كورشىەلدىڭ ينۆەستورلارى بيوەتانول وندىرىسىنە وتىرار اۋدانىن, ال فوسفور قالدىقتارىن وڭدەۋدە سوزاق ءوڭىرىن قولايلى كورىپ وتىر. بۇگىن بۇل تۋرالى وڭتۇستىك قازاقستان وبلىسىنىڭ اكىمى مەن قىتاي فتورسەليكوندىق ءوندىرىسى اسسوتسياتسياسىنىڭ ديرەكتورى سيانجۋن تساو مىرزا باستاعان دەلەگاتسيانىڭ كەزدەسۋىندە ءمالىم بولدى.
ءوڭىر باسشىسى شەتەلدىك ينۆەستورلارعا وبلىسىمىزدىڭ ينۆەستيتسيالىق تارتىمدىلىعى مەن يندۋستريالدى-يننوۆاتسيالىق جوبالاردى ىسكە اسىراتىن ايماقتاردىڭ الەۋەتىن باياندادى. وبلىس ەكونوميكاسىن ورگە سۇيرەپ كەلە جاتقان سالالارعا توقتالعان اكىم ينۆەستيتسيا تارتۋ بويىنشا جەرگىلىكتى بيلىك تاراپىنان كورسەتىلەتىن جەڭىلدىكتەر مەن مۇمكىندىكتەرگە كەڭىنەن توقتالدى.
«ەلگە ينۆەستيتسيا تارتۋ – ەكونوميكانىڭ ەڭ نەگىزگى تەتىگى. وسىنى ەسكەرە وتىرىپ ءبىز كاسىپكەرلەرگە بارىنشا قولداۋ ءبىلدىرىپ وتىرمىز. وڭىرىمىزدە 11 يندۋستريالدىق 1 ارنايى ەكونوميكالىق ايماعىمىز جۇمىس ىستەيدى. شەتەلدىك ينۆەستورلار كەدەندىك, م ۇلىكتىك سالىقتاردان بوساتىلادى. سونداي-اق جەر تەلىمى, ينفراقۇرىلىمدىق قاجەتتىلىكتەردىڭ بارىمەن تولىق قامتاماسىز ەتەتىن بولامىز», - دەدى جانسەيىت قانسەيىت ۇلى.
كەزدەسۋ بارىسىندا قىتايلىق دەلەگاتسيانى باستاپ كەلگەن سيانجۋن تساو مىرزا نەگىزگى ەكى باعىتتا زاۋىت قۇرىلىسىن باستاۋعا مۇددەلى ەكەندىكتەرىن جەتكىزدى. وسى رەتتە شەتەلدىك ينۆەستورلاردى وڭتۇستىك وڭىرىنە ارنايى شاقىرتقان ەلىمىزگە بەلگىلى كاسىپكەر سەرىكجان سەيتجانوۆتىڭ دا ەڭبەگىن اتاپ وتكەن ءجون.
ء«بىز وڭتۇستىك قازاقستان وبلىسىندا نەگىزگى ەكى باعىتتى دامىتۋدى جوسپارلاپ وتىرمىز. ونىڭ ءبىرى – بيوەتانول ءوندىرۋ ءىسى, ال ەكىنشىسى فوسفور قالدىقتارىن قايتا وڭدەۋدەن وتكىزۋ. ەگەر ەكىجاقتى كەلىسىمدەر ورىندالىپ جاتسا, ەكى زاۋىتتىڭ قۇرىلىسىن تەزارادا باستاۋدى ءجون كورىپ وتىرمىز», - دەدى سيانجۋن تساو مىرزا.
ايتا كەتەيىك, بۇگىنگى تاڭدا الەمدە بيوەتانول ءوندىرىسىنىڭ ءورىسى كەڭىپ, پايدالانۋشىلار قاتارى ارتىپ كەلەدى. عىلىم تىلىمەن ايتساق, بيوەتانول دەگەنىمىز تەحنيكالىق ابسوليۋتتەندىرىلگەن سپيرت قۇرامى 99,9 گرادۋستى قۇرايدى. اتالمىش جاڭا وتىن ءتۇرى جانار-جاعار مايعا قاراعاندا, اۋانى لاستامايدى جانە پارنيكتىك گازداردى دا بولمەيدى. ءبىر سوزبەن ايتقاندا ادامزات بالاسىنا دا, قورشاعان ورتاعا دا زيانسىز وتىن. قىتايلىق ينۆەستورلار بيوەتانول ءوندىرۋ ىسىندە وڭتۇستىكقازاقستاندىق جۇگەرى مەن بيداي, ارپا قالدىقتارىن پايدالانباق. بۇل ءوز كەزەگىندە وڭتۇستىك قازاقستان وبلىسىنىڭ اۋىل شارۋاشىلىق سالاسىن دامىتۋدىڭ ەرەكشە جولى بولماق.
شەتەلدىك ينۆەستورلاردىڭ ەكى جوباسىنا دا قولداۋ بىلدىرگەن جانسەيىت قانسەيىت ۇلى ءتيىستى باسقارما باسشىلارىنا ناقتى تاپسىرمالار جۇكتەدى. ءتيىستى قۇجاتتاردى تەزدەتىپ ازىرلەپ, قاجەتتى جەر تەلىمدەرىن ءبولۋدى جانە دە ەكى زاۋىتتىڭ دا ىرگەتاسىن بيىل قالاۋدى تاپسىردى.
