«مەن وتە قۋانىشتىمىن. بارلىعى اياق استىنان بولدى. بيلەتتى جاڭا «مەگا» ساۋدا جانە ويىن-ساۋىق ورتالىعىنان كەشكى جەڭىلدىكپەن 2500 تەڭگەگە ساتىپ العانمىن. چەحيا پاۆيلونىن ارالاپ ۇلگەرىپ, «Shell» كومپانياسىنىڭ پاۆيلونىنا اياق باسقانمىن. بىراق مەنى «استانا-ەكسپو-2017» ۇك ءباسپاسوز ورتالىعىنا جۋرناليستەرمەن كەزدەسۋگە الىپ كەلدى. مۇنداي ساتتىلىكتى كۇتكەن جوقپىن. ءوزىم ورالدا تۇرامىن. ەگىز بالام بار», دەدى عايسا جۇماليەۆ.
سالتاناتتى باسقوسۋدا «استانا ەكسپو-2017» ۇلتتىق كومپانياسىنىڭ باسقارما توراعاسى احمەتجان ەسىموۆ 2 ميلليونىنشى قوناقتى ءوزى قۇتتىقتاپ, باعالى سىيلىق تابىستادى. «بۇگىن – «استانا ەكسپو-2017» ۇلتتىق كومپانياسى ءۇشىن ايتۋلى كۇن. ويتكەنى, ەرەكشە وقيعا ورىن الدى. ءبىز تۇتاس كورمە كەزەڭىندە «ەكى ميلليون ادام كەلىپ, ەكسپو پاۆيلوندارىن 5 ميلليون رەت ارالايدى» دەپ بولجاعان ەدىك. بىراق, كورمەنىڭ اياقتالۋىنا 37 كۇن قالعاندا, جوسپارلاعان مەجەمىزگە قول جەتكىزدىك. ەكسپو پاۆيلوندارىنا كەلەر بولساق, ارالاۋ كورسەتكىشى 15 ميلليوننان اسىپ كەتتى, بۇل ءبىز كۇتكەن ناتيجەدەن ءۇش ەسەگە كوپ. ەلباسىنىڭ جوباسى ويداعىداي جۇزەگە اسۋدا», دەدى باسقارما توراعاسى.
ا.ەسىموۆ وسى جيىندا حالىقارالىق كورمەنىڭ استانا ەكونوميكاسىنىڭ بارلىق سالاسىنا وڭ اسەر ەتكەنىن جەتكىزدى. «باسپانالاردىڭ جالعا بەرىلۋى – 33 پايىزعا, تاۋار اينالىمى – 20 پايىزعا, ساۋدا جانە ويىن-ساۋىق ورتالىقتارىنا بارۋ كولەمى ەكى ەسەگە وسكەن. تۋريزم سالاسى دا ەداۋىر جاندانا تۇسكەن: تۋريستىك وپەراتورلارعا جۇگىنۋ كورسەتكىشى 78 پايىزعا ارتقان. اشىق اسپان ساياساتىن جاريالاپ, رەيستەر سانىن 1,3 ەسەگە ۇلعايتتىق. حەلسينكي, بۋداپەشت, ۆارشاۆا سىندى بىرنەشە قالالارعا جاڭا رەيستەر اشىلدى. ءبىر عانا اۋە رەيستەرىمەن كۇندەلىكتى 7 مىڭ ادام كەلەدى, 16 مىڭ ادام جولاۋشىلار كولىگىمەن جەتەدى. بۇل – وتە جاقسى كورسەتكىش», دەدى ۇلتتىق كومپانيا باسشىسى. ونىڭ ايتۋىنشا, ءبىر عانا ماۋسىم ايىندا استانادا قىزمەت كورسەتۋ سالاسىنان تۇسەتىن سالىق ءتۇسىمى 2,5 ەسەگە كوبەيگەن.
«بۇل – كۇردەلى داعدارىس ۋاقىتىنداعى ەكونوميكانىڭ جاندانۋى. بىزدە شاعىن جانە ورتا بيزنەس سۋبەكتىلەرى كوبەيدى, جالاقى جوعارىلادى. ەكسپو اياقتالعان سوڭ اكىمدىكپەن بىرلەسىپ, تولىق اقپاراتتى تاعى دا بەرەتىن بولامىز. دەگەنمەن, كورمەنىڭ ۇشتەن ەكى بولىگىن وتكەرىپ, كورمەنى وتكىزۋ تۋرالى شەشىم قابىلداعان پرەزيدەنتىمىزدىڭ كورەگەندىلىگىنە كوز جەتكىزدىك», دەدى ا.ەسىموۆ.
11 شىلدە كۇنى ەكسپو-2017 كورمەسىنە كەلگەن ميلليونىنشى كەلۋشى تىركەلگەنى ەسىمىزدە. ول 27 جاستاعى استانالىق مۇعالىم گۇلجيھان جاڭابەرگەنوۆا ەدى.
