتۇستىك قازاقستان مەن اقمولا وبلىستارىندا 25 پايىزعا جۋىعى عانا قامتىلعان»,-دەپ تۇيىندەدى ءسوزىن نۇرىمبەتوۆ.
