اقمولا وبلىسىندا ورتالىق ازياداعى كۇن كوزىنەن قۋات الاتىن ەڭ ءىرى ەلەكتر ستانساسى سالىناتىن بولدى. «KB Enterprises» كومپانياسى ينۆەستور ءارى جوبالاۋشى رەتىندە قۋاتى 100 مۆت-عا جەتەتىن ەلەكتر ستانساسىن سالۋعا دايىندىق جۇمىستارىن اياقتاپ, ەندى جوبانى جۇزەگە اسىرۋعا كىرىسىپ تە كەتتى. وڭىرلىك كوممۋنيكاتسيالار قىزمەتىنىڭ حابارلاۋىنشا, جاڭا ەلەكتر ستانساسى تسەلينوگراد اۋدانى قابانباي باتىر اۋلىندا سالىنادى.
جوبانىڭ جالپى قۇنى 165 ميلليون ەۋرونى قۇراپ وتىر. بۇگىنگى تاڭدا اتالعان جوبانىڭ ءساتتى قارقىن الۋىنا بارلىق جاعداي جاسالعاندىعىن ايتا كەتۋ كەرەك. اۋماعى 300 گا قۇرايتىن ۋچاسكەدە دايىندىق جۇمىستارى باستالىپ تا كەتتى. مەردىگەر ۇيىم رەتىندە حالىقارالىق SUMEC CLEAN ENERGY INTERNATIONAL CO.,LTD حولدينگى قۇرىلىسپەن اينالىساتىن بولادى. ال قۇرىلىس ەنەرگەتيكا سالاسىندا الدىڭعى لەكتە سانالاتىن اۆۆ ەۋروپالىق كونتسەرنىمەن ىڭتىماقتاسا جۇزەگە اسىرىلارى بەلگىلى بولىپ وتىر. اتالعان كونتسەرن قۇرال-جابدىقتاردى تاڭداۋدان باستاپ, ونى جەتكىزۋ مەن مونتاجداۋدى قوسا العاندا بۇكىل جۇمىس ىرعاعىنا ءوز ساراپشىلارىن قاتىستىرادى. وسىلايشا قازاقستاندا عانا ەمەس, بۇكىل ورتالىق ازيادا تەڭدەسى جوق زاماناۋي جوعارى تەحنولوگيالى ەنەرگەتيكالىق كەشەن ىسكە قوسىلعالى تۇر. اتالعان جوبا قوسىمشا جۇمىس ورىندارىن قۇرۋمەن قاتار, ءوڭىردىڭ ەنەرگەتيكالىق جۇيەسىن جاقسارتادى جانە بولاشاقتا وبلىستىڭ, ءتىپتى ەلىمىزدىڭ قارجىلىق-ەكونوميكالىق جاعدايىن ارتتىرۋعا وڭ ىقپال ەتەدى دەپ كۇتىلۋدە. بۇل سونىمەن قاتار, ەلىمىزدىڭ بولاشاعى زور ينۆەستيتسيالىق «جاسىل» تەحنولوگيالاردى قابىلداي الاتىن اشىق رىنوك ەكەندىگىن پاش ەتەدى. وسىلايشا اتالعان جوبانىڭ ءساتتى باستالۋىمەن ەلىمىز الەمدىك قاۋىمداستىققا ءوزىنىڭ جوعارى تەحنولوگيالى, ەكولوگيالىق جانە پايدالى جوبالارعا مۇددەلى ەكەنىن بايقاتا تۇسەدى. «KB Enterprises» كومپانيا-
سى تارتقان جوباعا قاتىسۋشىلار حالىقارالىق دارەجەدەگى ساراپشىلار ەكەندىگىن ەسكەرسەك, اتالعان ستراتەگيالىق جوبانىڭ جۇزەگە اسىۋىنا كۇمان كەلتىرۋگە بولماس.
اسقار تۇراپباي ۇلى,
«ەگەمەن قازاقستان»
اقمولا وبلىسى
