شىلدە ايىنىڭ قورىتىندىسى بويىنشا قر-داعى مەديتسينالىق قىزمەتتەر وتكەن جىلمەن سالىستىرعاندا ءبىرشاما ۇلعايعان: دارىگەردىڭ العاشقى قابىلداۋى - 9,9%-عا, ءىش قۋىسىن ۋلترادىبىستىق زەرتتەۋ - 13%-عا, جالپى قان ءاناليزى - 7,6%-عا جانە جالپى نەسەپ ءاناليزى - 8,5%-عا قىمباتتاعان.
ماسساج قىزمەتتەرى 6,5%-عا, شيپاجاي قىزمەتتەرى - 6,8%-عا كوتەرىلگەن. ستوماتولوگيا قىزمەتتەرىندە دە باعالاردىڭ ءوسۋى بايقالادى: ءتىس جۇلۋ قۇنى ءبىر جىلدا 10%-عا وسكەن.
سونىمەن بىرگە, دەنساۋلىق ساقتاۋ جۇيەسىندەگى ەڭبەكاقى ءوسىمى ايتارلىقتاي جوعارى ەمەس. 2017 جىلدىڭ ءىى توقسان قورىتىندىسىندا جالپى دەنساۋلىق ساقتاۋ جانە الەۋمەتتىك قىزمەتتەر سالاسىنداعى ورتاشا ايلىق جالاقى ءوسىمى 6,1% پايىز عانا بولعان, بۇل رەتتە ناقتى جالاقى يندەكسى سالا قىزمەتكەرلەرىنىڭ ساتىپ الۋ قابىلەتىنىڭ 1,3%-عا ازايعانىن كورسەتتى.
وزگە ارىپتەستەرىمەن سالىستىرعاندا, اۋرۋحانا ۇيىمدارى قىزمەتكەرلەرىنىڭ ەڭبەكاقىسى كوبىرەك وسكەن ء(بىر جىلدا 7%-عا), دەگەنمەن بۇل سالا قىزمەتكەرلەرىنىڭ دە ساتىپ الۋ قابىلەتى ءبىر جىلدا 0,5%-عا تومەندەگەن.
ودان بولەك, دەنساۋلىق ساقتاۋ جانە الەۋمەتتىك قىزمەتتەر سالاسىنىڭ قىزمەتكەرلەرى قر بويىنشا جالپى قىزمەتكەرلەردەن 24,3%-عا تومەن جالاقى الادى.
دەگەنمەن, دەنساۋلىق ساقتاۋ ءمينيسترى ەلجان ءبىرتانوۆ بولاشاققا جاعىمدى بولجام جاساپ وتىر: مىندەتتى مەديتسينالىق ساقتاندىرۋ جۇيەسىندەگى دارىگەرلەردىڭ ورتاشا جالاقىسى ارتاتىن بولادى. ءمينيستردىڭ پىكىرىنشە, كلينيكالاردىڭ تابىسى كوبەيگەن سوڭ, جالاقى وسەدى. ۇزدىك كلينيكالار باسەكە نەگىزىندە ءوز تابىستارىن كوبەيتىپ, دارىگەرلەرىنىڭ جالاقىسىن كوتەرە الادى.
ەسكە سالا كەتسەك, ءمامس بويىنشا العاشقى جارنالار مەن اۋدارىمدار بيىلعى شىلدە ايىندا تۇسە باستادى.
2017 جىلدىڭ ءىى توقسانىنىڭ قورىتىندىسى بويىنشا, ءبىر جىلدا دەنساۋلىق ساقتاۋ جانە الەۋمەتتىك قىزمەتتەر جۇيەسىندەگى قىزمەتكەرلەر سانى 8%-عا وسكەن. بارىنەن بۇرىن اۋرۋحانا ۇيىمدارىنىڭ قىزمەتكەرلەر سانى ارتقان: ولاردىڭ تىزىمدىك سانى 8%-عا, ناقتى سانى 7,9%-عا كوبەيگەن. الەۋمەتتىك قىزمەت سالاسىندا تۇرعىلىقتى جەرمەن قامتاماسىز ەتپەيتىن قىزمەت كورسەتۋ سەگمەنتىندە قىزمەتكەرلەردىڭ كوبەيگەنى بايقالادى, ولاردىڭ تىزىمدىك سانى 9,3%-عا, ناقتى سانى 11,5%-عا ارتقان.
جالپى العاندا, وتكەن جىلى دەنساۋلىق ساقتاۋ سالاسىنداعى جۇمىسپەن قامتۋدىڭ ايتارلىقتاي وسكەنى بايقالادى. 2016 جىلدىڭ قورىتىندىسى بويىنشا, دارىگەرلەر سانى 7%-عا, 74,6 مىڭعا دەيىن ارتقان, ورتاشا مەديتسينالىق قىزمەتكەرلەر سانى - 4,2%-عا (170,8 مىڭ ادام) وسكەن. 2015 جىلى دارىگەرلەر سانىنىڭ ارتۋى 1,2%-دى, ورتاشا مەديتسينالىق قىزمەتكەرلەر سانىنىڭ كوبەيۋى - 2,4%-دى قۇراعان.
