اتالمىش شاراعا شىعارماشىل زيالى قاۋىم وكىلدەرى, ارداگەرلەر, مەرەيتوي يەسىنىڭ تۋىسقاندارى, سول سياقتى جەرگىلىكتى ۋنيۆەرسيتەت پەن كوللەدجدەردىڭ ستۋدەنتتەرى قاتىستى. جينالعانداردى ايماق باسشىسى قۇمار اقساقالوۆ قۇتتىقتادى. ءوڭىر باسشىسى ۇلى تۇلعالاردىڭ ەسىمىن ۇلىقتاۋ, تاريحي-مادەني نىساندار اشۋ, ەسكەرتكىشتەر ورناتۋ – ەلباسىنىڭ «رۋحاني جاڭعىرۋ» باعدارلاماسىن جۇزەگە اسىرۋدىڭ وزەكتى باعىتتارىنىڭ ءبىرى ەكەندىگىن اتاپ كورسەتتى.
«باعدارلامانى جۇزەگە اسىرۋ ءبىزدىڭ مەملەكەتىمىزدىڭ, حالقىمىزدىڭ تاريحىن تانۋعا, ەل تاريحىندا ەشكىمگە ۇقسامايتىن بايكەن ءاشىموۆ سياقتى كەمەل تۇلعالاردىڭ عالامات ءرولىن سەزىنۋگە جول اشادى. ۇلى وتان سوعىسى جىلدارىندا كورسەتكەن ەرلىگى مەن تاباندىلىعى ءۇشىن «قىزىل جۇلدىز», ەكى مارتە ءبىرىنشى دارەجەلى «وتان سوعىسى» وردەندەرىمەن, «ەرلىگى ءۇشىن» مەدالىمەن, پولشانى ازات ەتكەنى ءۇشىن وردەنمەن ماراپاتتالدى. پارتيالىق كەڭەس جۇمىسىندا ول ءوزىن دانا ۇيىمداستىرۋشى جانە ساياساتكەر رەتىندە كورسەتە ءبىلدى. مينيسترلەر كابينەتىنىڭ توراعاسى لاۋازىمىندا قازاقستاننىڭ دامۋىنا باعا جەتپەس ۇلەس قوستى. مەملەكەت باسشىسى بايكەن ءاشىموۆتى «وتان» وردەنىمەن ماراپاتتاي وتىرىپ, بايكەن ءاشىم ۇلىنىڭ ءومىرى ۇلى وتانىمىزعا قالتقىسىز قىزمەت ەتۋدىڭ جانە قاجىرلىلىقتىڭ جارقىن ۇلگىسى ەكەندىگىن اتاپ ايتقان بولاتىن», دەدى قۇمار اقساقالوۆ.
سالتاناتتى شارادا مارقۇمنىڭ ۇلى, م.قوزىباەۆ اتىنداعى سقمۋ-ءدىڭ رەكتورى وڭداسىن ءاشىموۆ, پارلامەنت ءماجىلىسىنىڭ دەپۋتاتى كارىباي مۇسىرمان, ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى اناتولي باشماكوۆ, بىرگە قىزمەت اتقارعان ارىپتەستەرى جاقسىلىق ىسقاقوۆ, اليك ديادين جۇرەكجاردى لەبىزدەرىن ءبىلدىردى.
ءومىر ەسقالي,
«ەگەمەن قازاقستان»
