وبلىستىق مادەنيەت باسقارماسىنىڭ باسشىسى نۇربولات احمەتجانوۆ دايىندىق جۇمىستارىمەن بىلاي تانىستىردى: «حالىقارالىق كورمەگە ەرەكشە بولمىسىمەن قازاق سپورتىنىڭ دارابوزى اتانعان قاجىمۇقان مۇڭايتپاسوۆتىڭ ومىرىنە, بالۋاندىعى مەن پاتريوتتىعىنا كۋا بولار فوتوسۋرەتتەر مەن تاريحي قىسقا مەتراجدى دەرەكتى فيلمدەر, ءوزى تۇتىنعان تۇرمىستىق زاتتار مەن كيگەن كيىمدەر جەتكىزىلەدى. سونداي-اق, الەمدىك سايىستاردان ۇتىپ العان 48 التىن-كۇمىس مەدالدارى جانە سپورتتىق بۇيىمدارى, 74 جاسىندا ۇلى اقىن اباي قۇنانباي ۇلىنىڭ 100 جىلدىق مەرەيتويىنا كيىپ بارعان كويلەگى مەن شالبارى, جاتتىعۋ كەزىندە پايدالانعان كىرتاستارى حالىقارالىق كورمە جۇرتشىلىعى نازارىنا ۇسىنىلادى.
سونىمەن قاتار, ءجۇز مىڭنان اسا قۇندى جادىگەرى بار وڭتۇستىك مۋزەيلەرى قازىناسىندا وزىندىك ورنى مەن تاريحى وزگەشە دۇنيە سانالاتىن كەنەسارى قاسىم ۇلىنىڭ قىلىشى دا استانا تورىنەن تابىلادى. بۇل تەمىر قىلىشتىڭ سابى – سۇيەكتەن, قىنابى بىلعارىدان جاسالعان. ونىڭ ۇزىندىعى – 70, سابى – 15, ءجۇزىنىڭ ەنى – 3-4 سانتيمەتر».
شىمكەنت قالاسىنداعى وبلىستىق تاريحي-ولكەتانۋ مۋزەيىنە قويىلعان كەنەسارى قاسىم ۇلىنىڭ قۇندى جادىگەرى دە كورمە كوركىن اشپاق. ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلاماسى اياسىندا جاسالعان جۇمىستار دا وبلىستىڭ ەكسپو-2017 كورمەسىندە كورىنىس تابادى. ماسەلەن, «تۇركىستان – تۇركى الەمىنىڭ مادەني استاناسى» جىلى اياسىندا وتكەن حالىقارالىق فوتوسۋرەتشىلەر كەزدەسۋىندە وڭتۇستىكتىڭ كيەلى جەرلەرىنە قاتىستى تۇسىرىلگەن فوتو تۋىندىلاردان ارنايى كورمە ۇيىمداستىرىلىپ, ءوڭىردىڭ تاريحي, كيەلى جەرلەرىنەن ماعلۇماتتار بەرىلەدى.
