جالپى SsangYong Nomad ماشيناسىن شىعارۋ جوباسىنىڭ جۇزەگە اسىرىلۋى وتاندىق ءاۆتووندىرىستى دامىتۋدا, قازاقستان وندىرىسىنە يننوۆاتسيالىق جاڭالىقتار اكەلۋدە, ءسويتىپ اۆتوماشينالاردىڭ امبەباپ جوعارى ءتوزىمدى جەلىلەرىن شىعارۋدا, وسى اۆتويندۋستريا سالاسىنداعى ماماندار بىلىكتىلىگىن ارتتىرۋدا ەرەكشە ماڭىزى بولدى. برەندتەردى جاساعان باستاپقى زاۋىتتاعى تاسىلدەردى ۇيرەنگەن ءبىزدىڭ ماماندار قازىر بىلىكتىلىگى جاعىنان شەتەلدىك ارىپتەستەرىنەن قالمايتىن دارەجەگە جەتىپ كەلەدى. ال زاۋىتتاعى وندىرىستىك الاڭنىڭ كەڭدىگى, زاماناۋي تەحنولوگيالاردى جاساۋعا مۇمكىندىگىنىڭ جەتىمدىلىگى, جابدىقتالۋى دۇنيە جۇزىندەگى قانداي زاۋىتپەن دە تالاسا الادى. ەندى وسى جوبا اينالاسىندا «SsangYong Nomad برەند ماشينانىڭ شىعارىلۋى نەگە توقتاپ قالدى, زاۋىت ودان باس تارتتى ما؟» دەگەن اڭگىمە بار. مۇنداي قاڭقۋ ءسوزدىڭ بارى راس, ويتكەنى ءدال قازىر ەشكىم زاۋىتتان ساپتا تۇرعان ماشينانى كورىپ وتىرعان جوق. ال ونىڭ كوڭىل قۋانتار سەبەبى بار.
سول ءۇشىن SsangYong Motor Co اتالعان ماشينانىڭ مودەلىن, ونىڭ ىشىندە قورابىن, قۇرامداس باسقا دا بولىكتەرىن جاڭارتۋ-جاڭعىرتۋ جۇمىستارىن جۇرگىزەتىن بولادى.
– زاۋىتتا SsangYong Nomad برەند ماشيناسىن شىعارۋ جوباسى توقتاعان جوق, ول مۇمكىن ەمەس. راس, ماشينانىڭ قۇراستىرىلۋى ۋاقىتشا توقتاپ تۇر. ول برەندتىڭ مودەلىن جاڭعىرتۋ ىسىنە بايلانىستى بولىپ وتىر, باستامانى برەندتى جاساۋشى كورەيالىق ارىپتەستەرىمىز كوتەر-
ءدى. نەگىزى ماشينا قۇراستىرۋداعى جۇمىستىڭ باسى دانەكەرلەۋ بولىپ تابىلادى. وسى ءاۆتوموبيلدى وندىرەتىن كورەيالىق ارىپتەستەر دانەكەرلەۋدىڭ تەحنيكالىق سيپاتىن وزگەرتۋگە شەشىم جاسادى, سوعان وراي دانەكەرلەۋ جەلىسىندەگى جابدىقتارعا, تەحنولوگياعا دا ءىشىنارا وزگەرىستەر ەنگىزىلەدى. ال سىرلاۋ ءىسى, قۇراستىرۋ بۇرىنعى كۇيىنشە قالادى. ۇزاق ۋاقىت تەككە تۇرماس ءۇشىن ءبىز وعان قاباتتاستىرا JAC ماشيناسىنىڭ دانەكەرلەۋ, قۇراستىرۋ جابدىقتارىن ورناتىپ جاتىرمىز. مىسالى, كورەيالىقتار كونسترۋكتسيالىق ماسەلەلەردى 2018 جىلدىڭ ءبىرىنشى توقسانىنا دەيىن شەشىپ بولعانشا, ءبىز ۇستىمىزدەگى جىلدىڭ ءتورتىنشى توقسانىندا JAC ماشيناسىنىڭ دانەكەرلەۋ, سىرلاۋ, قۇراستىرۋ جۇمىستارىن باستاپ, ال 2018 جىلدىڭ باسىنان Peugeot-31 مودەلىن وسى وندىرىستىك الاڭدا تولىققاندى قۇراستىراتىن بولامىز,–دەيدى «سارىارقااۆتوپروم» جاۋاپكەرشىلىگى شەكتەۋلى سەرىكتەستىگىنىڭ تەحنيكالىق دامىتۋ جونىندەگى ديرەكتورى سەرگەي موگيلاتوۆ.
قازىر AllurGroup پەن ونىڭ ارىپتەستەرى اراسىندا ماشينانىڭ قۇرامداس بولشەكتەرىنىڭ ساتىپ الۋ باعاسى جونىندە كەلىسىمدەر جۇرگىزىلۋدە. قازاقستان نارىعىندا SsangYong ماشيناسىنىڭ رەستايلينگىلىك نۇسقاسىنىڭ پايدا بولۋى, ونىڭ باسەكەدە ءباسى باسىم بولۋى-
مەن قاتار, بولشەك ساۋدا باعاسىنىڭ تومەندەۋىنە دە ىقپال ەتەدى. كەلىسىمشارت جاساۋ ۇدەرىسى شەڭبەرىندە وسى مودەلدىڭ وندىرىستىك جەلىسىن جاڭعىرتۋعا قاتىستى تەحنيكالىق ماسەلەلەر دە شەشىمىن تابادى. ماشينا كونسترۋكتسياسىنداعى وزگەرىستەردەن كەيىن بارلىق پايدالانعان دانەكەر كوندۋكتورلاردا دا وزگەرتۋلەر جاساۋ تالاپ ەتىلەدى. سونىمەن قاتار, جەلىدەگى دانەكەرلەۋ جۇمىستارىن رەتتەۋدى جاڭارتۋ قولعا الىنادى. ەڭ ءبىر ايتا كەتەتىنى, ءىشىنارا تەحنولوگيالىق ۇدەرىستەردى تۇزەتۋگە بايلانىستى جۇمىستار كادىمگى وندىرىستىك تارتىپپەن جۇرگىزىلگەندىكتەن, ول كومپانيا ءۇشىن ەشقانداي ماتەريالدىق, قارجىلاي, تاعى باسقاداي شىعىن اكەلمەيدى.
Nomad مودەلى دانەكەر, سىرلاۋ جۇمىستارىن قوسقاندا تولىققاندى تاسىلمەن وندىرىلەدى, ول وندىرىسكە قازاقستان دامۋ بانكىنىڭ قارجىلاي ينۆەستيتسياسى ارقىلى ەنگىزىلگەن بولاتىن. ينۆەستيتسيا Nomad جوباسى بويىنشا جابدىقتار ساتىپ الۋعا, ماماندار مەن قىزمەتكەرلەرگە زاماناۋي تەحنولوگيالىق ۇردىستەردى وقىتۋعا جۇمسالدى. زاۋىت ماشينا قۇراستىرۋ جەلىسىنە تولىققاندى ءتاسىلدى ەنگىزۋ ارقاسىندا, وندىرىسكە ينۆەستيتسيا سالاتىن شەتەلدىك ينۆەستورلاردى, جاڭا برەندتەردى تارتتى. بۇل ماشينا جاساۋ ءوندىرىسى كاسىپورىندارىن كەڭەيتۋگە, تاعى دا شەتەلدىك ءىرى ينۆەستورلار نازارىن اۋدارۋعا مۇمكىندىك بەردى.
قوستاناي ماشينا جاساۋ الاڭىندا ءوندىرىس ۇدەرىسىندە كىبىرتىكتەۋ بولعان ەمەس, ۇستىمىزدەگى جىلدىڭ ەكىنشى توقسانىندا اۆتوموبيلدەر شىعارۋ 284 پايىزعا, ياعني 4 ەسەگە ءوستى. مۇنى ساندار تىلىمەن سويلەتسەك, ەكىنشى جارتىجىلدىقتا 33,8 ميلليارد تەڭگەنىڭ 2373 دانا تەحنيكاسى ساپقا قويىلدى. «سارىارقااۆتوپروم» زاۋىتىندا جاسالعان اۆتوموبيلدەردى ىشكى نارىقتا ساتۋ وسى ماۋسىم ايىندا ەلىمىزدەگى وتاندىق ءوندىرىس شىعارعان اۆتوموبيلدەر سەگمەنتىندە 26,7 پايىزدى قۇرادى. بۇل كومپانيانىڭ نارىقتاعى شەبىن نىعايتا تۇسەدى دەگەن ءسوز. جالپى, AllurGroup كومپانياسى قۇرامىنا كىرەتىن ماشينا جاساۋ وندىرىستىك الاڭدارى كونۆەيەرلەرىنەن جىلدىڭ العاشقى ءۇش ايىندا 490 اۆتوموبيل ساپقا قويىلسا, كەلەسى ءۇش ايدا شىعارىلعان تەحنيكالار بىرلىگىنىڭ سانى 1883 بولدى. سونىڭ ىشىندە «سارىارقااۆتوپروم» زاۋىتىنىڭ ءباسى باسىم ەكەنىن كورسەتكىشتەر ايعاقتايدى. نارىقتىڭ بۇلجىمايتىن ءوز زاڭى بار. نارىقتا تۇپكى ناتيجە ءونىمنىڭ وندىرىلگەنىنە ەمەس, ونىڭ وتۋىنە تاۋەلدى. ۇستىمىزدەگى جىلى زاۋىت ءونىمىن العان جەكە جانە كورپوراتيۆتىك كليەنتتەر سانى 82 پايىزدى قۇرادى, ماشينانىڭ 18 پايىزى تەندەر ارقىلى مەملەكەتتىك مەكەمەلەرگە بەرىلدى. كومپانيا جۇمىسقا كىرىسكەلى قوستاناي زاۋىتىنان 28,5 مىڭ دانا جەڭىل جانە كوممەرتسيالىق تەحنيكا شىعارىلدى. سونىڭ بارلىعى دا يەسىن تاپتى.
بۇگىندە قوستاناي زاۋىتىنىڭ ءوندىرىس جەلىسىنەن جەڭىل ءاۆتوموبيلدىڭ 58 مودەلى جانە اراسىندا اتاقتى Peugeot, SsangYong, Iveco, JAC, Hyundai سەكىلدى الەمدىك برەندتەر بار 8 كوممەرتسيالىق تەحنيكا شىعارىلادى. مۇنىڭ سىرتىندا بيىل ءوندىرىس جەلىسىنەن Chevrolet Niva ي Ravon Nexia R3 مودەلدەرى وندىرىلە باستادى. زاۋىتتىڭ ءوندىرىس الاڭىندا برەندتى اۆتوموبيلدەر شىعارۋدى جولعا قويۋدىڭ ارقاسىندا ولاردىڭ باعاسىن بولشەك ساۋدا نارىعىندا 200 000 تەڭگەدەن 500 000 تەڭگەگە دەيىن ارزانداتۋعا مۇمكىندىك تۋدى.
AllurGroup كومپانياسى بۇگىندە سىرتقى ساۋدا اينالىمىنىڭ نىعايۋى جولىنداعى جۇمىستى كۇشەيتە تۇسكەن. بيىلعى جىلدىڭ ءساۋىر ايىندا قوستانايدا وندىرىلگەن JAC جەڭىل كولىگىنىڭ ءبىر مىڭ داناسىن ەكسپورتقا شىعارۋ جونىندە تاجىكستانمەن كەلىسىم جاسالدى. ول بويىنشا كولىكتىڭ العاشقى پارتياسى سىرتتاعى يەلەرىنىڭ قولىنا ءتيىپ تە ۇلگەردى. ال بۇل جالپى قازاقستانداعى اۆتوموبيل ەكسپورتىنا وڭ اسەر ەتتى. قوستانايدا شىعارىلعان ءاۆتوموبيلدىڭ ەكسپورتتىق ساتىلىمىنىڭ ءبىر پارتياسىنىڭ ءوزى تۇتاس مامىر ايىندا سىرتقا ساتىلعان كولىك سانى كولەمىنەن اسىپ ءتۇستى.
مودەلى جاڭارتىلىپ, جاڭعىرتىلعان SsangYong Nomad برەندى ەلىمىزدە وندىرىلگەن اۆتوموبيلدەردىڭ ىشكى, سىرت-
قى ساۋداسىن ورگە سۇيرەيتىنى ايان. بۇل «سارىارقااۆتوپروم» زاۋىتىنداعى ءوندىرىس جەلىسىنىڭ كەڭەيۋىنە, جۇمىس ورىندارىنىڭ كوبەيۋىنە دە ىقپالى ەتەرى كامىل.
ءنازيرا جارىمبەت,
«ەگەمەن قازاقستان»
قوستاناي
