ەكسپو-2017 حالىقارالىق كورمەسىنە ارنالعان سپورتتىق شارالار اياسىندا فۋتبولدان Football Cup ءتۋرنيرى ءوتىپ جاتىر. بۇل باسەكەدە بۇرىنعى فۋتبول جۇلدىزدارىنان قۇرالعان التى ەلدىڭ كومانداسى كۇش سىناسۋدا.
الەم جۇلدىزدارى جانە گەرمانيا قۇرامالارىمەن بىرگە «ا» توبىنا تۇسكەن قازاقستان فۋتبولشىلارى ءتۋرنيردى ءساتتى باستاعان. ولار گەرمانيا قۇراماسىن 8:6 ەسەبىمەن جەڭگەن بولاتىن.
ال ەكىنشى كەزدەسۋدە جەرلەستەرىمىز الەم جۇلدىزدارىنان 4:7 ەسەبىمەن جەڭىلىپ قالدى.
«ۆ» توبىندا يتاليا, پورتۋگاليا جانە رەسەي قۇرامالارى ءوزارا كۇش سىناسۋدا.
جەلاياقتىڭ جەڭىلىسى
لوندوندا جەڭىل اتلەتيكادان ءوتىپ جاتقان الەم چەمپيوناتىندا ايگىلى جەلاياق, وليمپيادانىڭ سەگىز دۇركىن چەمپيونى ۋسەين بولت 100 مەترلىك قاشىقتىقتا 9,95 سەكۋند ناتيجەمەن قولا جۇلدەنى مىسە تۇتتى.
ەسكە سالساق, بۇل چەمپيونات يامايكالىق اڭىز ادامنىڭ سپورتتىق كارەراسىنداعى جەكەلەي سىن بويىنشا جۇگىرگەن اقىرعى جارىسى بولاتىن.
ال بۇل سىندا امەريكالىق جۇيرىك دجاستين گاتلين مارە سىزىعىن 9,92 سەكۋند كورسەتكىشپەن ءبىرىنشى بولىپ قيىپ, الەم چەمپيونى اتاندى. كۇمىس مەدال اقش-تىڭ تاعى ءبىر اتلەتى كريستيان كوۋلمانعا (9,94) بۇيىردى.
ازىرلەگەن
قايرات جۇنىس ۇلى
