– ءيا, ءشامشى قالداياقوۆ اتىنداعى بايقاۋ وتكەن 1992 جىلدىڭ 13 قىركۇيەگى ءالى ەسىمدە. ول كەز مادەنيەت سالاسىنداعى ەڭ قيىن جىلدار عوي, – دەپ ەسكە الادى قۇرمان شويىنباەۆ. – بىراق وسىنداي قيىندىقتارعا قاراماستان ەلىمىزدىڭ تۇكپىر-تۇكپىرىنەن 200-دەن استام ءانشى, سازگەرلەر باق سىنادى. قازىلار القاسىنىڭ قۇرامىندا روزا باعلانوۆا, زەينەپ قويشىباەۆا, اسەت بەيسەۋوۆ, مىڭجاسار ماڭعىتاەۆ سياقتى قازاق ونەرىنىڭ قايماقتارى وتىردى. اقتىق سىندا بايقاۋدىڭ گران-ءپريى ماعان بەرىلدى. ءبىرىنشى ورىندى شاكيزادا يەلەندى.
ءشامشى قالداياقوۆ اتىنداعى بايقاۋ-فەستيۆال كوپتەگەن ونەرپازدىڭ تۇساۋىن كەسىپ, ۇلكەن ساحناعا جولداما بەردى. ء«بىز بايقاۋدىڭ ءبىرىنشى جەڭىمپازى اتانساق, بۇگىندە ونەرىمەن, دارىنىمەن ەلگە تانىمال بولىپ جۇرگەن انشىلەردىڭ بىرقاتارى وسى بايقاۋدا سىنالىپ, كاسىپقوي اتاندى. ونىڭ ىشىندە, ءوزىم ۇستازدىق ەتىپ جۇرگەن م.اۋەزوۆ اتىنداعى وقمۋ تۇلەكتەرى دە از ەمەس. مىسالى, ماماديار تاۋكەەۆ, حاديشا سەيىتوۆا, بۇگىندە جاستارعا عانا ەمەس, بۇكىل انسۇيەر قاۋىمعا جاقسى تانىمال «جىگىتتەر» توبى ءار جىلدارى ش.قالداياقوۆ اتىنداعى حالىقارالىق انشىلەر بايقاۋىنىڭ لاۋرەاتى, ديپلومانتتارى اتانعان بولاتىن. مىنە, وسىنداي تالانتتارعا باعىت-باعدار بەرىپ, تۇساۋىن كەسكەن, ەلگە تانىمال جۇزدەگەن ونەر جۇلدىزدارىن تاربيەلەپ شىعارعان ۋنيۆەرسيتەتتىڭ رەكتورى جۇماحان مىرحالىقوۆ «مۋزىكالىق ونەر» كافەدراسىنىڭ زامان تالابىنا ساي جابدىقتالۋىنا, وقىتۋشىلار قۇرامىنىڭ كاسىبي دەڭگەيىنىڭ جوعارى بولۋىنا ەرەكشە كوڭىل ءبولىپ كەلەدى. جالپى, كافەدرا تۇلەكتەرى بۇگىندە ەلىمىزدىڭ بارلىق وبلىسىندا قىزمەت اتقارىپ ءجۇر. ماقتانارلىق, ۇلگى ەتەرلىك تۇلەكتەرىمىز, ستۋدەنتتەرىمىز كوپ», – دەيدى قازاقستان رەسپۋبليكاسىنىڭ ەڭبەك سىڭىرگەن ءارتىسى قۇرمان شويىنباەۆ.
ءانشى ءداستۇرلى بايقاۋ-فەستيۆال بيىل دا نەبىر جاس تالاپتىڭ باعىن اشاتىنىنا سەنىمدى. سوناۋ ءبىر قيىن كەزەڭدە ءانشى ەسىمىن ەلگە تانىتا تۇسكەن بايقاۋدىڭ دەڭگەيى بۇگىندە اناعۇرلىم جوعارىلاعان. حالىقارالىق دەڭگەيگە جەتكەن. جەڭىمپازدارعا بەرىلەتىن سىيلىق تا قوماقتى. ارينە ەڭبەك ءادىل باعالانۋىمەن دە قۇندى. بۇل ورايدا بۇگىندە م.اۋەزوۆ اتىنداعى وقمۋ-دە شاكىرتتەرىن ونەرگە باۋلىپ جۇرگەن ق.شويىنباەۆتىڭ كەرەمەت داۋىسىن ىلگەرىدە ەلباسى ن.ءا.نازارباەۆ جوعارى باعالاپ, قۇرمەت كورسەتكەن ەكەن. ءانشى ەلباسىنىڭ الدىندا ونشاقتى رەت ءان ايتىپتى. «مەنىڭ قازاقستان رەسپۋبليكاسىنىڭ ەڭبەك سىڭىرگەن ءارتىسى اتاعىن الۋىما تىكەلەي ەلباسىنىڭ ءوزى سەبەپكەر بولدى. ۇمىتپاسام, 1992 جىلدىڭ شىلدەسى ەدى. ەلباسى سول كەزدەگى وزبەكستان پرەزيدەنتى يسلام كاريموۆ ەكەۋى وڭتۇستىك جەرىندە كەزدەستى. الدىمەن تۇركىستانعا باردى. ودان كەيىن شاردارانى ارالايتىن بولدى. وڭتۇستىكتىڭ ءبىر توپ ونەرپازى كەشكى مەزگىلدە پرەزيدەنتتەر الدىندا ونەرىمىزدى كورسەتتىك. داستارقان باسىندا رەسمي ازاماتتار وتىردى. ەلباسى ولەڭ ايتىپ تۇرعان مەنىڭ جانە قاسىمداعى بۇگىندە مارقۇم بولىپ كەتكەن دومبىراشى مالىك ءابىش ەكەۋمىزدىڭ ونەرىمىزگە ءتانتى بولسا كەرەك. ول قاسىندا وتىرعان وسى سالاعا جاۋاپتى باسشىلاردان «بۇل جىگىتتەردىڭ اتاعى بار ما؟» دەپ سۇراپتى. سودان ەرتەڭىنە مالىك ءابىش ەكەۋمىزدى دەرەۋ سۋرەتكە ءتۇسىرىپ, قۇجاتتارىمىزدى الماتىعا جىبەردى. ءبىر ايدان كەيىن, دالىرەگى 13 تامىزدا ەكەۋمىزگە قازاقستان رەسپۋبليكاسىنىڭ ەڭبەك سىڭىرگەن ءارتىسى اتاعى بەرىلدى. بۇل اتاقتىڭ مەن ءۇشىن ورنى بولەك», – دەيدى ءانشى وتكەن كۇندەردى ەسكە الىپ.
عالىمجان ەلشىباي,
«ەگەمەن قازاقستان»
وڭتۇستىك قازاقستان وبلىسى
